ایشین ایج ورځپاڼې په راپور کې ویل شوي، د تحریک طالبان پاکستان (ټي ټي پي) د فعالیتونو په اړه د افغانستان او پاکستان متقابلو تورونو د دواړو هېوادونو اړیکې له جدي کړکېچ سره مخ کړې دي.
اسلاماباد طالبان تورنوي چې تحریک طالبان پاکستان ته يې پناه ورکړې، خو کابل دا ادعاوې ردوي او پاکستان په ډيورنډ کرښه بریدونو او د افغانستان د حاکمیت د نقض په ترسره کولو تورنوي.
د راپور له مخې، د ۲۰۲۱ کال په اګست کې د طالبانو له بیا واکمنېدو وروسته په پاکستان کې د تحریک طالبان پاکستان بریدونه زیات شوي او اسلاماباد په وار وار ادعا کړې چې د دغې ډلې غړي د افغانستان له خاورې فعالیت کوي.
پاکستاني چارواکي وايي، کابل باید د ټي ټي پي پر ضد عملي او محسوس اقدامات وکړي او د افغانستان خاوره د پاکستان پر ضد د بریدونو لپاره ونه کارول شي.
خو د طالبانو حکومت دغه ادعاوې ردوي او ټینګار کوي چې د افغانستان خاوره به د هېڅ هېواد پر ضد ونه کارول شي.
راپور وايي، طالبانو په وار وار ویلي چې د پاکستان امنیتي ستونزې د هغه هېواد کورنۍ ستونزه ده.
د راپور په وینا، د متقابلو تورونو له امله په وروستیو کلونو کې د دواړو هېوادونو ترمنځ څو ځله پر ډيورنډ کرښه نښتې او پوځي عملیات هم شوي، چې د د دواړو غاړو اوسېدونکي یې اغېزمن کړي دي.
د راپور په وینا، د خیبرپښتونخوا، بلوچستان او د افغانستان ختیځ ولایتونو اوسېدونکو د ناامنۍ، بېځایه کېدو او اقتصادي زیانونو له امله تر ټولو ډېر زیان لیدلی دی.
راپور د ډیورنډ کرښه هم د تاریخي اختلاف یوه مهمه سرچینه بولي او وايي چې وسلهوالې ډلې له اوږدې مودې راهیسې د ډيورنډ کرښې ته څېرمه سیمو له جغرافیایي وضعیت څخه ګټه اخلي.
په راپور کې ویل شوي چې که څه هم افغان طالبان او تحریک طالبان پاکستان جلا ډلې دي، خو د دواړو ترمنځ تاریخي او ایډیولوژیکې اړیکې د کابل او اسلاماباد ترمنځ د اختلاف مهم ټکی پاتې شوی دی.
راپور ټینګار کوي چې یوازې پوځي اقدامات د ستونزې حل نه شي کېدای او د دواړو هېوادونو ترمنځ د باور جوړونې، د ډيورنډ په کرښه همغږۍ، استخباراتي همکاریو او مستقیمو خبرو اترو ته اړتیا ده، څو د تاوتریخوالي او متقابلو تورونو اوسنی کړکېچ کم شي.
