په هرات کې د طالبانو امنیه قوماندانۍ وایي، د یوه قتل د قضیې په تړاو یې درې کسان نیولي دي. د یادې قوماندانۍ ویاند سید مسعود حسیني ویلي، تورنو کسانو قرباني کس ته په شړمبو کې د خوب ګولۍ اچولې وې او تر بېهوښه کېدو وروسته یې د موټر او نورو شتمنیو لپاره وژلی دی.
د سید مسعود حسیني په وینا، طالب ځواکونو له پلټنو وروسته د قرباني د ښخولو ځای وموند او لومړی یې یو شکمن ونیو. هغه زیاته کړه، دوه نور شکمن کسان، چې غوښتل یې د نیمروز ولایت له لارې له افغانستان څخه ووځي، هم ونیول شول او بېرته هرات ته لېږدول شوي دي.
په وروستیو میاشتو کې په هرات ولایت کې د قتل پېښې زیاتې شوې دي.
همدا راز په یوه بله تازه پېښه کې، باوري سرچینو افغانستان انټرنشنل ته ویلي، ۲۵ کلن احمد شېرزاد دوه شپې وړاندې د هرات په زندان کې وژل شوی دی.
د سرچینو په وینا، نوموړی په چاقو برید کې ټپي شو او بیا د ژورو ټپونو له امله یې ساه ورکړې ده.
په هرات کې طالب چارواکو د دې پېښې په اړه افغانستان انټرنشنل ته څه ونه ویل، خو څرګنده یې کړه، چې دا موضوع په کابل کې د زندانونو چارو سمون ادارې پورې اړه لري او دغې ادارې لا تر اوسه په دې تړاو څه وضاحت نهدی ورکړی.
