د طالبانو هواپوهنې ادارې په ۳۳ ولایتونو کې د ورښتونو او سېلابونو راوتلو اټکل کړی
د طالبانو د هوايي چلند وزارت اړوند د هواپوهنې ادارې د وري پر ۱۷مه د هېواد په ۳۳ ولايتونو کې د سختو ورښتونو، تالندې برېښنا، تېزو بادونو او سېلابونو د راوتلو اټکل کړی.
د طالبانو د هوايي چلند وزارت اړوند د هواپوهنې ادارې د وري پر ۱۷مه د هېواد په ۳۳ ولايتونو کې د سختو ورښتونو، تالندې برېښنا، تېزو بادونو او سېلابونو د راوتلو اټکل کړی.
د یادې ادارې د معلوماتو له مخې، جوزجان، سرپل، فاریاب، بادغیس، هرات، فراه، غور، نیمروز، هلمند، کندهار، ارزګان، زابل، دایکندي، بامیان، غزني، میدان وردګ، لوګر، پکتیکا، پکتیا، خوست، ننګرهار، کونړ، لغمان، کاپیسا، کابل، پروان، پنجشیر، بغلان، سمنګان، بلخ، کندوز، تخار او بدخشان هغه ولايتونه دي چې د سالنګونو په ګډون پکې د باران کچه له لسو تر پنځوسو ملي مترو پورې اټکل شوې ده.
همدارنګه راپورونه ښيي چې په مرکزي، لوېديزو، سوېلي او شمالي ولايتونو کې د سالنګونو په ګډون د تېزو بادونو د الوتلو احتمال هم شته چې چټکتیا يې په بېلابېلو سيمو کې له پنځوسو تر سلو کيلو مترو په ساعت پورې رسېدای شي.
د یادې ادارې په وینا، په لوړو او يخو سيمو کې د درنې واورې او سختو يخو شرایطو اټکل هم شوی دی.
ددې ادارې چارواکو له هېوادوالو غوښتي چې د ورښتونو پر مهال له سيندونو او هغو سيمو څخه چې د سېلابونو له خطر سره مخ دي، ځانونه لرې وساتي او جدي احتياط وکړي.
همدارنګه له موټر چلوونکو نه په سيلابي او خطرناکو لارو کې له تګ راتګ څخه د ډډې کولو غوښتنه شوې،چې د یادې ادارې په وینا، د احتمالي زيانونو مخه ونيول شي.
