د ایران د ولسمشر د لومړي مرستیال په مشرۍ ددغه هېواد د ملي دهلېزونو د کمېټې په غونډه کې د ختیځ ـ لویدیځ دهلېز د سند عمومي طرحه، چې د هرات ـ مزارشریف د اوسپنې پټلۍ پروژې په محوریت ولاړه ده، تصویب شوې ده.
د ایران د ولسمشرۍ ماڼۍ د معلوماتو له مخې، محمدرضا عارف په دې غونډه کې د ترانسپورتي دهلېزونو پراختیا د خپل حکومت له مهمو ستراتیژیکو لومړیتوبونو وبلله او ویې ویل، چې د دهلېزونو ظرفیت لوړول او د خلیج ترڅنګ د وچو او شمالي بندرونو پراختیا به په سیمهییز ترانزیټ کې د ایران رول پیاوړی کړي.
عارف ویلي، چې حکومت یې په تېرو دوو کلونو کې د ترانسپورتي دهلېزونو د پراختیا په برخه کې اغیزناک ګامونه اخیستي او د ترانزیټي لارو پراخول یې اصلي لومړیتوبونه دي.
د نوموړي په وینا، د هرات ـ مزارشریف د اوسپنې پټلۍ په محور د ختیځ ـ لویدیځ دهلېز د سند تصویبولو هدف د نړیوال ترانزیټ په بازار کې د ایران ونډه زیاتول، جیو اقتصادي موقعیت پیاوړی کول، د سیمهییزې اقتصادي همکارۍ او پانګونې پراخول، له افغانستان او د لارې له نورو هېوادونو سره اقتصادي اړیکې پیاوړې کول او د ستراتیژیکو پروژو لپاره د نویو مالي سرچینو موندل دي.
په دې غونډه کې د ګمرکي چارو د اسانتیا، د توکو د مستقیم لېږد، د خالي کانتینرونو د بېرته ستنولو او موقتي داخلېدو، د ایران سویلي بندرونو د بدیلې استفادې او له ګاونډیو هېوادونو سره د ګډو پولو له لارې د ترانزیټ په اړه هم یو شمېر طرحې تصویب شوې دي.
د ایران د ولسمشر د لومړي مرستیال دفتر ویلي، چې د ختیځ ـ لویدیځ دهلېز پراخېدل به له افغانستان سره د اقتصادي اړیکو په پیاوړتیا او د سیمې په سوداګریزو اړیکو کې مهم رول ولري.
