د طالبانو عدلیې وزارت خبر ورکړی، چې د ځمکو د غصب مخنیوي او د غصب شویو ځمکو د بېرته راګرځولو کمېسیون لهخوا په سرپل ولایت کې د څړځایونو تر ارزونې وروسته درې مېلیونه، ۹۴۴زره او ۵۶۵ جریبه عامه څړځایونه تثبیت او د ځمکو په بانک کې ثبت شوي دي.
د یاد کمېسیون په وینا؛ دغه عامه څړځایونه د سرپل ولایت په مرکز او ولسوالیو کې موقعیت لري او د ټاکل شوي پلاوي له مخې تر سروې او ارزونې وروسته تثبیت شوي دي. د ورکړل شویو معلوماتو له مخې؛ د ټولو تثبیت شویو څړځایونو ۸۹ سلنه چې نږدې ۳.۵ مېلیون جریبه کېږي، لاهم په خپل طبیعي حالت پاتې دي؛ خو پاتې ۱۱ سلنه چې له ۴۵۰زره جریبو څخه زیاتې ځمکې جوړوي، له طبیعي حالت څخه وتلي او د خلکو لهخوا په للمي او اوبیزو کرنیزو ځمکو، استوګنیزو کورونو، عامه تاسیساتو او نور د ګټې اخیستنې پر ځایونو بدلې شوې دي.
یاد کمېسیون د ځمکو د غصب مخنیوي او د غصب شویو ځمکو د بېرته راګرځولو قانون د ۱۳مې مادې پر بنسټ ټینګار کړی، چې پر عامه څړځایونو هر ډول تېری، په کرنیزو ځمکو د هغوی بدلول، د استوګنځایونو جوړول او هر ډول بله ناقانونه تصرف پهکې منع دی.
کمېسیون زیاته کړې، د څړځایونو د سروې او تشخیص پلاوی موظف شوی؛ څو د هغو څړځایونو لپاره چې له خپل طبیعي حالت څخه وتلي، مناسب قانوني حللارې ومومي.
د کمېسیون په وینا؛ د هېواد په نورو ولایتونو کې هم د عامه څړځایونو د سروې او تثبیت بهیر روان دی او له بشپړېدو وروسته به ټول تثبیت شوي څړځایونه د ځمکو په بانک کې ثبت شي.
