الجزیره: په ایران کې د نسکورې شوې امریکایي الوتکې دویم پیلوټ هم موندل شوی

د دغه چارواکي په وینا؛ یاد پوځي لا هم د ایران له خاورې نه‌دی اېستل شوی او د نښتو د دوام له امله له ګواښ سره مخ دی. هغه ټینګار کړی، چې امریکایي ژغورونکې ډلې باید دغه کس په بریالیتوب سره له ایران نه وباسي؛ ترڅو عملیات په بشپړ ډول پای ته ورسېږي.
د راپور پر بنسټ؛ د دغه پوځي د موندلو پر مهال د ژغورنې عملیات له سختې جګړې سره مل وو او امنیتي وضعیت لاهم نامشخص دی. امریکایي چارواکي دا هم ویلي، چې په نظامي اصطلاحاتو کې د «Airman» کلمه لزوماً د نارینه په معنا نه‌ده او د دغه کس جنسیت لا نه‌دی څرګند شوی.
الجزیرې د خپلو سرچینو له قوله راپور ورکړی، چې دغه عملیات لاهم دوام لري او تر هغه وخته چې یاد سرتېری په بشپړ ډول له ایران نه ونه اېستل شي؛ د هغه او په عملیاتو کې د شاملو ځواکونو ژوند به له ګواښ سره مخ وي.