په پکتیا او خوست ولایتونو کې د وروستیو سېلابونو او اورښتونو له امله د دوه مېرمنو په ګډون ۵ کسانو ته مرګژوبله اوښتې ده. په خوست کې ۳۰ جریبه کرنیزې ځمګې حاصلات له منځه تللې، ۶۵ کورونه او ۸۰ جریبه ځمکه وېجاړ شوې او په پکتیا کې بیا ۲۴ کورونه وېجاړ شوي او ۳۰ څاروي تلف شوي دي.
د طالبانو د خوست او پکتیا ولایتونو والیانو رسنیز دفترونو نن جمعې ورځ، د وري پر ۱۴مه په اېکس پاڼو کې لیکلي، چې د یادو ولایتونو په یو شمیر سیمو کې وروستیو سختو اورښتونو او سېلابونو ځايي خلکو ته مالي او ځاني زیانونه اړولي دی.
په دغو ولایتونو کې د وروستیو سختو اورښتونو او سېلابونو له امله د دوو ښځو په ګډون ۵ کسانو ته مرګژوبله اوښتې ده.
د لومړنیو معلوماتو پر بنسټ، تر دې مهاله د یادو پېښو له امله د پکتیا ولایت په مرکز کې یو تن مړ شوی او په جانيخېلو او وزې ځدراڼ ولسوالیو کې دوه تنه ټپیان شوي دي.
همدارنګه په پکتیکا کې د طالبانو د والي رسنیز دفتر ویلي، چې اړوند ادارې په زیانمنو سیمو کې د متوجې ګواښونو د مخنیوي لپاره چمتو حالت کې دي او هڅې روانې دي، څو زیانمنو ته پر وخت لازمې اسانتیاوې برابرې شي.
