د ملګرو ملتونو د ماشومانو ملاتړ صندوق (یونېسف) خبرداری ورکړی، چې په افغانستان کې خلک له پراخو بشري ناورینونو سره مخ دي او دغه بنسټ په ۲۰۲۶کال کې د ۱۲ مېلیونه کسانو لپاره چې ۶.۵ مېلیونه یې ماشومان دي؛ د اړتیاوو پوره کولو لپاره ۹۵۰ مېلیون ډالرو بشري بودجې ته اړتیا لري.
یادې ادارې د جمعې په ورځ (د وري ۱۴مه) د یوې خبرپاڼې په خپرولو سره ویلي، چې د افغانستان خلک لاهم له پرلهپسې ناورینونو لکه طبیعي پېښو، کمزوري اقتصاد، بنسټیزو خدمتونو ته له محدود لاسرسي او د اقلیمي بدلونونو له ناوړه اغېزو سره لاس او ګرېوان دي او دا هغه ننګونې دي، چې د خلکو ژوند یې له سختو فشارونو سره مخ کړی دی.
د خبرپاڼې لهمخې: «د خوندیتوب ناورین ورځ تر بلې ژورېږي او له امله یې ماشومان، ځوانان، محرومې ډلې او مېندواره ښځې له مخ پر زیاتېدونکو ګواښونو سره مخ دي. څومره چې وضعیت خرابېږي، هغومره د اړینو خدمتونو د دوام او د تر ټولو زیانمنو کسانو د ساتنې لپاره د یونېسف پرلهپسې حضور حیاتي ارزښت خپلوي».
د یونېسف په خبرپاڼه کې راغلي، چې یاده اداره په بېړني ډول ۹۴۹.۱ مېلیون ډالرو ته اړتیا لري؛ څو په افغانستان کې د ۶.۵ مېلیونه ماشومانو په ګډون ۱۲ مېلیونه کسانو ته ژغورونکې مرستې او لومړني خدمتونه ورسوي. د دوی په خبره؛ دغه پانګونه به نه یوازې بېړنۍ بشري اړتیاوې پوره کړي، بلکې د ټولنو اوږدمهاله زغم او مقاومت به هم پیاوړی کړي.
یونېسف وایي: «دغه ملاتړ حیاتي ارزښت لري؛ څو ډاډ ترلاسه شي چې په افغانستان کې هر ماشوم د ژوندي پاتې کېدو، خوندي ژوند او سالمې ودې فرصت لري».
دغه بنسټ د خپل راپور په یوه برخه کې ټینګار کړی، چې د نجونو پر زدهکړو او د ښځو پر کار لګول شویو محدودیتونو وضعیت نور هم پېچلی کړی او د راتلونکو نسلونو پر برخلیک به ناوړه اغېز وکړي.
له دې سره اوچا بیا ویلي و، د افغانستان روان وضعیت ته په کتو نږدې ۲۲.۹ مېلیونه کسان چې د افغانستان نږدې نیمایي برخه جوړوي د ژوندي پاتې کېدو لپاره بېړنیو بشري مرستو ته اړتیا لري. دغه حالت د نړۍوالو مرستندویه بنسټونو لپاره یوه ستره ننګونه بلل شوې ده.
د ملګرو ملتونو بشري ادارو په وار-وار ویلي، چې افغانستان لا هم د څلور لسیزو جګړو، بېثباتۍ او طبیعي پېښو له ناوړه اغېزو نهدی وتلی او د دوی په وینا؛ روان وضعیت د خلکو پر ژوند، اقتصاد، عامه خدماتو او ټولنیز ثبات خورا ژور سیوری غوړولی دی.
