د خیبر پښتونخوا د پېښور ښار د فقیراباد سیمې اقبال پلازې ته نږدې د ناپېژانده موټرسایکل سپرو په ډزو کې د افغان نرښځې په ګډون دوه نرښځې ټپیانې شوې دي. ځایي پولیسو ویلي، په ټپیانو کې افغان نرښځې مسکان او ځایي نرښځې نیلم شامله ده.
د پولیسو په وینا؛ دواړه ټپیانې د درملنې لپاره د لېډي رېډنګ روغتون ته لېږدول شوې دي. ځایي چارواکي وایي، بریدګر له برید وروسته له سیمې تښتېدلي او د هغوی د نیولو لپاره عملیات روان دي.
پولیسو د برید د انګېزې او نورو جزییاتو معلومولو لپاره هم پلټنې پیل کړې دي. تر دې وړاندې مسکان له افغانستان انټرنشنل پښتو سره په مرکه کې ویلي و، افغانستان ته ستنېدل د هغې او نورو افغان نرښځو لپاره د زورزیاتي او دردناک مرګ معنا لري.
مسکان ویلي و: «زموږ لپاره خپل هېواد هم راته پردی ښکاري. دلته په پېښور کې هم د ژوند کړۍ تنګه ده؛ خو غوره ده خپلې ستونزې دلته وزغمو، تر دې چې هلته د تشدد او ذلت ډک مرګ ومنو».
د هغې په وینا؛ په افغانستان کې د ښځو او نرښځو لپاره د ژوند شرایط خورا سخت شوي او د نرښځو لپاره هلته د خوندي ژوند هېڅ زمینه نهده برابره. مسکان همداراز ویلي و، که څه هم په پاکستان کې افغان نرښځې له ناامنۍ او ګڼو ستونزو سره مخ دي؛ خو افغانستان ته ستنېدل د ژوند پر ځای د دردناک مرګ انتخاب ګڼي.
