ملګري ملتونه: په اوکراین کې د روسیې تازه بریدونو کې تر ۱۷۰ ډېر ملکي وګړي وژل شوي

د پاکستان د بهرنیو چارو وزارت په خپره کړې خبرپاڼه کې ویلي چې اسلام‌اباد د سعودي عربستان له واکمنۍ، ځمکنۍ بشپړتیا، سولې او سوکالۍ څخه خپل پرېکنده او نه بدلیدونکی ملاتړ اعلانوي او زياته کړې یې ده پاکستان د خپل ورور هېواد سعودي عربستان ترڅنګ ولاړ دی.

پاکستان ویلي چې په سیمه کې د تلپاتې سولې، امنیت او ثبات د ټینګښت لپاره یې تل هڅې کړي او په راتلونکي کې به هم د هر ډول مثبتو ګامونو ملاتړ ته دوام ورکړي.

له دې وړاندې سعودي عربستان ويلي چې د دغه هېواد هوايي دفاعي ځواکونو څو بې پیلوټه الوتکې چې په ختیځ ولایت او ریاض کې یې د تېلو تاسیسات په نښه کول، تعقیب او ویجاړې کړې دي او د دې بریدونو پړه یې پر هغو ایراني پلوو ملېشو واچوله چې له عراقه فعالیت کوي.

د سعودي عربستان د دفاع وزارت ویاند تورن جنرال ترکي المالکي د دوشنبې په ورځ وویل چې د بریدونو دا هڅې په تېرو څو ساعتونو کې شوې دي او دا یې له عراقي خاورې څخه شوي ترهګریز بریدونه وبلل. المالکي وویل چې دغه پاچاهي د خپل امنیت، خلکو او حیاتي زیربناوو د دفاع مشروع حق لري او ټینګار یې وکړ چې سعودي عربستان په مناسب وخت او ځای کې د ځواب ورکولو حق ځان ته خوندي ساتي.

سینټکام ویلي، د ایران پر وړاندې د سمندري بندیزونو د پلي کېدو د ډاډ ترلاسه کولو لپاره یې د څو سوداګریزو بېړیو پر تګ راتګ اقدامات کړي دي.

د سینټکام د فارسي څانګې په ایکس کې خپاره شوي پوسټ کې راغلي، د امریکا د سمندري ځواکونو د یو اېس اېس فرانک اې. پیټرسن جونیر (DDG-121) ویجاړوونکې بېړۍ یو سمندري سرتېری د ایران د سمندري بندیزونو د پلي کېدو د ملاتړ په موخه د څارنې دنده ترسره کوي.

سینټکام ادعا کړې چې د دغو بندیزونو د رعایت د یقیني کولو لپاره یې ۱۷ سوداګریزې بېړۍ بل مسیر ته اړولې، دوه بېړۍ یې له فعالیته ایستلې او دوه نورې یې هم توقیف کړې دي.

سینټکام د دغو بېړیو د هویت، د پېښو د ځای او یا هم د دې اقداماتو د دقیق وخت په اړه نور جزییات نه دي خپاره کړي.

د امریکا د بهرنیو چارو وزارت د فارسي څانګېله خوا د ټرمپ له قوله په ایکس خپور شوي پیغام کې راغلي، امریکا د ایران پوځي وړتیا تر ډېره له منځه وړې او همدا اقدام د دې لامل شوی چې ایران خبرو ته حاضر شي.

ټرمپ ویلي: «موږ د دوی پوځي وړتیا نږدې له منځه وړې ده. هغوی غواړي لیدنه وکړي او موږ هم ورسره په لیدنو او خبرو بوخت یو. ګورو چې څه پېښېږي. امکان شته چې یوې هوکړې ته ورسېږو.»

هغه زیاته کړې: «که هغه اقدام چې موږ ترسره کړ نه وای، ایران به هېڅکله هم له موږ سره خبرو ته نه کېناسته.»

د امریکا ولسمشر د احتمالي هوکړې د جزییاتو په اړه نور معلومات نه دي ورکړي، خو څرګندونو یې ښودلې چې واشنګټن د پوځي فشار ترڅنګ د ډیپلوماټیکو خبرو دوام هم تعقیبوي.

د ټرمپ دا څرګندونې داسې مهال کېږي چې د واشنګټن او تهران اړیکې لا هم له کړکېچ سره مخ دي او دواړه هېوادونه د امنیتي او اټومي مسایلو په ګډون پر څو مهمو موضوعاتو اختلافات لري.

د ټورنټو پولیسو ویلي، د پېښې په تړاو د سپین رنګ هونډا اکارډ موټر لټه کوي چې نمبر پلېټ نه لري. پولیسو زیاته کړې چې په دې پېښه کې هېڅوک نه دي ټپیان شوي او د برید د عامل یا عاملانو انګېزه لا هم نه ده روښانه شوې.

د ټورنټو ښاروال دغه پېښه «یو زړور برید» بللی او ویلي یې دي چې د کاناډا د عامه امنیت له وزیر سره یې د ډزو د پېښو د مخنیوي او ښار ته د ناقانونه وسلو د ننوتلو د مخنیوي په اړه خبرې کړې دي.

دا په داسې حال کې ده چې د امریکا کونسلګرۍ په ټورنټو کې سږ کال د دویم ځل لپاره د ډزو له برید سره مخ کېږي، خو چارواکو تر اوسه د دواړو پېښو ترمنځ د احتمالي تړاو په اړه څه نه دي ویلي.

په هند کې فعالانو د دغه هېواد د لومړي وزیر نریندرا مودي حکومت د محصلانو د وروستیو اعتراضونو پر مهال د مصنوعي ځیرکتیا پر بنسټ د څارنې د کارولو له امله قانوني ننګولی دی.

د اعتراضونو یوه فعاله عایشه غوش د ډیلي له عالي محکمې غوښتي چې د اعتراض کوونکو ډله ییزه څارنه د اساسي قانون خلاف اعلان کړي، راټول شوي شخصي معلومات له منځه یوسي او د څارنیزې ټکنالوژۍ د کارولو لپاره لارښوونې جوړې کړي.

فعالان وايي، په هند کې د پولیسو له لوري د مخ پېژندنې ټکنالوژۍ د کارولو لپاره ځانګړی قانون نشته او د اعتراضونو پر مهال شوې څارنه له قانون څخه سرغړونه ده، خو حکومت وايي، دا اقدامات د عامه نظم او امنیت د ساتنې لپاره قانوني او د خلکو په ګټه وو.

ټاکل شوې د ډیلي عالي محکمه د سې شنبې په ورځ د دې قضیې اورېدنه بیا ترسره کړي.

دا قضیه وروسته له هغې راپورته شوه چې په هند کې د ازموینو د پوښتنپاڼو د افشا کېدو پر ضد د محصلانو پراخ لاریونونه وشول. دلاریونونو له پای ته رسېدو وروسته د هند د پوهنې وزیر درمندرا پردان استعفا وکړه او لومړي وزیر نریندرا مودي د ازموینو د نظام د اصلاح لپاره د یوه پلاوي د جوړېدو اعلان وکړ.