ټېلګراف: له چین نه ایران ته د سوډیم پرکلورایټ پنځه بار وړونکې بېړۍ تللې دي
د ټېلګراف ورځپاڼې تازه څېړنې ښيي، چې له چین نه ایران ته د توغندیو د جامدو سون توکو (سوډیم پرکلورایټ) پنځه سترې بار وړونکې بېړۍ لېږدول شوې دي. دغه بېړۍ چې تر بندیزونو لاندې هم دي، د جګړې له پیل راهیسې د دغه هېواد د بندرونو پر لور روانې شوې دي.
د ټېلګراف په وینا؛ دغه بېړیو د چین له ګاولان بندر څخه چې د کیمیاوي توکو د زېرمه کولو له سترو ترمینلونو څخه ګڼل کېږي، حرکت کړی او له دې ډلې تراوسه څلور هغه یې د ایران بندرونو ته رسېدلې دي.
د دغه راپور پر بنسټ؛ یادو بېړیو په دومره کچه سوډیم پرکلورایټ بار کړي، چې د سلګونه بالستیک توغندیو د جوړولو لپاره بسنه کوي. ټېلګراف لیکلي، څلور بېړۍ چې هامونا، برزین، شابدیس او رایان نومېږي، ټولې د وري له دویمې راهیسې د ایران بندرونو ته داخلې شوې او په منځني ډول یې درې اوونۍ په سمندر کې تېرې کړې دي.
پنځمه بېړۍ چې زردیس نومېږي، داسې ښکاري چې د ایران اوبو ته نږدې شوې ده.
