د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ (د وري ۱۶مه) ۴۲۹ کډوالې کورنۍ چې ټولټال ۲۲۴۱ کسان کېږي، له ایران او پاکستان څخه افغانستان ته ستنې شوې دي.
د دغه کمېسیون د راپور لهمخې، یاد شمېر کډوال د ننګرهار د تورخم، د کندهار د سپین بولدک، د هرات د اسلامکلا او د نیمروز د ورېښمو پله له لارې ستانه شوي دي.
راپور زیاتوي، چې له یادو کورنیو څخه ۳۱۸ کورنۍ چې شمېر یې ۱۷۲۷ کسان وو، د تورخم له لارې، ۴۶ کورنۍ چې شمېر یې ۲۶۱ کسان وو، د سپین بولدک له لارې، ۳۵ کورنۍ چې شمېر یې ۱۳۸ کسان وو، د ورېښمو پله له لارې او ۳۰ کورنۍ چې غړي یې ۱۱۵ کسان وو، د اسلامکلا له لارې افغانستان ته ستنې شوې دي.
د دغه کمېسیون د معلوماتو پر بنسټ، راستنو شویو کورنیو ته اړینې مرستې هم ورکړل شوي او کمېسیون په ۱۴۱۳ کورنیو استوګنیزې نمرې وېشلي دي، چې له دې سره تر اوسه پورې ټولو ۸۲۶۵ راستنو شویو کورنیو ته نمري وېشل شوي دي.
دا په داسې حال کې ده، چې افغان کډوال له پاکستان څخه د وتلو پر مهال له ګڼو ستونزو سره مخ دي. پرون د لنډي کوتل پنډ غالي مخې ته هغو افغان کډوالو لاریون وکړ، چې په دغه کمپ کې د تورخم له لارې افغانستان ته د تګ په تمه دي. د هغوی په وینا، دوی په کمپ کې د اسانتیاوو د کمښت او بېنظمه اداري پروسو پر وړاندې د اعتراض په موخه لاریون کړی و.
