بلوچستان کې ځايي ادارو افغان کډوالو ته د کورونو او هټیو په کرایه ورکولو بندیز ولګاوه
د بلوچستان ځايي ادارو عامو خلکو ته امر کړی، چې د خپلو کرایهدارانو هویت وڅېړي، څو ډاډ ترلاسه شي چې هغوی افغان کډوال نه دي.
د بلوچستان ځايي ادارو عامو خلکو ته امر کړی، چې د خپلو کرایهدارانو هویت وڅېړي، څو ډاډ ترلاسه شي چې هغوی افغان کډوال نه دي.
د بلوچستان ایالت د کلا عبدالله، لورالايي او چاغۍ ولسوالیو مرستیال کمشنرانو جلا - جلا خبرپاڼو کې خلکو ته ویلي، چې خپل کورونه او هټۍ افغان کډوالو ته په کرایه ورنهکړي او له هغوی سره له هر ډول همکارۍ ډډه وکړي.
د خبرپاڼو لهمخې، د دې امر سرغړونه قانوني جرم ګڼل شوی او له سرغړوونکو سره به قانوني چلند وشي.
په یادو خبرپاڼو کې ویل شوي، چې د پاکستان او بلوچستان امنیتي وضعیت ته په کتو هغه افغان کډوال چې قانوني اسناد نهلري، غېرقانوني ګڼل شوي او د اېستلو پرېکړه یې شوې ده.
د بلوچستان ځايي ادارو همداراز ویلي، هر هغه پاکستانی وګړی چې د غېرقانوني افغان کډوالو په اړه معلومات لري، باید سمدستي یې د پېژندنې لپاره د ولسوالیو چارواکو ته وسپاري او د دغو معلوماتو ورکوونکي ته به انعام ورکړل شي او هویت به یې هم پټ وساتل شي.
په خبرپاڼو کې خبرداری ورکړل شوی، که د پلټنو پر مهال کوم غېرقانوني افغان کډوال ونیول شي، نو د اړوند کور او هټۍ د مالک پر وړاندې به سخت قانوني چلند وشي.
د یادونې وړ ده، چې تېره ورځ د بلوچستان ایالت د کورنیو چارو سکرټر حمزه شفقات په یوه خبري ناسته کې وویل، تر اوسه یې ۹ لکه او ۶۹ زره افغان کډوال له دغه ایالت څخه اېستلي دي.
دا په داسې حال کې ده، چې په جلاوطنۍ کې د افغانستان د خلکو شورا ویلي چې په پاکستان کې افغان کډوال له «غېرانساني» چلند سره مخ دي او د نړۍوالې ټولنې چوپتیا یې «له ظلم سره هملاسي» بللې ده.
د دغه شورا په خپره شوې اعلامیه کې راغلي، چې افغان کډوال په پاکستان کې له خپلو بنسټیزو بشري حقونو لکه امنیت او د خوښې له حق څخه بېبرخې دي او یوازې د کډوالۍ له امله له سخت او نامناسب چلند سره مخامخ کېږي.
له طالبانو سره د پاکستان د کړکېچونو له زیاتېدو وروسته، دغه هېواد د افغان کډوالو د اېستلو لړۍ په بېساري ډول چټکه کړې او ورته مهال یې په بېلابېلو ښارونو کې لسګونه نور افغانان هم نیولي دي.
