د روغتیا نړۍوال سازمان: د منځني ختیځ جګړو روغتیایي وضعیت کړکېچن کړی دی
د روغتیا نړۍوال سازمان خبرداری ورکړی، چې په منځني ختیځ کې روانو جګړو او تاوتریخوالو په ټوله سیمه کې «جدي او مخ پر زیاتېدونکي» روغتیایي خطرونه رامنځته کړي دي.
د دغه سازمان سیمهییزې مشرې ټینګار کړی، چې د جګړې دوام د روغتیایي خدماتو سیستمونه له پاشل کېدو سره مخ کړي دي.
د ختیځې مدیترانې لپاره د روغتیا نړۍوال سازمان سیمهییزې مشرې حنان بلخي ویلي، چې د جګړو له امله روغتیایي مرکزونه سخت زیانمن شوي، ګڼ شمېر روغتونونه ویجاړ شوي او یا هم د درملو او طبي تجهیزاتو له جدي کمښت سره مخ دي.
نوموړې زیاته کړې:« جبري بېځایه کېدل، د پاکو اوبو نشتوالی او د حفظالصحې خراب وضعیت په سیمه کې د ساري ناروغیو د خپرېدو خطر خورا زیات کړی دی. په دې ناوړه وضعیت کې ماشومان، ښځې او سپینږیري تر ټولو ډېر زیانمن شوي دي».
حنان بلخي له نړیوالې ټولنې وغوښتل چې د بشري مرستو د خوندي رسولو او د روغتیایي خدماتو د ملاتړ لپاره بېړني اقدامات وکړي.
په ورته وخت کې، روغتیا نړیوال سازمان له ټولو ښکېلو خواوو غوښتنه وکړه چې بشري اصولو ته درناوی وکړي او روغتیایي مرکزونه، کارکوونکي او ناروغان له هر ډول بریدونو خوندي وساتي.
