په تاجکستان کې د افغانستان د جمهوري نظام سفیر ظاهر اغبر دغه هېواد کې د سامانیان د عمومي تعلیماتو د ښوونځي د نوي تعلیمي کال د پیل مراسمو کې په افغانستان کې له زدهکړو د نجونو پر محرومیت له اندېښنې څرګندولو سربېره ټينګار وکړ، چې د افغانستان راتلونکی د ځوان نسل تعلیم پورې تړلی دی.
په تاجکستان کې د جمهوري نظام سفیر محمد ظاهر اغبر د جمعې په ورځ (د وږي ۲۰مه) د یوې خبرپاڼې په خپرولو سره په دغه هېواد کې د سامانیان د عمومي تعلیماتو ښوونځي د نوي تعلیمي کال له پيلېدو خبر ورکړ.
اغبر په همدې تړاو جوړو شویو مراسمو کې په افغانستان کې له شپږم ټولګي پورته له زدهکړو د میلیونونو نجونو زدهکوونکو پر محرومیت د اندېښنې په څرګندولو سره ټينګار وکړ: «د افغانستان راتلونکی د ځوان نسل ښوونې او روزنې پورې تړلی دی».
د سامانیان ښوونځی د تاجکستان په پلازمېنه «دوشنبه» کې د افغان کډوالو د ماشومانو لپاره یوازینی ښوونځی دی، چې ټول مسوولین او ښوونکي یې افغانان دي او همداراز ډېره برخه یې د ښځو له لوري مخته وړل کېږي.
د یاد ښوونځي د مسوولینو په وینا، په دغه ښوونځي کې د افغانستان د جمهوري نظام تعلیمي نصاب تدریسېږي او زدهکوونکو ته یې روسي ژبه هم ښودل کېږي.
ویل کېږي، د جمهوري نظام له سقوط مخکې د یاد ښوونځي د ودانۍ کرایه د افغانستان پوهنې وزارت ورکوله، خو د طالبانو په بیا واکمنېدو سره دغه مرستې بندې شوې او اوس په پلازمېنه دوشنبه کې د امریکا سفارت دغې کرایه ورکړې ته اوږه ورکړې ده.
طالبانو په افغانستان کې له بیا واکمنېدو سره سم، د خپلې واکمنۍ د لومړۍ دورې په څېر د نجونو د زدهکړو له دوام سره مخالفت پیل کړ او په لومړي سر کې یې نجونې زدهکوونکې له شپږم ټولګي پورته او بیا په پوهنتون کې له زدهکړو او په وروستي پړاو کې له طبي انسټيټیوټونو او کورسونو هم منع کړې.
په افغانستان کې د اروپايي ټولنې پخوانی ډېپلوماټ مایکل سمپل له افغانستان انټرنشنل سره په مرکه کې ویلي، که څه هم اوس مهال د القـاعدې شبکې غړي په افغانستان کې شته، خو دا ډله اوس له زوره لوېدلې او دومره لوی ګواښ نهدی. هغه زیاتوي، چې افغان طالبان اوس تر القـاعده شبکې لوی ګواښ دی.
په افغانستان کې د اروپايي ټولنې پخواني ډېپلوماټ مایکل سمپل د جمعې په ورځ (د وږي ۲۰مه) له افغانستان انټرنشنل سره په مرکه کې ویلي: «د اوس لپاره القاعده شبکه دومره توان نهلري چې امریکا یا هم اسراییل ته زیان ورسوي او د حمزه بن لادن تازه ویډیو هم د شک وړ ده او رېښتونې نهښکاري، بلکې د تبلیغاتو تر حده ده».
د سمپل په خبره، دا باید روښانه شي چې اوس وخت کې اصلي ګواښ څوک دي؟. د هغه په باور اوس مهال په افغانستان کې د القاعده شبکې عرب غړي ښايي تر ۱۰۰ کسانو ډېر نهوي او د افغان غړو او د منځنۍ اسیا د نورو اوسېدونکو شمېر تر ۵۰۰ کسانو ډېر نهدی.
د اروپايي ټولنې د دغه پخواني ډېپلوماټ په وینا، د اتحاد المجاهدین، لشکر اسلام او ټيټيپي په لیکو کې هم ډېر کم شمېر د القاعده شبکې غړي شته چې لوی ګواښ نهشي ګڼل کېدلی او زیاتوي: «د هبتالله تر امر لاندې زرګونه مدرسې جوړې شوې دي، هلته په سلهاوو زره افغان ځوانان تر روزنې لاندې دي او وو چې امریکا او پاکستان ته د خپل دښمن په سترګه ګوري».
