د بریتانیا د ترهګرۍ ضد پولیسو ویلي، د ملي امنیت اړوند دوسیو شمېر د تېر کال پرتله شاوخوا ۵۰ سلنه زیات شوی او د دوی د فعالیتونو یوه برخه د هغو دولتونو د فعالیتونو د مخنیوي لپاره ځانګړې شوې چې بریتانیا یې د امنیت لپاره ګواښ ګڼي. په دې لړ کې د روسیې، چین او ایران نومونه یاد شوي دي.
د ایران په اړه، د ترهګرۍ ضد پولیسو او د بریتانیا کورني امنیتي ادارې ویلي چې د خپلو سرچینو مهمه برخه د هغو هڅو د شنډولو لپاره کاروي چې ایران یې په بریتانیا کې د خپلو مخالفانو د په نښه کولو لپاره ترسره کوي.
د پولیسو د معلوماتو له مخې، د ۲۰۲۵ کال له پیل راهیسې تر اوسه پورې له ایران سره تړلې له ۲۰ څخه زیاتې طرحې او امنیتي دوسیې شنډې یا درول شوې دي. په دغو دوسیو کې د وژنې پلانونه، تښتونې، فزیکي ګواښونه او د نیابتي کسانو کارول شامل دي.
د ایران انټرنشنل خبریال پوریا زراعتي د برید په دوسیه کې هم پولیسو یو ځل بیا ټینګار وکړ چې محکمې منلې ده دغه برید د ایران په سپارښتنه ترسره شوی و، او همدې موضوع د بریدګرو لپاره د سختو سزاوو په ټاکلو کې اغېز لرلی دی.
د ترهګرۍ ضد پولیسو دا هم ویلي چې اوس مهال شاوخوا ۸۰۰ فعالې ترهګرۍ پورې تړلې دوسیې تر څېړنې لاندې دي.
د کورنیو ګواښونو په اړه، پولیسو ویلي چې لا هم دوه اساسي ګواښونه پر خپل ځای پاتې دي: «اسلامپاله ترهګري او افراطیت، او همدارنګه ښي اړخي افراطیت.»
