په افغانستان کې د برېتانیا د پخوانیو همکارانو د ځانګړو ځواکونو، د ځانګړو قطعاتو سرتېرو، افسرانو او د مليامنیت یوه ډله وايي، د «ترهګرۍ» پر وړاندې یې مبارزه کړې او اوس یوازې پرېښودل شوي دي. دغه ډله وايي، له څه باندې څلورو کلونو راهیسې له وېرې، انتظار او ناروښانه برخلیک سره مخ دي.
د برېتانیا د پخوانیو همکارانو د یادې ډلې شمېر چې شاوخوا زرو کسانو ته رسېږي او یو د بل سره په اړیکه کې دي زیاتوي، چې کلونه یې د «ترهګرۍ» پر وړاندې د مبارزې په لومړۍ کرښه او د نړۍوالو ماموریتونو د ملاتړ لپاره خدمت کړی دی.
په یاده ډله کې د پولیسو د پخوانیو ځانګړو قطعاتو: لکه اېټياېف ۳۳۳، اېټياېف ۴۴۴، سياراو ۲۲۲، اېټياېف ۵۵۵، ۸۸۸ او ۹۹۹ قطعاتو پخواني سرتېري او افسران، د افغانستان د ملي اردو ځانګړي ځواکونه، صفري او ځانګړي قطعات او د افغانستان د ملي امنیت پخواني کارکوونکي شامل دي.
د دوی په خبره، د برېتانیا پروګرام له لارې یې هره ورځ د همکارانو غوښتنلیکونه ردېږي. دوی د خپلو شخصي معلوماتو د امنیت په اړه اندېښنه ښودلې او زیاته کړې: «د هغو کسانو معلومات چې له برېتانیا او نړۍوالو ځواکونو سره د همکارۍ سابقه لري، عادي معلومات نهدي. د دغه معلوماتو افشا کېدل په افغانستان کې د یوه کس لپاره د پېژندل کېدو، ګواښ، نیولو، شکنجو او ان د وژلو په معنا تمامېدای شي».
برېتانیا هم هغه مهال منلې وه، چې د افغان همکارانو د لېږد او بیا مېشتېدو پروګرام او غوښتنلیکونو د افشا کېدو په یوه برخه کې ستونزه رامنځ ته شوې. په هغه پېښه کې د زرګونه غوښتونکو شخصي معلومات له ګواښ سره مخ شول.
د دغه ډلې ډېری غړي وايي، چې د خپلو معلوماتو د افشا کېدو له وېرې ان له خپلو کورونو څخه په ډاډه زړه بهر نهشي تلای. دوی زیاتوي: «زموږ ځینو کسانو خپل کار، عاید او عادي ژوند له لاسه ورکړی دی. زموږ کورنۍ هم له موږ سره په وېره او ناروښانه برخلیک کې ژوند کوي. دغه وضعیت د هغه کسانو لپاره د منلو وړ نهدی، چې کلونه یې د نړۍوالو ځواکونو او ادارو ترڅنګ خدمت کړی دی».
دوی له خبریالانو، د برېتانیا له پارلماني استازو، د بشري حقونو له سازمانونو او څارونکو ادارو غوښتنه کړې، چې غږ یې واوري او د دغه وضعیت په اړه څېړنه وکړي. یادې ډلې ټینګار کړی، چې له برېتانیا حکومت څخه کومه ځانګړې امتیازي معامله نه غواړي؛ بلکې یوازې ترې د دوسیو عادلانه او په جلا توګه څېړل غواړي.
