د ناروې د کډوالو شورا خبرداری ورکړی، چې د طالبانو او پاکستان ترمنځ د روانې جګړې له امله زرګونه بېځایه شوې کورنۍ په خورا بد وضعیت کې ژوند کوي او که بېړنۍ مرستې ورته ونه رسیږي له ناورین سره به مخ شي.
د ناروې د کډوالو شورا د جمعې په ورځ، د وري ۱۴مه د یو ویډیويي پیغام په خپرولو سره ویلي، چې د پاکستان د بریدونو له امله بېځایه شوې کورنۍ په ناسمو او غیر معیاري خېمو کې ژوند کوي او هېڅ ډول لومړنیو خدماتو ته لاسرسی نه لري.
په افغانستان کې د نارورۍ د کډډوالو شورا مسول جاکوپو کاریدي زیاته کړې: «موږ د ننګرهار په مومندره ولسوالۍ کې یوو. دلته له ۱۴۰۰ څخه ډېر کسان اوسېږي. دا کسان د پاکستان د بریدونو له امله بېځایه شوې دي. په دغه ځای کې خلک په خیمو کې اوسېږي او لومړنیو خدماتو ته بشپړ لاسرسی نه لري. پاکو اوبو او خواړو ته لاسرسی نه لري. که شخړه دوام ولري، کیدای شي نور خلک هم دلته پناه راوړي».
د ناروې د کډوالو شورا پر نړۍوالو مرستندویه بنسټونو غږ کړی، چې د یادو بېځایه شویو کسانو د بنسټیزو اړتیاوو د پوره کولو لپاره بېړنۍ بشري ملاتړ چمتو کړي.
یادې شورا ویلي، چې له بېځایه شویو کورنیو سره د بشري مرستو ځنډ بشري ناروین رامنځته کړی.
دا په داسې حال کې ده، چې د پاکستاني ځواکونو لهخوا د کونړ، ننګرهار، پکتیا او خوست ولایتونو پر ځینو سیمو د هاوان بریدونه دوام لري، چې له امله یې ګڼو کورنیو خپلې اصلي مینې پریښي دي.
