د طالبانو د رييسالوزرا اداري مرستیال عبدالسلام حنفي د ختیځې مدیترانې لپاره د روغتیا نړیوال سازمان د مشرې ډاکترې حنان حسن بلخي په مشرۍ مل پلاوي سره په کتنه له هغې غوښتي، چې د روغتیایي مسایلو په تړاو په جوړېدونکو نړیوالو غونډو کې دې طالبانو ته هم د ګډون بلنه ورکړي.
ارګ ماڼۍ د یکشنبې په ورځ (د چنګاښ ۱۴مه) د یوې خبرپاڼې په خپرولو سره ویلي، په دې کتنه کې د بیل او ملینډا ګېټس د نړیوال پراختیایي بنسټ رييس کریسټوفر الیاس او د روغتیا نړیوال سازمان او یونیسف یو شمېر نورو مسوولینو او همداراز په کابل کې د قطر دولت سفیر هم حضور درلود.
د خبرپاڼې لهمخې، عبدالسلام حنفي د غونډې له ګډونوالو څخه وغوښتل، چې سیاسي او روغتیايي مسایل له یو بل سره شریک نه کړي او د روغتیایي مسایلو په تړاو په جوړېدونکو نړیوالو کنفرانسونو کې د طالبانو پلاویو ته هم د ګډون بلنه ورکړي.
نوموړي همداراز څرګنده کړه، چې په تېرو درېیو کلونو کې له ګاونډیو هیوادونو نږدې ۵ میلیونه افغان کډوال بېرته هېواد ته ستنول شوي او په وینا یې: «هغوی ته د کاري فرصتونو رامنځته کول اړینه چاره ده او په دې برخو کې هراړخیزې همکاري ته اړتیا لرو».
ډاکترې حنان حسن بلخي په افغانستان کې د پولیو په تړاو وویل، که ورسره همکاري وشي، نو په راتلونکي کال کې به په افغانستان کې د پولیسو ویروس په بشپړډول لهمنځه یوسي او همداراز یې زیاته کړه: «که د پولیو د محوې لپاره همغږي زیاته شي، توقع شته چې په راتلونکو ۱۲ میاشتو کې په افغانستان کې پولیو ویروس په بشپړ ډول لهمنځه یوسو».
ډاکترې حنان حسن بلخي په ټول افغانستان کې ناروغانو ته د لا غوره روغتیایي خدمتونو وړاندې کول مهم وبلل او په دې برخه کې یې د روغتیا نړیوال سازمان او ملاتړو بنسټونو لخوا د همکارۍ ډاډ ورکړ.
په خبرپاڼه کې راغلي، چې د افغانستان لپاره د قطر سفیر مردف بن علي القاشوطي او د بېل او ملینډا ګېټس، یونیسف او د روغتیا نړیوال سازمان نورو مسوولینو په خپلو خبرو کې د افغانستان له روغتیایي سکټور سره له خپلو مرستو او همکاریو ډاډ ورکړ.