د هغه په خبره، پر سختدریځۍ د طالبانو پانګونې په ډاګه کړې چې اوس طالبان تر القاعدې لوی ګواښ دی او د ترهګرۍ د روزنې لپاره خپل ځانګړي مرکزونه او مدرسې لري او څرګندوي: «القاعده اوس زړه شوه، کوم خاص ځای او سیمه هم تر خپل کنټرول لاندې نهلري او ممکن په ځینو ځایونو کې پلویان ولري او حتی اوس دغه کسان هم خلک له طالبانو سره مرستو ته رابولي».
مایکل سمپل زیاتوي، د ملا هبت الله په مشرۍ طالبان یو قلمرو او خاوره تر خپل حاکمیت لاندې لري چې تر القاعده شبکې پر افغانستان دا واکمنه ډله ډېره خطرناکه تمامېږي. د هغه په خبره، د طالبانو په جهادي مدرسو کې هم د سختدریځي ایډیالوژۍ خلکو ته تبلیغ او تدریس کېږي چې دا حالت لا نور لوی ګواښ زېږولی شي.
د افغانستان انټرنشنل د موندنو لهمخې، طالبانو د بیا ځلي واک له ترلاسه کولو وروسته د افغانستان په بېلابېلو ولایتونو کې لسګونه زره مدرسې جوړې کړي او د خپلې ډلې افکار پهکې ترویجوي. همدا راز د طالبانو په تازه جوړو شویو مدرسو کې جهادي درسونه هم ورکول کېږي او د ملګرو ملتونو امنیت شورا هم څو څو ځله له دغه وضعیت څخه اندېښنه ښوولې ده.
تر دې مخکې د طالبانو ویاند ذبیحالله مجاهد په افغانستان کې له پوهنې وزارت سره د ثبت شویو مدرسو شمېر تر ۲۰ زرو ښودلی وو او په وینا یې په یادو مدرسو کې شاوخوا دوه نیم مېلیونه زدهکوونکي پر دیني زدهکړو بوخت دي، خو څارونکي وايي، د طالبانو د جهادي مدرسو شمېر تر هغه څه لوړ دی چې په رسمي ډول یې اعلانوي.
هممهاله طالبانو په افغانستان کې د ښوونځیو او پوهنتونونو چاپیریال هم د خپلو دیني مدرسو په څېر کړی او تر ډېره یې ملایان پهکې د پخوانیو ښوونکو پر ځای ګومارلي دي.
د طالبانو د مخالفې متحدې جبهې مشر سمیع سادات د سپټمبر د ۱۱مې بریدونو د ۲۵مې کلیزې په مناسبت وايي، د دې جبهې ځواکونه د طالبانو پر وړاندې د مبارزې لپاره بهرنیو سرتېرو ته اړتیا نه لري.
د افغانستان د متحدې جبهې مشر سمیع سادات د جمعې په ورځ، د وږي ۲۰مه، په یوه ویډیويي پیغام کې ویلي چې د سپټمبر د ۱۱مې له بریدونو وروسته افغانانو ۲۰ کاله د امریکايي ځواکونو ترڅنګ د ترهګرۍ په وړاندې مبارزه وکړه. د هغه په وینا، په دې موده کې بنسټونه او زېربناوې ورغول شوې او افغان ځوانانو زده کړو او نړیوالو فرصتونو ته لاسرسی پیدا کړ.
سمیع سادات زیاته کړې چې افغانانو یادې لاسته راوړنې په «درنه بیه» ترلاسه کړې وې.
سمیع سادات د ۲۰۰۱ کال د سپټمبر پر نهمه د القاعدې د غړو له خوا د احمدشاه مسعود او د پخواني ولسمشر او د سولې عالي شورا د مشر برهان الدین رباني ترور ته په اشارې سره ویلي چې افغانان لا هم د طالبانو او ترهګرو ډلو له امله زیان ویني، خو د هغه په وینا، د ازادۍ لپاره مبارزه او د طالبانو، القاعدې او نورو ترهګرو ډلو پر وړاندې مبارزه به دوام ولري.
سادات ویلي، د افغانستان متحدې جبهې د اګست له لومړۍ نېټې د طالبانو پر وړاندې پوځي عملیات پیل کړي او د جمعې تر ورځې یې ۵۴ عملیاتونه ترسره کړي دي. سادات زیاته کړې په دغو بریدونو کې د طالبانو له ۱۲۸ ډېرو غړو ته مرګ ژوبله اړولې ده.
سادات همداراز وویل چې د طالبانو تر واک لاندې په افغانستان کې ځپنه، شکنجه او وژنې دوام لري او ګڼ شمېر افغانان د هېواد پرېښودو لپاره ایران، پاکستان، ترکیې، اروپا او امریکا ته ځي.
