په بلوچستان کې په درېیو جلا پېښو کې څلور کسان وژل شوي او درې نور ټپیان دي
د بلوچستان ایالت په مرکزي ښار کې په بېلابېلو پېښو کې څلور کسان وژل شوي او درې نور ټپيان دي. د ځایي پولیسو په وینا؛ په لومړۍ پېښه کې د کوېټې سول لاینز د پولیسو حوزې په سیمه کې یو مړی موندل شوی، چې ورسره پر یوې پرتې پاڼې تحریک طالبان پاکستان لیکل شوي.
بل لور ته په کچلاغ او هزاره ټاون سیمو کې هم دوه مړي موندل شوي. پولیس وايي، دوی په یادو پېښو کې د ښکېلو کسانو د نیولو لپاره د ښار په بېلابېلو سیمو کې څېړنې او عملیات پیل کړي دي.
همدا راز د کویټې ختیځ بای پاس او پښتوناباد سیمه کې ناپېژاندو وسلهوالو د اوبو پر درېیو برمو ډزې کړې، چې له امله یې یو کس وژل شوی او درې نور ټپيان دي. د وژل شوي کس کورنۍ د کویټې ښار پرېس کلب دفتر مخې ته د وژل شوي کس له مړي سره احتجاج وکړ او غوښتنه يې وکړه، چې په پېښه کې ښکېل کسان دې ژر تر ژره ونیول شي.
