د ترکیې د کورنیو چارو وزارت اعلان کړی، چې د روان زېږدیز کال له پیل راهیسې د دغه هېواد په بېلابېلو سیمو کې د ۹زرو افغانانو په ګډون له ۳۰زرو ډېر بېاسناده کډوال نیول شوي دي. د شمېرو لهمخې؛ له ۲۰۲۱کال راهیسې په دغه هېواد کې د نیول شویو افغان کډوالو شمېر له ۳۷۰زرو اوړي.
د یاد وزارت د معلوماتو پر بنسټ؛ له ۲۰۲۱کال راهیسې په ټوله ترکیه کې له یو مېلیون او ۱۱۰زره ډېر بېاسناده کډوال نیول شوي، چې تر ټولو زیات شمېر یې افغانان دي. پر افغانانو سربېره د سوریې، ازبکستان، ترکمنستان، ایران، عراق او مصر وګړي په ترتیب سره په دغه هېواد کې د نیول شویو پناهغوښتونکو د نوملړ په سر کې ځای لري.
دا په داسې حال کې ده، چې ترکیې تېر زېږدیز کال له ۴۴زرو ډېر بېاسناده افغان کډوال نیولي وو.
د ترکیې سربېره، ایران او پاکستان هم له هغو هېوادونو شمېرل کېږي، چې تر ټولو ډېر بېاسناده افغانان پهکې مېشت دي. دغه هېوادونو هم له تېرو دوو کلونو راهیسې په پراخه کچه د افغان کډوالو اېستل پیل کړي او دغه لړۍ لاهم روانه ده.
د یادونې وړ ده، چې د طالبانو د کډوالو او بېرته راستنېدونکو چارو وزارت ویلي، په تېر ۱۴۰۴کال کې له ایران، پاکستان او ترکیې نه ۳ مېلیونه، ۱۱۴زره او ۱۰۷ کسان په جبري او خپله خوښه بېرته خپل هېواد ته ستانه شوي دي. په دې شمېر کې ډېری یې په جبري توګه اېستل شوي دي.
د کډوالۍ نړۍوال سازمان بیا څو ورځې مخکې راپور ورکړ، چې په ۲۰۲۵کال کې د اسیا-پاسفیک هېوادونو له ۲زره او ۷۰۰ څخه زیات کسان د کډوالۍ لارو په اوږدو کې مړه او یاهم تري تم شوي دي. د یاد سازمان په وینا؛ تر ۱۳۰۰ ډېر افغانان د افغانستان او ایران پر خطرناکو ځمکنیو لارو مړه شوي دي.
دغه سازمان د یوه راپور په خپرولو سره ویلي، چې په ۲۰۲۵کال کې د اسیا-پاسیفیک هېوادونو ترمنځ د کډوالو مړینه او تري تم کېدل په ټوله نړۍ کې یوه جدي اندېښنه وه. په راپور کې راغلي، دا درېیم پرلهپسې کال دی چې دغه شمېر تر ۲زرو اوښتی دی.
د یاد سازمان د څېړنو لهمخې؛ له هرو لسو پېښو څخه ۹ د مړینې او ورکېدو پېښې په اسیا- پاسیفیک سیمه کې رامنځ ته شوې، چې په ډېرو هغو کې د افغانستان او میانمار خلک شامل دي. راپور زیاتوي، چې له ۱۳۰۰ زیات افغانان د افغانستان او ایران پر خطرناکو ځمکنیو لارو کې مړه شوي دي.