هغه طالبان د دې وضعیت عاملان وبلل او ټینګار یې وکړ چې طالبانو د بېلابېلو هېوادونو ترهګرو ډلو ته په افغانستان کې پناه ورکړې ده.
سمیع سادادت وایي طالبانو په تېرو پنځو کلونو کې زرګونه دیني مدرسې جوړې کړې دي چې اوس شاوخوا دوه میلیونه افغان ماشومان پکې زده کړې کوي. سادات ادعا کړې چې په دغو مدرسو کې ماشومانو ته تاوتریخوالی، کرکه او د «دین په نوم د نورو له منځه وړل» ور زده کېږي.
د افغانستان د متحدې جبهې مشر همداراز ویلي چې القاعده اوس لا منظمه او مجهزه شوې ده. هغه له طالبانو سره د امریکا هوکړه د امریکايي مشرانو تېروتنه وبلله او ویې ویل چې د طالبانو او القاعدې بریا د جګړې په مېدان کې نه ده ترلاسه شوې.
سادات د سیمې هغو هېوادونو ته چې له طالبانو سره نږدې اړیکې لري، په خطاب کې وویل چې طالبان به سیمې ته سوله او ثبات رانه وړي. هغه ټینګار کړی چې د ده ځواکونه به یوازې د طالبانو پر وړاندې جګړه کوي.
د لاهور د کېنګ اډوارډ طبي پوهنتون محصلانو له دغه پوهنتونه د افغان محصلانو د اېستلو پرېکړې پرضد اعتراض کړی. د پاکستان د جماعت اسلامي د محصلانو څانګې ویلي، ګڼ شمېر محصلان په پوهنتون کې راټول شوي وو او د «افغان محصلانو جبري اېستل» یې غندلي دي.
د محصلانو ادارې ویلي، چې له اغېزمنو افغان محصلانو ملاتړ کوي او د هغوی د زدهکړو د دوام له حق څخه د دفاع لپاره به خپلو هڅو ته دوام ورکړي. کېنګ اډوارډ طبي پوهنتون له هغه لومړنیو بنسټونو څخه دی، چې د پاکستان د طبي شورا حکم یې عملي کړ او له افغان محصلانو یې غوښتي چې له پوهنتونه د وتلو اړوند اداري چارې بشپړې کړي.
د راپورونو له مخې، په دغه پوهنتون کې شاوخوا ۲۰ تر ۲۲ افغان محصلان د یادې پرېکړې له امله اغېزمن شوي چې د ځینو فراغت ته یوازې څو میاشتې پاتې دي.
دغه اعتراضونه داسې مهال کېږي، چې د پاکستان طبي شورا وايي د افغان محصلانو د وضعیت ارزونه د هغوی د تابعیت له امله نهده؛ بلکې د نوملیکنې، اسنادو او د کډوالۍ له وضعیت سره تړاو لري.
د پاکستان حکومت دغه پرېکړې په کور دننه او بهر پراخ غبرګونونه راپارولي دي. تر دې وړاندې د پاکستان د بهرنیو چارو وزارت ویاند ویلي و، هغه افغان محصلان چې معتبره ویزې او قانوني اسناد لري کولای شي په دغه هېواد کې خپلو زدهکړو ته دوام ورکړي.
نوموړي په خپله خبري غونډه کې زیاته کړه، چې تراوسه افغانستان ته د ټولو افغان محصلانو د ستنولو په اړه پرېکړه نهده شوې.
د پاکستان طبي شورا د پنجشنبې په ورځ وویل، چې په دغه هېواد کې تر ۲۰۰ ډېر افغان محصلان د طب په څانګو کې زدهکړې کوي؛ خو اوسمهال یوازې ۲۲ کسان له دغه شورا سره ثبت دي.
د یادې شورا په وینا، له دغه ۲۲ محصلانو له ډلې ۱۴ یې خپلې زدهکړې بشپړې کړې او اته نور به راتلونکی کال فارغ شي. د نورو ۱۷۶ افغان محصلانو د وضعیت د ارزونې بهیر لاهم روان دی او وروستی شمېر به د دغه بهیر تر بشپړېدو وروسته څرګند شي.
د پاکستان طبي شورا ټینګار کړی، چې په پاکستان کې د طب د زدهکړو لپاره د تابعیت پر بنسټ کوم بندیز نهشته. د یادې شورا په وینا، بهرني محصلان په هغه پوهنتونونو کې زدهکړې کولی شي چې د یادې شورا لهخوا تایید شوي وي؛ خو باید قانوني اسناد ولري.
خو شورا زیاته کړې، هغه محصلان چې له یادې شورا سره ثبت نهدي او لازم جوازونه نهلري؛ د پاکستان د طبي زدهکړو په نظام کې د قانوني او ثبت شویو بهرنیو محصلانو په توګه نهشي پېژندل کېدای.
