روسيې د ایران له بوشهر اټومي بټۍ څخه خپل ۱۹۸ کارکوونکي واېستل
روسي رسنیو راپور ورکړی چې د روسیې دولتي اټومي شرکت «روس اټوم» د شنبې په ورځ د ایران له بوشهر اټومي بټۍ څخه خپل ۱۹۸ نور کارکوونکي وایستل. د روسي کارکوونکو د ایستلو دا لړۍ پر ایران د امریکا او اسراییل له بریدونو وروسته پیل شوې ده.
د روسي رسنیو د راپورونو له مخې، یاد دولتي شرکت په ایران کې د جګړې له پیل راهیسې د بوشهر له اټومي بټۍ څخه د خپلو کارکوونکو پر ایستلو بوخت دی. د روسیې د دولتي اټومي شرکت رییس الکسي لیخاچیوف د وضعیت په اړه ویلي: «د بوشهر اټومي بټۍ په شاوخوا کې روان حالات بد لور ته روان دي.»
روسیې له بوشهر اټومي بټۍ څخه خپل کارکوونکي وروسته له هغه وایستل، چې تېره شپه یادې بټۍ ته نږدې په یوه چاوده کې د بټۍ یو ایرانی ساتونکی ووژل شو او یوې ودانۍ ته یې هم زیان واوښت. روس اټوم تایید کړې چې د سیمې امنیتي وضعیت د دوی د کارکوونکو د ایستلو اصلي لامل دی او دا لړۍ به لا هم دوام ولري.
