د طالبانو د سرحدونو، قومونو او قبایلو چارو وزیر په لغمان کې یوې جوړې شوې غونډې ته د وینا پر مهال پر افغانستان د پاکستان بریدونو او د طالبانو له لوري هغه هېواد ته ځوابي بریدونو ته په اشارې وویل، هېچا، ان خپله پاکستان هم دا تصور نه کاوه چې طالبان به د دوی د بریدونو ځواب ورکړي.
نورالله نوري د یکشنبې په ورځ (د وري ۱۶مه) زیاته کړه، که څه هم د نړۍ ټول امکانات له پاکستان سره وو، خو بیا هم طالبانو د دغه هېواد بریدونو ته غاښ ماتونکی ځواب ورکړ.
یاد طالب چارواکی وایي، طالبان د هېواد ټولو پولو ته متوجه دي او په تېرو کلونو کې یې دومره چمتووالی نیولی، چې د پاکستان د هر ډول تېري په صورت کې تر اسلاماباده پورې د ځواب ورکولو وړتیا لري.
نوموړي تېر شل کلن جمهوریت «غلام» وباله او ویې ویل: «په افغانستان کې شل کاله هر څه وو، خو غلامي وه او پاکستان ته چا کتلی هم نهشو».
د سرحدونو، قومونو او قبایلو چارو وزیر نورالله نوري په خپلو خبرو کې دغه راز وویل، افغانستان اوس د داسې امنیت درلودونکی دی چې د نړۍ په ډېرو هېوادونو کې یې بېلګه نه لیدل کېږي. نوموړي د افغانانو یووالی او عقیدوي پیاوړتیا د نظام د بقا اصلي ځواک وباله او له ولسه یې وغوښتل، چې د پردیو تبلیغاتو ته له پاملرنې پرته واقعیتونه په سمه توګه درک کړي.
نوموړی دغه څرګندونې په داسې حال کې کوي، چې په وروستیو میاشتو کې د افغانستان او پاکستان ترمنځ اړیکې ترینګلې شوې دي او دواړو لوریو په سرحدي سیمو کې پر یو بل بریدونه کړي دي.
تر دې وړاندې ځینو سرچینو تایید کړې وه، چې پاکستاني پوځ د څو قول اردوګانو په ګډون د بګرام هوايي اډه او په کندهار کې د طالبانو د ځانګړو ځواکونو مرکز هم بمبار کړی دی.
طالبانو تېره ورځ ادعا وکړه، چې د پاکستان په وروستیو بریدونو کې شاوخوا ۷۶۱ ملکیان وژل شوي او ۶۵۰ نور ټپیان دي. د طالبانو په خبرپاڼه کې ویل شوي، چې د کب له ۴مې د وري تر ۱۶مې د پاکستاني پوځ د کابل، کندهار، پکتیکا، پکتیا او ننګرهار په ګډون نهه ولایتونه بمبار کړي، چې ډېری زیانونه یې ملکیانو ته اړولي دي.
بلخوا، د پاکستان د اطلاعاتو وزیر عطاالله تارړ بیا ادعا کړې چې د پاکستاني ځواکونو او طالبانو ترمنځ د نښتو له پیل راهیسې تر دې دمه ۷۹۹ طالب جنګیالي وژل شوي او لږ تر لږه ۱۰۳۴ نور ټپیان دي.