دغه شورا همداراز ویلي، چې یوازې د طب سند لرل دا معنا نهلري، چې یو کس په پاکستان کې د استوګنې، دندې یا طبابت حق لري. د شورا په وینا، هغه فارغالتحصیلان چې غواړي په دغه هېواد کې کار وکړي باید د مسلکي جواز ترلاسه کولو او ثبت اړوند شرایط هم بشپړ کړي.
د یادې ادارې په وینا، له اغېزمنو محصلانو سره به په «درناوي» چلند وشي او د اداري چارو د بشپړولو او افغانستان ته د بېرته ستنېدو په برخه کې به ورسره همکاري وشي.
په همدې حال کې یوشمېر افغان محصلانو د لاهور عالي محکمې ته مراجعه کړې او د پاکستان د طبي شورا حکمونه یې ننګولي او د لغوه کېدو غوښتنه یې کړې ده.
په کېنګ اډوارډ طبي پوهنتون کې دغه اعتراض داسې مهال شوی، چې پاکستان په وروستیو میاشتو کې پر افغان محصلانو فشارونه زیات کړي او د افغان کډوالو د بېرته ستنولو او اېستلو بهیر یې چټک کړی دی.
په پاکستان کې د القاعدې د پخواني مشر اسامه بن لادن پر وژل کېدو ۱۵ کاله واوښتل. د سیمې ځايي اوسېدونکي لا هم د بن لادن مړینه نه مني او دا یوه «ډرامه بولي». د بن لادن پخوانی کور اوس په تش ډګر بدل شوی دی.
هرکال د سپتمبر ۱۱مې کلیزې په رارسېدو په ټوله نړۍ کې د پاکستان او افغانستان نومونه د نړۍوالو بحثونو مهمه موضوع ګرځي.
په امریکا کې د سپتمبر ۱۱مې تر بریدونو یوازې څو اونۍ وروسته متحده ایالاتو پر افغانستان برید وکړ او د طالبانو حکومت یې نسکور کړ؛ په داسې حال کې چې تر دغه بریدونو نږدې لس کاله وروسته امریکا د القاعدې تر ټولو مطلوب مشر اسامه بن لادن د پاکستان په اېبټاباد ښار کې د دغه هېواد د پوځ یوې مهمې اکاډمۍ ته نږدې د یو لړ عملیاتو پرمهال وواژه.
اسامه بن لادن له کلونو راهیسې د اېبټاباد په بلال ټاون کې ژوند کاوه. دا د ډېرو له تصوره بهر خبره وه، چې څنګه د نړۍ تر ټولو مطلوب کس کولی شي د اوږدې مودې لپاره یوې لویې پوځي اډې ته نږدې له خپلې کورنۍ سره ژوند وکړي.
په اېبټاباد ښار کې مېشت خبریال زبیر ایوب چې له تېرو څو کلونو راهیسې د پاکستان له ځایي رسنیو سره کار کوي، ښايي لومړنی عیني شاهد او سیمهییز خبریال و، چې د دغه عملیاتو پرمهال بلال ټاون ته تر ټولو وړاندې رسېدلی و.
زبیر ایوب افغانستان انټرنشنل ته د یادې پېښې په اړه ویلي، د هغه کور په اېبټاباد ښار کې بلال ټاون ته نږدې دی؛ د شپې شاوخوا اته بجې وې هغه په کور کې و، چې ناڅاپه یې د چورلکې زورور غږ واورېد.
هغه وویل، کله چې له کوره ووت نو له لرې یې د اېبټاباد په اسمان کې درې چورلکې ولیدې؛ هغه د چینوک چورلکې وې، چې خورا لوړ او وېروونکی غږ یې لاره. هغه وايي: «زه لاهم له پېښې ناخبر وم. ما فکر کاوه، چې ښایي کوم لوړپوړی پوځي چارواکی هلته راغلی وي او دغه الوتکې هغې خواته روانې وي».
نوموړي زیاته کړه، لږ وروسته یو چا هغه ته د بلال ټاون څخه زنګ وواهه او خبر یې ورکړ چې دلته چورلکه پرېوتې ده. هغه وایي: «د دغه خبر په اورېدو سملاسي د بلال ټاون خوا ته روان شوم. په دې موده کې ما د اور وژنې یو موټر هم ولیده، چې د پېښې ځای ته روان و».
