د طالبانو مرستیال ویاند حمدالله فطرت وايی، چې په زابل، سمنګان، کندوز او سرپل ولایتونو کې یې ۱۴۳۰ راستنو شویو کډوالو ته د سرپناه لپاره ځمکې ورکړې دي. نوموړي زیاته کړې، چې تر دې مهال یې ۸۲۶۵ راستنو شویو کورنیو ته د استوکنې لپاره ځمکې ورکړې دي.
فطرت د دوشنبې په ورځ (د وري ۱۷مه) ویلي، چې یادې ډلې راستنو شویو کډوالو کورنیو ته د دایمي مېشتېدنې په موخه د ځمکو د ورکړې لړۍ پیل کړې ده. نوموړي زیاته کړې، چې په زابل کې ۲۲۴، په سمنګان کې ۱۵۰، په کندوز کې ۹۳۴ او په سرپل ولایت کې ۱۰۵ راستنو شویو کډوالو ته د سرپناه لپاره ځمکې ورکړل شوې دي.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي، خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي چې بېرته پر ناقانونه لارو له هېواده ووځي.
طالبان دغه څرګندونې داسې مهال کوي، چې په تېرو څلورو کلونو کې له درېیو هېوادونو څه باندې ۷ مېلیونه افغانان هېواد ته ستانه شوي دي.
