په کراچۍ او کویټې کې د سختو ورښتونو له امله ۱۳ کسان مړه شوي دي

یوازې د سند ایالت په کراچۍ ښار کې د سختو ورښتونو او تیزو بادونو له امله ۶ کسان مړه او ۳ نور ټپیان شوي دي. د کراچۍ په صدر، ملېر، شمالي ناظم‌اباد، اولډ سټي اېریا، اورنګي ټاون، ګلشن معمار او نارت کراچۍ په ګډون په بېلابېلو سیمو کې د سختو ورښتونو له امله د دغه ښار لوی سړکونه تر اوبو لاندې شوي چې ټرافیکي چارې یې ګډوډې کړې دي.

بل لور ته په بلوچستان کې د ناورينونو مدیریت اداره وايي، چې د دغه ایالت په بېلابېلو ولسوالیو کې د سختو ورښتونو او تیزو بادونو له امله اووه کسان مړه او څلور نور ټپیان شوي دي.
د یادې ادارې په وینا؛ د یادو ورښتونو له کبله د بلوچستان کوهلو، لورلايي، جعفراباد، کیچ، کچهي، هرنايي کې ۱۲۰ کورونه په بشپړه توګه ویجاړ شوي دي.