د هغه په وینا: «کله چې زه د اسامه کور ته ورسېدم، ومې لیدل چې د هغه د کور دروازه ماته شوې وه، د وېرې فضا خوره وه. ګڼ خلک راټول وو، یوه چورلکه راپرېوتې وه چې له هغې د اور لمبې او لوګي پورته کېدل؛ په داسې حال کې چې دوه نورې چورلکې لږې لرې ولاړې وې، د پېښې ځای ته نږدې د پاکستان د پوځي اکاډمۍ (PMA) د وخت قوماندان جنرال راحیل شریف (چې وروسته د پاکستان د پوځ مشر شو) ولاړ و او له بل افسر سره یې خبرې کولې، چې دا زموږ چورلکه نهده».
د خبریال په وینا، تر هغه وخته پورې هیڅوک نه پوهېدل او نه هم امنیتي چارواکو چا ته ویل چې یادې چورلکې د چا دي، د چا پر ضد عملیات شوي او څوک یې موخه و. هغه وویل، ټوله شپه په سیمه کې پاتې شو او خپلې رسنۍ ته یې د چورلکې د پرېوتو راپور ورکړ؛ خو ځایي چارواکو له څه ویلو ډډه کوله.
هغه وایي، د سهار شاوخوا شپږ بجې د امريکا د وخت ولسمشر بارک اوباما په يوه ويډيويي پیغام کې اعلان وکړ چې د امريکا ځانګړو ځواکونو اسلاماباد ته نږدې په اېبټاباد ښار کې د یو لړ عملياتو پرمهال د القاعدې مشر اسامه بن لادن وژلی دی.
د هغه په خبره، د امريکا د ولسمشر دغه اعلان له يوې حيرانتيا کم نه و، په څو شېبو کې دغه خبر د نړۍوالو او ځایي رسنيو سرټکی شو او د پاکستان نوم په دې ډول یادېده چې د نړۍ لومړی نمبر «ترهګر» هلته وژل شوی دی.
هغه وړاندې وایي، تر دغه عملياتو وروسته اېبټاباد ښار د څو مياشتو لپاره د ټولې نړۍ د پاملرنې مرکز پاتې شو؛ څو ورځې وروسته ګڼو نړۍوالو رسنیو له اېبټاباد ښاره راپورونه وړاندې کول.
تر عملیاتو ۱۵کاله وروسته؛ د اسامه بن لادن استوګنځی په تش ډګر بدل شوی
د اېبټاباد تر عملياتو ۱۵ کاله تېر شوي؛ خو نن هم دغه سيمه د بن لادن د ودانۍ په نوم پېژندل کېږي. د پاکستان حکومت تر دغه عملياتو څو ورځې وروسته دغه پیاوړې ودانۍ ونړوله.
نن ورځ هلته ودانۍ نهشته، خو اوس په دغه ځای کې تش ډګر ليدل کېږي چې ماښام مهال ماشومان پهکې کرېکټ کوي. خو د ودانۍ ځینې پاتې شوني او د هغې د پیاوړو ستنو نښې لاهم هلته پر ځمکه لیدل کېږي.
ځایی خلک وايي، چې دغه ځمکه اوس د عوایدو د ریاست ملکیت ګرځېدلې. د پاکستان حکومت لاتراوسه په دغه تش ډګر کې د ودانۍ جوړولو په اړه پرېکړه نهده کړې.
یادې ځمکې ته نږدې یو ځایي اوسېدونکي وویل، څه موده وړاندې د بلال ټاون اوسېدونکي د اېبټاباد کمېشنر ته ورغلي وو او له هغه یې غوښتنه کړې وه چې په دې غونډۍ کې د نجونو لپاره یو ښوونځی جوړ کړي؛ خو کمېشنر دغه وړاندیز ونه مانه.
وروسته د سیمې ځینو ځوانانو هلته د لوبو د ډګر جوړولو غوښتنه وکړه؛ خو دغه وړاندیز هم ونه منل شو او اوس ویل کېږي، چې د پاکستان حکومت هلته د دولتي کارکوونکو لپاره د کورونو جوړولو پلان لري؛ خو تراوسه یې عملي بڼه نهده لیدل شوې.
د یادې سیمې اوسېدونکي وايي، له هغه وخت راهیسې چې بن لادن ووژل شو د نړۍ له ګوټ، ګوټ څخه د رسنیو استازي وخت ناوخت یادې سیمې ته ورځي او له هغه ځایه ځانګړي راپورونه چمتو کوي.
په تېرو پنځلسو کلونو کې د اسامه کمپاونډ شاوخوا ګڼ نوي کورونه جوړ شوي او هلته د ځمکې بیې هم د پخوا پرتله د پام وړ لوړې شوې دي. ځایي اوسېدونکي وايي، چې په یاده سیمه کې له تېرو څو کلونو راهیسې ډېر پرمختګ شوی، سړکونه او کوڅې پخې شوې، په عصري بڼه کورونه جوړ شوي چې له امله یې اوس دا په یوې عصري سیمه بدله شوې ده.
