په سویډن کې مېشت د «اېماېماې» افغان لوبغاړی سخي قنبري د برازیلي لوبغاړي ګبریل پاسکالوټي سره د لوبې لپاره چمتو دی. دغه لوبه به نن جمعه (د وري ۱۴مه) د فرانسې په ارکیا ارینا لوبغالي کې د «ار اېس سي» سازمان سیالیو د ۳۹م پړاو د یوې برخې په توګه ترسره شي.
سخي قنبري تر اوسه پورې په خپلو لسو ازاده سیالیو کې اته بریاوې او دوه ماتې لري. له بلې خوا د برازیل لوبغاړی ګابریل پاسکالوټي د شپږو بریاوو او دوو ماتو ریکارډ لري.
قنبري په خپلو تېرو پنځو لوبو کې څلور بریاوې او یوه ماته لري او په تېرو دوو لوبو کې بیا د لوبو ګټونکی و. بل لور ته پاسکالوټي په خپلو وروستیو پنځو سیالیو کې درې بریاوې او دوه ماتې لري او خپلې وروستۍ درې لوبې یې هم ګټلې دي.
د دواړو لوبغاړو د مخامخ کېدو او وزن پورته کولو مراسم هم د پنجشنبې په ورځ ترسره شول.
