د روسیې پوځ د اوکراین پر پلازمېنه کیف او شاوخوا سیمو د بالستیک توغندیو او بېپیلوټه الوتکو پراخ برید کړی، چې له امله یې لږترلږه ۱۰ کسان وژل شوي او لسګونه نور ټپیان دي. د اوکراین ولسمشر ولادیمیر زېلېنسکي ویلي، روسیې په دغه برید کې ۳۵ توغندي او ۱۸۵ ډرونونه کارولي دي.
زېلېنسکي ویلي، اوکراین یوازې یو بالستیک توغندی شنډ کړی؛ ځکه د امریکا د «پېټریاټ» هوايي دفاعي سیسټم لپاره د توغندیو زېرمې پای ته رسېدلې دي. د نوموړي په وینا؛ هره نوې جوپه دفاعي توغندي د خلکو ژوند ژغوري او د دغه توغندیو نشتوالی د ملکي تلفاتو د زیاتېدو لامل کېږي.
د اوکراین د لویې څارنوالۍ د معلوماتو له مخې؛ د کیف په اوو بېلابېلو ولسوالیو کې ودانیو، ښوونځيو، د لېتوانیا سفارت او نورو ملکي تاسیساتو ته زیان اوښتی دی. چارواکي وایي، د کیف په دارنېڅکي ولسوالۍ کې اووه کسان او د سولومیانسکي ولسوالۍ کې دوه نور وژل شوي او یو بل کس د کیف په شاوخوا سیمه کې وژل شوی دی.
د چارواکو په وینا؛ په ټپیانو کې څلور ماشومان هم شامل دي، چې د چاودنو له امله ژوبل شوي دي. بلخوا زېلېنسکي ویلي، اوکرایني ځواکونو د روسیې په باشکورتوستان سیمه کې د تېلو پر درېیو تصفیهخونو او نورو هغه تاسیساتو بریدونه کړي چې د مسکو د جګړې ملاتړ کوي.
د اوکراین د بهرنیو چارو وزیر اندري سیبیها یو وار بیا له نړۍوالو غوښتي، چې د اوکراین د هوايي دفاع پیاوړتیا لپاره بېړنۍ پوځي مرستې په ځانګړي ډول د «پېټریاټ» سیسټم توغندي برابر کړي.