د اسامه بن لادن ګاونډیان د هغه وژنه «ډرامه» بولي
د ۱۵ کلونو په تېرېدو د بلال ښار اوسېدونکي لاهم نه مني، چې ګواکې اسامه بن لادن دې په دغه سیمه کې وژل شوی وي. ډېری ځايي خلک یاده پېښه د امریکا او پاکستان ګډه «ډرامه» بولي.
د ځايي خبریال زبیر ایوب په وینا، هغه څو ځله د اسامه کمپ غونډۍ ته تللی دی؛ خو لاهم خلک د هغه مړینه نه مني. د هغه په وینا، ګڼ خلک په دې باور دي چې د پېښې پرمهال اسامه په خپل استوګنځي کې نه و.
د عملیاتو په اړه د پاکستان پر ناخبرۍ نیوکې
تر یادو عملیاتو څو ورځې وروسته په پاکستان کې د څه مودې لپاره په دې اړه بحث روان و، چې ایا د پاکستان استخباراتي ادارو د دغه عملیاتو په اړه معلومات لرل او که دوی ته په دې اړه هیڅ معلومات نه و ورکړل شوي؟
په اېبټاباد کې مېشت خبریال رشید جاوېد وویل، هغه فکر کاوه دا شونې نهده چې دومره لوی عملیات یوې پوځي اډې ته نږدې ترسره شي او د پاکستان امنیتي ادارې ترې ناخبره وي.
هغه وایي، داسې راپورونه هم شته چې په دربان سیمه کې امریکایي چورلکو ته تېل رسول شوي وو چې ظاهرا دا په ګوته کوي چې حکومت ښایي د پېښې په اړه لا دمخه خبر و.
له بلې خوا د پاکستان حکومت هغه وخت ټینګار کاوه، چې د دغه عملیاتو په اړه هیڅ معلومات نهلري؛ خو له پېښې وروسته د پاکستان پر حکومت سختې نیوکې وشوې او نیوکه کوونکو یاد عملیات د پاکستان حکومت یوه لویه امنیتي تېروتنه بللې وه.
تر پراخو نیوکو وروسته د پاکستان حکومت د دغه هېواد د سترې محکمې قاضي جاوېد اقبال په مشرۍ د اېبټاباد کمېسیون په نوم د یوه څېړنیز کمېسیون له جوړولو خبر ورکړ. دغه کمېسیون د پېښې په اړه قضايي څېړنه وکړه او ۳۳۶ مخیز راپور یې چمتو کړ؛ خو د کمېسیون راپور تراوسه نهدی رسنیز شوی.
د اسامه بن لادن تر وژنې وروسته بدلونونه
پوښتنه دا ده، چې په تېرو پنځلسو کلونو کې په پاکستان کې کوم بدلونونه راغلي دي، د اسامه بن لادن مړینې القاعدې او اړوندو پوځي سازمانونو ته یې څومره لوی زیان واړاوه؟
د دفاعي چارو شنونکی او د پېښور پوهنتون استاد حسین شهید سهروردي افغانستان انټرنشنل ته ویلي، چې د اسامه بن لادن مړینه د القاعدې شبکې او نورو اړوندو سازمانونو لپاره یوه لویه ضربه وه.
هغه وويل، چې د اسامه وژنې د القاعدې ملا ماته کړه او د داعش سازمان بنسټ يې کېښود. د حسين شهيد په وينا، په اېبټاباد کې د القاعدې د مشر راڅرګندېدل د پاکستان لپاره لوی «شرم» و؛ ځکه نوموړی هغه مهال هغه د نړۍ لومړی نمبر «ترهګر» و او ټوله نړۍ د هغه په لټه کې وه.
د هغه په وینا، تر دغه عملياتو وروسته پاکستان د ترهګرۍ پر وړاندې د مبارزې په برخه کې هم ځینې ګامونه پورته کړل، د ترهګرۍ پر وړاندې د مبارزې څانګه (CTD) جوړه شوه او په ټول هېواد کې د ترهګرو پر وړاندې عمليات ګړندي شول.
په پېښور کې مېشت خبریال محمود جان بابر وايي، د اسامه بن لادن تر وژنې وروسته د القاعدې شبکې ځواک خورا کمزوری شوی چې په پاکستان کې پر وسلهوالو سازمانونو یې هم اغېز کړی دی.
هغه وایي، چې په دغه هېواد کې ګڼ پوځي سازمانونو په بېلابېلو ډولونو له القاعدې سره تړاو لاره؛ خو اوس دغه سازمانونه خورا کمزوري شوي او د عامو خلکو په منځ کې یې ملاتړ پېکه شوی دی.
