د افغان کډوالو د جبري ستنولو دوام؛ په کوهاټ کمپ کې افغانانو ته ۲۴ ساعته ضرب‌الاجل ټاکل شوی

د کوهاټ د سیمه‌ییزې ادارې په وینا، دغو کډوالو ته یوازې یوه ورځ وخت ورکړل شوی او که دا امر ونه‌مني، کورونه به یې د چارواکو له لوري ونړول شي او دوی به په جبري توګه وشړل شي.

دا په داسې حال کې ده، چې له پاکستان څخه د افغان کډوالو د جبري ستنولو په اړه نړۍوالو بنسټونو په وار وار نیوکې کړې دي او د انساني کرامت او نړۍوالو قوانینو په پام کې نیولو سره یې غوښتنه کړې، چې افغان کډوال باید په سمه توګه خپل هېواد ته ستانه کړل شي.

له بلې خوا، ډېری هغه افغانان چې شاوخوا ۳۰ تر ۴۰ کلونو راهیسې په پاکستان کې مېشت دي او کاروبارونه لري، وايي چې دوی په لنډ وخت کې نه‌شي کولای خپل ټول مالي او سوداګریز معاملات تصفیه کړي، چې په دې صورت کې د دوی ځینې مالونه او پیسې له‌منځه تللی شي.

دا پرېکړه په داسې حال کې شوې ده، چې تر دې وړاندې هم له پاکستان څخه په ډلییزه توګه افغان کډوال اېستل شوي دي.

د راپورونو پربنسټ، په تېرو څلورو کلونو کې د پاکستان په ګډون د سیمې له درېیو هېوادونو څه باندې ۷ مېلیونه افغانان هېواد ته ستانه شوي دي.