په ملګرو ملتونو کې د پاکستان دایمي استازي عاصم افتخار احمد د ملګرو ملتونو د عمومي اسامبلۍ په شپږمه کمېټه کې ادعا کړې، چې هېواد یې د افغانستان په خاوره کې د هند له لوري د تمویلېدونکو وسلهوالو ډلو له دوامداره بریدونو سره مخ دی.
هغه وویل چې تحریک طالبان پاکستان او د بلوچستان د ازادۍ پوځ (بيایلاې) او د دې ډلې مجید برېګېډ د افغانستان له خاورې او د هند په مستقیم ملاتړ په پاکستان کې بریدونه تنظیموي.
دغه پاکستاني ډیپلوماټ په ملګرو ملتونو کې د نړيوالې ترهګرۍ د له منځه وړلو په اړه غونډه کې څرګنده کړه، چې په تېرو درېیو کلونو کې د دغو بریدونو له امله تر ۴ زره او ۷۰۰ ډېر بېګناه پاکستاني وګړي وژل شوي دي. نوموړي ټینګار وکړ چې هېڅ هېواد د خپلو وګړو پر وړاندې د دا ډول بریدونو زغم نه لري او اسلاماباد اړ دی چې د خپلو خلکو ساتنه وکړي.
هغه زیاته کړه چې پاکستان د موثقو استخباراتي معلوماتو پر بنسټ اړ شوی، ترڅو پر لوېدیځه پوله د وسلهوالو پر مرکزونو او پټنځایونو دقیق او پلان شوي ترهګرۍ ضد عملیات ترسره کړي. د هغه په وینا، دغه بریدونه یوازې د تحریک طالبان پاکستان او بيایلای وسلهوال په نښه کوي او د ملکي وګړو د خوندیتوب لپاره په پوره دقت ترسره کېږي، او هېواد یې هر ډول ناسم تورونه په کلکه ردوي.
دا څرګندونې د پاکستان او د طالبانو ترمنځ پر ډیورنډ کرښه د امنیتي تاوتریخوالي په لړ کې کېږي، چې اسلاماباد تل پر افغان طالبانو د تحریک طالبان پاکستان د پناه ورکولو تور لګوي، خو طالبانو بیا دا تورونه رد کړي دي. له بلې خوا، پاکستان هڅه کوي په نړیوالو غونډو کې د عملیاتو او هوایي بریدونو دفاع وکړي او هند د دغو بریدونو په ملاتړ تورن کړي.
په همدې حال کې، د ملګرو ملتونو په دې غونډو کې متقابل تورونه هم مطرح شوي دي؛ څه موده وړاندې په ملګرو ملتونو کې د هند استازي هم پاکستان د وسلهوالو پر ملاتړ تورن کړی و او ویلي یې وو چې اسلاماباد پخپله د پولې هاخوا وسلهوالو ډلو لپاره په یو خوندي پټنځای بدل شوی دی. د افغانستان او سیمې پر وضعیت د دغو هېوادونو دا سیاسي او پوځي ناندرۍ داسې مهال دوام لري چې په سیمه کې د وسلهوالو بریدونو اندېښنې لا هم پر ځای پاتې دي.
