د طالبانو د کډوالو ستونزو ته د رسېدنې کمېسیون وايي، نن شنبه (د وري ۱۵مه) هم لږ تر لږه ۲۸۴ افغان کورنۍ او تر ۲۲۰۰ زیات کسان له ګاونډیو هېوادونو او په ځانګړې توګه له پاکستان او ایران څخه په جبري ډول افغانستان ته راستانه کړل شوي دي.
د یاد کمېسیون د دارالانشاء د ورځني راپور لهمخې، دغه کډوال د هېواد له بېلابېلو لارو په جبري توګه بېرته ستانه کړل شوي او په بېلابېلو برخو کې ورته خدمات وړاندې شوي دي.
د راپور پر بنسټ، د ننګرهار د تورخم له لارې ۱۶۴ کورنۍ چې ۹۴۱ غړي لري، هېواد ته راستنې او ثبت او بایومټریک شوې دي. همداراز ۳۰۵ نورې کورنۍ چې ۱۶۸۵ کسان پهکې شامل دي، ننګرهار، کونړ، لغمان او کابل ولایتونو ته لېږدول شوي دي.
په راپور کې راغلي، په کندهار کې د سپین بولدک له لارې ۹۲ کورنۍ له ۵۲۳ غړو سره بېرته راستنې شوې دي. دغه راز، ۵۳ نورې کورنۍ چې ۲۸۶ کسان پهکې شامل دي، بېلابېلو ولایتونو ته لېږدول شوي.
همدا راز، د نیمروز د ورېښمو له لارې ۲۳ کورنۍ چې ۹۰ غړي لري او همداراز ۳۱۱ نور مسافر هم له همدې لارې هېواد ته داخل شوي دي.
بل پلو، په هرات کې د اسلام کلا له لارې هم ۵ کورنۍ چې ۲۰ کسان پهکې شامل دي، بېرته هېواد ته ستنې شوې دي.
د کمېسیون په وینا، ټولو راستنو شویو کډوالو ته د ثبت، لېږد، مالي مرستو او لنډمهاله مېشتېدو اسانتیاوې برابرې شوې دي.
دا په داسې حال کې ده، چې په وروستیو میاشتو کې له ګاونډیو هېوادونو او په ځانګړې توګه له پاکستان او ایران څخه د افغان کډوالو د جبري ایستنې لړۍ چټکه شوې او هره ورځ سلګونه کورنۍ بېرته افغانستان ته ستنول کېږي.
