اورشلیمپوسټ: د ایران پر ضد د اسراییل او امریکا د احتمالي برید 'ستراتیژیکې موخې' وټاکل شوې
اورشلیم پوسټ ورځپاڼې راپور ورکړی، چې اسراییل او امریکا له پرلهپسې خبرو اترو وروسته په ایران کې د ستراتیژیکو موخو یو نوملړ وروستی کړی دی. د راپور لهمخې، که تهران د ډونالډ ټرمپ له ټاکلي ضربالاجل سره مخالفت وکړي، دغه موخې به د درنو بریدونو لاندې راشي.
دوو باخبره سرچینو دغې ورځپاڼې ته ویلي، دا هوکړه د دې لپاره شوې چې د ایران د تهاجمي سیاستونو پر وړاندې د واشنګټن او تلابیب غبرګونونه په بشپړه توګه همغږي شي. د نښه شویو اهدافو د وروستي نوملړ له ټاکلو سربېره، د دواړو هېوادونو د پوځونو ترمنځ عملیاتي همغږي هم وروستي پړاو ته رسېدلې ده.
د راپور پر بنسټ، د دغه ګډ عملیاتي پلان جزییات تېره پنجشنبه په هغه غونډه کې وروستي شول، چې د اسراییل د پوځ لوی درستیز ایال زمیر او د امریکا د مرکزي قوماندانۍ (سنټکام) ترمنځ ترسره شوه.
په دې غونډه کې د دواړو هېوادونو لوړپوړو پوځي چارواکو د دندو د وېش او د دقیقو ماموریتونو پر ټاکلو هوکړه وکړه، څو هغه مهال عملي شي کله چې ټرمپ د ورکړل شوي ضربالاجل پای اعلان کړي. ټرمپ مخکې خبرداری ورکړی و، چې ایران باید د سېشنبې تر شپې پورې د هرمز تنګی بېرته پرانیزي، که نه نو د دغه هېواد مهمې زېربناوې به د بریدونو هدف وګرځي.