د اسلامي همکاریو سازمان مشر محمد بن عبدالکریم العیسی وایي چې د ښځو پر وړاندې د تاوتریخوالي او د هغوی د انساني درناوي د له منځه وړلو لپاره هېڅ ډول پلمه او توجیه نشته.
العیسی د وږي میاشتې په ۱۷مه په جده کې د «د ښځو پر وړاندې د تاوتریخوالي په مخنیوي کې د دیني مشرانو ونډه» په نوم د نړیوالې غونډې پر مهال وویل، دیني مشران باید هغه تورونه چې د ښځو د مقام په اړه اسلام ته منسوبېږي، په څرګندو دلیلونو او هر اړخیز ډول ځواب کړي.
د اسلامي نړۍ د همکارۍ سازمان مشر له دیني عالمانو وغوښتل چې د ښځو د ستونزو په اړه د یوه هر اړخیز علمي اثر د چمتو کولو او بېلابېلو ژبو ته د ژباړلو لپاره ګډ کار وکړي.
هغه ټینګار وکړ چې هر هغه تاوتریخوالی چې د ښځې جسمي یا روحي درناوی تر پښو لاندې کوي، هېڅ ډول دیني مشروعیت او خونديتوب نه لري.
العیسی زیاته کړه چې د شریعت په نوم د تاوتریخوالي توجیه کول او یا هغه اسلام ته منسوبول پر الله تعالی تهمت لګول دي.
د هغه دا څرګندونې په داسې وخت کې کېږي چې د اسلامي نړۍ په ګڼو هېوادونو کې ښځې لا هم له ټولنیزو او اقتصادي محدودیتونو سره مخ دي.
خو په ټولو هېوادونو کې وضعیت یو شان نه دی. ځینو حکومتونو په وروستیو کلونو کې د زدهکړو او د کار په بازار کې د ښځو د ونډې د زیاتولو لپاره یو شمېر بدلونونه راوستي دي.
افغانستان په دې برخه کې له نورو هېوادونو جلا حالت لري.
افغانستان اوس د نړۍ یوازینی هېواد دی چې په رسمي ډول پکې د نجونو او ښځو پر منځنیو او لوړو زدهکړو بندیز لګېدلی او ښځې د کار له بازار څخه هم تر ډېره لرې کړل شوې دي.
له مصر تر پاکستانه؛ د کار په بازار کې د ښځو لږه ونډه
د کار په بازار کې د ښځو ونډه د هغوی د اقتصادي ځایګۍ د معلومولو له مهمو کچو څخه ګڼل کېږي.
په ۲۰۲۵ کال کې په منځني ختیځ او شمالي افریقا کې یوازې شاوخوا ۱۹ تر ۲۰ سلنې د کار عمر لرونکو ښځو په کاري ځواک کې ونډه لرله، په داسې حال کې چې د نارینهوو ونډه له ۷۰ سلنې زیاته وه.
په جنوبي اسیا کې هم یوازې شاوخوا یوه پر درېیمه برخه ښځې د کار بازار ته ننوتې دي.
د «اکونومېسټ» اوونیزې په وینا، په ډېرو اسلامي هېوادونو کې د کار په ځواک کې د ښځو ونډه ټیټه ده.
د ۲۰۲۵ کال د شمېرو له مخې، ښځو د مصر د کاري ځواک شاوخوا ۲۰ سلنه، د پاکستان ۲۲ سلنه، د اردن ۱۹ سلنه، د ایران ۱۶ سلنه او د عراق ۱۳ سلنه جوړوله.
په افغانستان کې بیا د ښځو ونډه یوازې شاوخوا ۶،۸ سلنه وه.
د ښځو د کاري ونډې ټیټوالی یوازې د قوانینو پایله نه ده.
د ماشومانو پالنه، د خوندي ترانسپورټ نشتوالی، کورنی فشار او د ښځو د ونډې په اړه دودیز باورونه هم د دې لامل کېږي چې ښځې د کار بازار ته په پراخه کچه داخلې نه شي.
د منځني ختیځ، شمالي افریقا او جنوبي اسیا په ځینو برخو کې دغه دودیز باورونه لا هم د ښځو پر ژوند اغېز لري.
په ځینو ټولنو کې ان د ښځو پر وړاندې تاوتریخوالی هم د خلکو له یوې برخې سره د منلو وړ بلل کېږي.
په هند کې نږدې ۴۰ سلنې ښځو ویلي چې په ځینو شرایطو کې مېړه حق لري خپله مېرمن ووهي.
دا کچه په هند کې له ۴۰ سلنې زیاته او په افریقايي هېواد مالي کې شاوخوا ۷۰ سلنې ته رسېږي.
د دې حالت زیانونه یوازې ټولنیز نه دي.
