د سعودي عربستان خبري اژانس راپور ورکړی، چې د دغه هېواد د بهرنیو چارو وزیر فیصل بن فرحان بن عبدالله د ټېلیفون له لارې له خپلو قطري او مصري سیالانو سره په سیمه کې د کړکېچ د راکمولو پر لارو چارو خبرې کړې دي.
د دغه راپور پر بنسټ، د دغو درېیو هېوادونو د بهرنیو چارو وزیرانو د وروستیو پرمختګونو او د هغو هڅو د ملاتړ پر لارو چارو خبرې کړي، چې موخه یې په سیمه کې د کړکېچ کمول او د ډیپلوماټیکو حللارو پیاوړي کول دي.
راپور زیاتوي، په دې سره به په فارس خلیج او سره سمندرګي کې د سمندري لارو امنیت او خوندیتوب او همداراز د سیمې امنیت او ثبات تضمین شي.
د جرمني پلازمېنه برلین کې د همجنسپالو د کلني جشن پر مهال یو موټر پر ګډونوالو ختلی، چې له امله یې ګڼو کسانو ته مرګژوبله اوښتې ده. د برلین پولیسو د شنبې په ماښام اعلان وکړ، چې د دغې پېښې له امله د برلین د همجنسپالو کلنی جشن یا «کریستوفر سټریټ ډې» له وخته مخکې پای ته ورسېد.
د برلین پولیسو د شنبې ورځې په ناوخته (د زمري ۳مه) په خپله اېکسپاڼه ویلي، چې د دغه ښار په مرکزي بڼ «تیرګارتن» کې چې برانډنبورګ دروازې ته نږدې دی، یو موټر څو تنه وهلي او دوی له بېړنیو خدماتو سره یو ځای سیمې ته رسېدلي دي.
پولیسو په خپل بیان کې ویلي: «موږ د مشکوکو کسانو د موندلو لپاره په جدي توګه پلټنې پیل کړې دي».
د لومړنیو راپورونو لهمخې، په دغې پېښه کې تر اوسه لږ تر لږه یو کس وژل شوی او ۱۴ نور ټپيان دي، خو لا هم د ټپیانو دقیق شمېر او د هغوی د ټپونو د څرنګوالي په اړه وروستي جزییات نهدي په ډاګه شوي، خو بېړني طبي ټیمونه په سیمه کې د ټپیانو پر درملنه بوخت دي.
د دغې پېښې له رامنځته کېدو وړاندې، لسګونه زره کسان د جرمني په پلازمېنه کې د اروپا د همجنسپالو د یو تر ټولو لوی کلني جشن د نمانځلو لپاره په سولهییزه توګه راټول شوي وو. د عیني شاهدانو په وینا، دغه موټر په لوړ سرعت پر خلکو ورغلی او له پېښې وروسته بریدګر په پښو تښتېدلی دی.
د جرمني پولیسو او امنیتي ځواکونو د پېښې ځای د څېړنو لپاره تړلی او د تښتېدلي بریدګر د نیولو لپاره یې په سیمه کې پراخ چاڼیز عملیات پیل کړي دي.
د برلین چارواکو له خلکو غوښتي، چې له سیمې لرې پاتې شي، څو بېړني ځواکونه وکولای شي خپل کارونه په سمه توګه پرمخ یوسي.
د امریکا ولسمشر ډونالډ ټرمپ ویلي، تر هغې به له سعودي عربستان سره د ملکي اټومي همکاریو هوکړه عملي نهکړي، څو چې ریاض د ابراهيمي تړون له لارې له اسرايیل سره خپلې اړیکې عادي نهکړي.
د رويټرز خبري اژانس په راپور کې راغلي، چې ټرمپ د جمعې په ورځ ویلي، سعودي عربستان باید د ابراهيمي تړون غړی شي، څو له امریکا سره د ملکي اټومي همکاریو هوکړه بشپړه او بیا عملي شي.
د امریکا د انرژۍ وزارت د تېرې چهارشنبې په ورځ اعلان کړی وو، چې د دغه هېواد د انرژۍ وزیر کریس رایټ او د سعودي عربستان له انرژۍ وزیر شهزاده عبدالعزیز بن سلمان سره د سعودي د لومړنیو سوداګریزو اټومي بټیو د جوړولو په اړه یوه هوکړه لاسلیک کړې ده. د وزارت په وینا، دغه هوکړه به د ارزونې لپاره کانګرس ته واستول شي.
ټرمپ ویلي، له خپلې لومړۍ ولسمشرۍ دورې راهیسې یې هڅه کړې، چې له سعودي عربستان سره د اټومي همکاریو هوکړه وکړي.
په راپور کې زیاته شوې، د امریکا مخکیني ولسمشر جو بایډن هم د ورته هوکړې ملاتړ کاوه او غوښتل یې دا موضوع له ابراهيمي تړون او د سعودي او اسرايیل د اړیکو له عادي کېدو سره وتړي.
خو سعودي عربستان تر اوسه له ابراهیمي تړون سره نهدی یو ځای شوی. ریاض وايي، تر هغې چې د فلسطین د خپلواک دولت د جوړېدو لپاره نه ستنېدونکې او عملي لاره رامنځته نهشي، اسرايیل به په رسمیت ونهپېژني.
سعودي عربستان تر اوسه د ټرمپ د دې نوي شرط په اړه رسمي غبرګون نهدی ښودلی.
ټرمپ وویل، باور لري چې سعودي عربستان به په پای کې له ابراهیمي تړون سره یو ځای شي او د ملکي اټومي پروګرام د پراختیا هوکړه به هم عملي شي.
