د بلوچستان د کورنیو چارو وزیر: د افغان طالبانو او ټي ټي پي ترمنځ هراړخیزه همکاري شتون لري
د بلوچستان ایالت د کورنیو چارو وزیر، ضیا لانګو یو ځل بیا ادعا کړې چې د افغان طالبانو او ټي ټي پي ترمنځ همکاري شتون لري او د افغانستان خاوره د پاکستان پر ضد کارېږي.
لانګو دا څرګندونې د یکشنبې په ورځ له نورو چارواکو سره په یوې ګډې خبري ناسته کې وکړې او د خپلو ادعاوو د ثبوت په توګه یې د یوه نیول شوي ځوان ویډیو هم وړاندې کړه. په ویډیو کې یو کس چې ځان «حبیب الله» معرفي کوي، وایي چې د پکتیکا اوسېدونکی دی او ورور یې د ټي ټي پي قوماندان دی. نوموړي ویلي چې په کچلاک سیمه کې نیول شوی دی.
پاکستاني چارواکو ادعا کړې چې دغه کس له افغان طالبانو سره اړیکې لري او اوس د ټي ټي پي برخه دی. دوی دا هم ویلي چې په بلوچستان کې د ناامنۍ تر شا ګډې شبکې فعالیت کوي.
بل لور ته، د بلوچستان چارواکو د افغان کډوالو د ایستلو بهیر ته هم اشاره کړې او ویلي یې دي چې تر اوسه شاوخوا نهه سوهاو ۶۰زره «غیرقانوني» افغان کډوال له دغه ایالته ایستل شوي، خو ځینې بېرته راستانه شوي دي. د دوی په وینا، یوازې په یوه ورځ کې ۱۱۰۰افغانان نیول شوي دي.
ضیا لانګو ټینګار کړی چې د پاکستان د مرکزي حکومت د پالیسۍ له مخې، افغان کډوال باید په خپله خوښه او «په عزت» خپل هېواد ته ستانه شي، خو که دا کار ونه کړي، نو حکومت به د قانون له مخې د دوی د ایستلو اقدام وکړي.
