د روغتیا نړۍوال سازمان د سیمهییز دفتر مشرې حنان بلخي ویلي، د بودجې د سخت کمښت له امله د ۲۰۲۶کال له جنورۍ راهیسې په افغانستان کې د بشري مرستو له لوري ملاتړ کېدونکي شاوخوا ۱۵۰ روغتیايي مرکزونه تړل شوي او یا یې هم فعالیت ځنډول شوی دی.
نوموړې چې د پولیو د څار بورډ له پلاوي سره افغانستان ته په خپل څلورم سفر کې کندهار ته تللې ویلي، چې د میرویس روغتون له ډاکټرانو، روغتیاپالو او روغتیايي کارکوونکو سره یې لیدلي او د هغوی د خدمتونو ستاینه یې کړې ده.
د هغې په وینا؛ دغه روغتیايي کارکوونکي له ګڼو ستونزو سره، سره هره ورځ خلکو ته د ژوند ژغورونکي روغتیايي خدمتونه وړاندې کوي. د روغتیا نړۍوال سازمان د سیمې مشر ویلي، دامهال په افغانستان کې له ۲۲ مېلیونه ډېر کسان بشري مرستو ته اړتیا لري، چې له دې ډلې ۱۴ اعشاریه ۴ مېلیونه کسان روغتیايي خدمتونو ته اړتیا لري.
هغې خبرداری ورکړی، چې د روغتیايي مرکزونو تړل کېدل د ماشومانو د واکسین، د مېندو د خوندي روغتیايي خدمتونو او د ناروغانو د اساسي درملنې پر بهیر ناوړه اغېز کړی دی. د نوموړې په وینا؛ د ۲۰۲۶کال د روغتیايي سکټور د غبرګون پلان لپاره ۱۹۰ اعشاریه ۸ مېلیونه امریکايي ډالرو ته اړتیا ده، خو د جون تر پایه یوازې ۱۷ سلنه بودجه برابره شوې ده.
هغې ټینګار کړی، چې د افغانستان د روغتیايي خدمتونو دوام، د ترلاسه شویو پرمختګونو د ساتنې او اړمنو خلکو ته د مرستو رسولو لپاره دوامداره نړۍوال مالي ملاتړ اړین دی.
