د بورې ډېر مصرف د زړه ناروغیو، شکرې او چاغښت لامل کېدای شي
د روغتیا نړیوال سازمان وایي، بوره د انسان د بدن لپاره د انرژۍ مهمه سرچینه ده، خو د ازادې بورې زیات مصرف د چاغښت، د دوهم ډول شکرې، د زړه ناروغیو او د غاښونو د خرابوالي خطر زیاتوي. کارپوهان سپارښتنه کوي چې د بورې مصرف دې په اعتدال کې وساتل شي.
د روغتیا نړیوال سازمان د معلوماتو له مخې، بوره په طبیعي ډول په مېوو، سبزیو او شیدو کې هم موندل کېږي، خو هغه بوره چې د خوړو او څښاک د تولید پر مهال ورزیاتېږي، د «ازادې بورې» په نوم یادیږي او د زیات مصرف په اړه یې خبرداری ورکړل شوی دی.
د راپور له مخې، د بورې مناسب مصرف د بدن او دماغ لپاره انرژي برابروي، خو دوامداره او ډېر استعمال یې د چاغښت، د دوهم ډول شکرې، د زړه او رګونو ناروغیو او د غاښونو د خرابېدو خطر زیاتوي.
د روغتیا نړیوال سازمان سپارښتنه کوي چې د ازادې بورې ورځنی مصرف باید د انسان د ټولې ورځې د انرژۍ له لس سلنې کم وي، او که تر پنځو سلنې پورې راکم شي، لا ډېرې روغتیايي ګټې لري.
د یوه عادي بالغ انسان لپاره دا شاوخوا ۲۵ تر ۵۰ ګرامه، یا نږدې ۶ تر ۱۲ کاچوغو پورې لازمه ده.
روغتیايي کارپوهان خلکو ته سپارښتنه کوي چې د خوږو مشروباتو او پروسس شویو خوړو پر ځای له مېوو، سبزیو او نورو طبیعي خوړو څخه ګټه واخلي، څو د بورې د زیات مصرف له زیانونو ځان وساتي.