د اوکراين ولسمشر ولادیمیر زیلېنسکي د شنبې په ورځ وويل، روسيه غواړي د اوکراين په جګړه کې د ګډون لپاره د شمالي کوريا ۳۰ زره نور سرتېري وګوماري. هغه همدارنګه وويل، شمالي کوريا روسيې ته د بالستيکي توغنديو د نويو توغندي غورځوونکو د لېږلو لپاره هم چمتووالی نيسي.
د روسيې او شمالي کوريا ترمنځ د متقابل دفاعي تړون له مخې، شمالي کوريا په ۲۰۲۴ کال کې شاوخوا ۱۴ زره سرتېري د روسيې کورسک سيمې ته ولېږل، څو په دغې سيمه کې د اوکرايني ځواکونو د پراخو پرمختګونو پر وړاندې له روسي ځواکونو سره مرسته وکړي.
زیلېنسکي په خپل ويډيويي پيغام کې وويل: «موږ د روسيې او شمالي کوريا ترمنځ همکاري هم ګورو. روسيه غواړي د دې جګړې لپاره د شمالي کوريا ۳۰زره نور سرتېري راولي».
هغه زياته کړه: «د جون له مياشتې راهيسې د روسيې په ورونېژ سيمه کې د دغو ځواکونو د منلو لپاره چمتووالی پيل شوی دی».
زیلېنسکي خبرداری ورکړ او ويې ويل: «دا ګواښ يوازې اوکراين ته نهدی متوجه. روسيه له شمالي کوريا سره مرسته کوي، چې د جګړې لارې چارې زده کړي، خپلې وسلې لا پرمختللې کړي او د جګړې په ډګر کې د هغو د کارولو عملي تجربه ترلاسه کړي».
هغه زياته کړه: «دا ټول پرمختګونه د اسيا د هغو ټولو هېوادونو لپاره ګواښ دی، چې د شمالي کوريا د توغنديو د واټن په محدوده کې راځي».
د اوکراين ولسمشر د خپلو خبرو په پای کې ټينګار وکړ، چې هېواد به يې دې ګواښ ته مناسب ځواب ورکړي.
د اوکراین په زاپوریژیا سیمه کې د روسي ځواکونو تر کنټرول لاندې پر یوه تفریحي کمپ د ډرون برید له امله د پنځو ماشومانو په ګډون ۱۲ کسان ووژل شول. روسي چارواکو ویلي، چې په دغه برید کې ۱۹ نور کسان هم ټپیان شوي دي.
روسي چارواکو اوکراین تورن کړی، چې په دغې سیمه کې یې په قصدي ډول ملکي وګړي په نښه کړي، خو کېیف تر اوسه د دې برید په اړه کومه تبصره نهده کړې.
د زاپوریژیا لپاره د روسیې له لوري ګومارل شوي والي یوګیني بالیتسکي وویل، دا برید د ازوف سمندر په ساحل کې د میلیتپول ښار ته نږدې په کیریلیوکا تفریحي سیمه کې شوی چې په پایله کې یې ۱۹ نور کسان هم ټپیان شوي دي.
د روسیې د بهرنیو چارو وزارت ویاندې ماریا زاخاروا وویل، اوکرایني ډرون الوتکو پر هغو خلکو برید کړی چې په کمپ کې ویده وو او دا کار یې یو «غیرانساني» جنایت بللی دی.
یوګیني بالیتسکي په خپل ټېلګرام کې لیکلي، چې د روسیې د بیړنیو پېښو وزارت کارکوونکو له کنډوالو څخه د یوه ماشوم په ګډون دوه ژوندي پاتې شوي کسان او د یوه بل کس جسد راېستلي او د ژغورنې عملیات پای ته رسېدلي دي. هغه زیاته کړه، دښمن په بشپړ ډول لیدل او پوهېدل چې څوک په نښه کوي او د کېیف چارواکي ټول اخلاقي نورمونه له پامه غورځوي او په قصدي ډول د ماشومانو په ګډون ملکي وګړي له منځه وړي.
د روسیې دولتي خبري اژانس ریا راپور ورکړی، چې د دغه هېواد تحقیقاتي کمېټې د دې برید په غبرګون کې د ترهګرۍ یوه قضیه پرانېستې ده. په خواله رسنیو کې د خپرو شویو ویډیوګانو له مخې، په دغه تفریحي کمپ کې ویجاړې شوې ودانۍ، سوځېدلي موټرونه او د لامبو حوض ته څېرمه د خاورو او ډبرو ډېرۍ لیدل کېږي.
د سوریې د روغتیا وزارت یوه چارواکي ویلي چې د دمشق او دیرالزور ترمنځ پر لویه لار د دوو مسافر وړونکو بسونو د ټکر له امله ۳۵ کسان مړه شوي او ۳۰ نور ټپیان دي. په دمشق کې چارواکو ویلي، چې یوه بس ددفاع وزارت سرتېري لېږدول.
د سوریې دولتي خبري اژانس سانا د کورنیو چارو وزارت له قوله راپور ورکړی چې په پېښه کې یو هغه بس شامل و چې د کورنیو امنیتي ځواکونو غړي یې لېږدول او بل ملکي مسافر وړونکی بس و.
د سانا د راپور له مخې، د سوریې د دفاع وزارت چورلکو د ټپیانو په ایستلو او د مړو شویو کسانو د جسدونو په انتقال کې مرسته کړې ده. ټپیان او جسدونه له تدمر هوايي ډګر څخه د حمص یوه پوځي روغتون ته لېږدول شوي دي.
د سوریې د بهرنیو چارو وزیر اسعد الشیباني د پېښې له امله د مړو شویو کسانو له کورنیو سره خواخوږي څرګنده کړې او ټپیانو ته یې د ژر روغېدو هیله کړې ده.