د خیبر پښتونخوا حکومت د برېښنا د سپما لپاره مرکزي بازارونه او سوداګریز فعالیتونه محدودوي
د خیبر پښتونخوا ولایتي حکومت په یوه خبرپاڼه کې امر کړی، چې په ولایتي کچه دې مرکزي بازارونه، سوداګریزې پلازې او د شپې لهخوا کېدونکي تجارتي فعالیتونه له اتو تر لسو بجو پورې محدود او وتړل شي. د دې اقدام موخه د برېښنا سپما او په ښاري نظم کې د ښه والي راوستل ښودل شوي دي.
همدارنګه، ټاکل شوې ده چې په نورو ولسوالیو کې به بازارونه او نور سوداګریز مرکزونه د شپې په اتو بجو وتړل شي.
په خبرپاڼه کې ویل شوي، چې ټول هوټلونه او د خوراک څښاک ځایونه باید د شپې په لسو بجو وتړل شي. دغه راز امر شوی، چې په سالونونو کې د واده مراسم او نورې دولتي او شخصي غونډې هم باید د شپې تر لسو بجو پورې پای ته ورسېږي.
د بلوچستان د کورنیو چارو وزارت لهخوا په خپره شوې خبرپاڼه کې راغلي، چې په ایالت کې به ټول سوداګریز مرکزونه او مارکېټونه د شپې تر اتو بجو پورې وتړل شي. په دې پرېکړه کې یوازې درملتونونو او نانوایانو ته استثنا ورکړل شوې او اجازه لري چې خلاص وي.
