په کابل کې د ایران سفارت د افغانستان له سېلابځپلو کورنیو سره خواخوږي څرګنده کړه
په کابل کې د ایران سفارت د افغانستان په بېلابېلو ولایتونو کې د سېلابونو له امله د خلکو پر مړینې او ټپي کېدو خواشیني څرګنده کړې او له زیانمنو کورنیو او پاتې کسانو سره یې خپله خواخوږي ښودلې ده.
د طالبانو تر واک لاندې د پېښو پر وړاندې د مبارزې او چمتووالي ادارې ویلي، چې په تېرو لسو ورځو کې د طبیعي پېښو له امله سلګونه کورونه او زرګونه جریبه کرنیزې ځمکې ترڅنګ سلګونه کیلومتره سړکونه هم ویجاړ شوي دي.
د یادې ادارې په خبره؛ د هېواد په بېلابېلو ولایتونو کې د روانې میاشتې له شپږمې تر ۱۵مې نېټې پورې د سختو بارانونو، سېلابونو او نورو طبیعي پېښو په پایله کې ۷۷ کسان مړه او ۱۳۷ نور ټپیان شوي دي.
