د پاکستان ملي شورا کې د اپوزیسیون مشر محمود خان اڅکزي د شورا په غونډه کې ویلي چې افغانستان یو خپلواک هېواد دی او د پاکستان د «پنځم ولایت» په توګه یې یادول نه د ده او نه د پاکستان د هېڅ پښتون لپاره د منلو وړ دي او دوی به د دې ډول نظر مخالفت ته دوام ورکړي.
اڅکزي وویل چې ځینې کړۍ لا هم هڅه کوي افغانستان د پاکستان د پنځم ولایت په سترګه وګوري، خو ټینګار یې وکړ چې دی او د هغه ګوند د دې فکر په کلکه مخالفت کوي.
هغه ادعا وکړه چې د پاکستان پخواني ولسمشر غلام اسحاق خان یو وخت د بودیجې د بحث پر مهال له مشاهد حسین سید څخه پوښتنه کړې وه چې ایا د افغانستان لپاره په بودیجه کې پیسې ځانګړې شوې دي که نه.
اڅکزي وویل چې وروسته دا موضوع مشاهد حسین له ده سره هم شریکه کړې وه او د هغه په وینا مشاهد حسین لومړی ویلي وو چې ښايي دا یې «ژبنۍ تېروتنه» وي، خو وروسته غلام اسحاق خان ويلي وو: «له نن وروسته به افغانستان ته د پاکستان د پنځم ولایت حیثیت ورکړو.»
هغه زیاته کړه چې دا موضوع باید له مشاهد حسین څخه وپوښتل شي ځکه هغه ژوندی دی او وضاحت کولی شي.
اڅکزي بیا ټینګار وکړ: «افغانستان یو خپلواک هېواد دی. تاسې څنګه کولی شئ هغه د پاکستان پنځم ولایت وبولئ؟»
هغه همداراز وویل چې افغانستان، هند او چین د پاکستان ګاونډیان دي او ګاونډیان نه بدلېږي، نو پاکستان باید له خپلو ټولو ګاونډیو هېوادونو سره د درناوي او متقابل تفاهم پر بنسټ اړیکې وساتي