د ښځو له کار بازار څخه ایستل لوی اقتصادي زیان هم لري.
نړیوال بانک اټکل کړی چې د ښځو د کار پر وړاندې د خنډونو له منځه وړل په ډېرو هېوادونو کې د هر وګړي عاید شاوخوا ۲۰ سلنه لوړولی شي.
سعودي عربستان؛ د ښځو د زیاتې ونډې یوه بېلګه
په یو شمېر اسلامي هېوادونو کې بیا وضعیت بل ډول روان دی.
سعودي عربستان د دې بدلون یوه څرګنده بېلګه ده.
په دغه هېواد کې په وروستیو کلونو کې د ښځو اقتصادي ونډه په چټکۍ زیاته شوې او په ۲۰۲۵ کال کې شاوخوا ۳۴ سلنې ته رسېدلې ده.
«اکونومېسټ» لیکلي چې خبره په پای کې یوازې د ښځو پر جامو یا تګ راتګ پورې نه محدودېږي.
مهمه پوښتنه دا ده چې ایا ښځې زدهکړې کولی شي، کار کولی شي، عاید ترلاسه کولی شي او د خپل ژوند په اړه خپله پرېکړه کولی شي که نه.
افغانستان بیا د اسلامي نړۍ د ډېرو نورو هېوادونو پر خلاف په بل لوري روان دی.
طالبانو د ۱۴۰۰ لمریز کال په زمري کې واک ته له بېرته رسېدو وروسته پر ښځو او نجونو پراخ محدودیتونه ولګول.
نجونې له شپږم ټولګي پورته له رسمي زدهکړو بې برخې شوې او ښځو ته هم په پوهنتونونو کې د زدهکړې اجازه نه ورکول کېږي.
د یونیسف د شمېرو له مخې، د طالبانو له بېرته واکمنېدو راهیسې له ۲،۶ میلیونو څخه ډېرې افغانې نجونې له منځنیو زدهکړو بې برخې شوې دي.
ملګري ملتونه اټکل کوي چې شاوخوا ۳،۸ میلیونه له اوو تر ۱۸ کلونو عمر لرونکې نجونې له ښوونځي بهر پاتې دي.
محدودیتونه یوازې تر زدهکړو نه دي محدود شوي.
ښځې د کار له بازار، عامه ژوند او د ټولنې له ډېرو فعالیتونو څخه هم لرې کړل شوې دي.
د ملګرو ملتونو د ښځو د ادارې د اټکل له مخې، نږدې ۸۰ سلنه ځوانې افغانې ښځې نه زدهکړې کوي، نه کار کوي او نه هم د مسلکي وړتیاوو د زدهکړې په کوم بنسټ کې ګډون لري.
په ځوانو نارینهوو کې دا کچه شاوخوا ۲۰ سلنه ده.
د ښځو پر وړاندې دا محدودیتونه اقتصادي زیان هم لري.
ملګرو ملتونو اټکل کړی چې د ۲۰۲۴ او ۲۰۲۶ کلونو ترمنځ پر ښځو لګېدلو محدودیتونو د افغانستان اقتصاد ته شاوخوا ۹۲۰ میلیونه ډالره زیان اړولی دی.
بندیزونه اوس روغتیايي برخې ته هم رسېدلي دي.
د ۲۰۲۴ کال له ډسمبر راهیسې د ښځو لپاره د طب، نرسنګ او قابلهګۍ زدهکړې هم منع شوې دي.
یونیسف خبرداری ورکړی چې که دا حالت دوام وکړي، افغانستان به تر ۲۰۳۰ کال پورې د شاوخوا ۲۰ زره ښځینه ښوونکو او له پنځو زرو څخه د زیاتو ښځینه روغتیايي کارکوونکو له کمښت سره مخ شي.
کله چې د طالبانو یو چارواکی ښځې «کمعقلې» بولي
په داسې حالت کې د طالبانو د ځینو چارواکو څرګندونو هم څو ځله غبرګونونه راپارولي دي.
د طالبانو لپاره د جوزجان والي عبدالله سرحدي په دې وروستیو کې یوې هغې ښځې ته چې غوښتل یې له خپل تاوتریخجن مېړه څخه بېله شي، «بېعقله» او «کمعقله» ویلي دي.
هغه تر دې وړاندې هم ویلي وو چې د ښځو ښوونځي ته تګ هغوی «بدبخته» کوي او «سترګې یې وځي».
د طالبانو ویاند ذبیحالله مجاهد هم په حکومتي ادارو کې د ښځو شتون د «فسادونو» د رامنځته کېدو لامل بللی او ویلي یې دي چې د ښځو د زدهکړو موضوع لا هم «شرعي حل» ته اړتیا لري.