د طالبانو د ټولګټو وزارت وايي، چې د کابل–جلالاباد لویه لار د تنګي غارو په سیمه کې د غرښوېدنې له امله لا هم د موټرو پرمخ تړلې ده. یاد وزارت وايي، چې لار یې په لومړي پړاو کې پاکه کړه، خو ماسپښین یوځل بیا له غره نه کاڼي رالوېدلي دي.
د طالبانو د ټولګټو وزارت د یکشنبې په ورځ وویل، چې د کابل – جلال اباد لویه لار غرمه ۱۲ بجې یوځل بیا له غره نه د کاڼو د را ښویېدو له امله بنده شوې ده.
د یاد وزارت ویاند اشرف حق شناس ویلي، چې اوس هم له غره نه ډبرې را ښوییږي او له همدې امله، لار لا هم د هر ډول ترافیکو پرمخ بشپړه تړلې پاتې ده.
د طالبانو چارواکي له مسافرو او موټر چلوونکو غوښتنه کوي چې تر بلې خبرتیا پورې پر دې لاره له تګ راتګه ډډه وکړي.
