خبریال
د کندهار اوسېدونکي وايي چې د طالبانو پولیس له خپل ځانګړې یونیفورم څخه استفاده نه کوي او په ښار کې په شخصي جامو کې له وسلو سره ګرځي. د کندهار د اوسېدونکو په وینا، د طالبانو د پولیسو او وسله والو غلو ترمنځ پېژندل ورته سخت دي.
د کندهار ښار یو شمېر اوسېدونکو افغانستان انټرنشنل ته ویلي چې د طالبانو پولیس له خپل ځانګړې یونیفورم څخه له استفادې پرته وسلې ګرځوي او عامو خلکو ته د دغو ډول وسله والو او غلو ترمنځ تفکیک کول ستونزمن شوي دي.
د کندهار ښار اوسېدونکي وايي، ډیری وختونه په شخصي جامو کې وسله وال کسان د عامو خلکو په ورځنیو چارو کې هم لاسوهنه کوي او دوی نه پوهیږي چې دغه ډول وسله وال کسان د طالبانو اړوند پولیس دي او که وسله وال غله دي.
په ورته مهال د دغه ښار ځینې اوسېدونکي د وسله والو غلاوو له ډېریدو هم شکایت کوي او وايي چې د ښار په بېلابېلو برخو کې له خلکو موټرونه، موټرسایکلونه او نور توکي د وسلې په زور اخېستل کېږي.
د کندهار یو اوسېدونکي د نوم نه ښودلو په شرط افغانستان انټرنشنل ته وویل:«د شپې شاوخوا ۱۲ بجې وې، موږ په عینومېنه کې د سېټاچوک سره بانډار کاوه، څلور کسان راغلل، له دوو سره کلاشینکوفونه وو، موږ ته یې بد الفاظ وویل او موبایلونه یې واخېستل».
نوموړی وايي، یادو کسانو ورته وویل، چې سهار باید حوزې ته ورشي، خو وروسته یې وویل، چې دوی ته باید نغدي جریمه ورکړل شي.
یاد کس زیاتوي، « موږ اته زره افغانۍ ورکړې او موبایلونه یې راکړل. موږ هېڅ پوه نه شوو چې دا وسله وال کسان څوک وو».
د کندهار یو بل تن اوسېدونکي وویل، چې وسله والو کسانو له دوی څخه د ږیرو خرېیلو په جرم وسایل واخېستل، خو دوی پوه نه شول، چې دا د طالبانو پولیس وو او که غله وو.
د کندهار ښار اوسېدونکي له طالبانو غوښتنه کوي چې په ښارونو کې دې یې پولیس له خپل ځانګړې یونیفورم څخه استفاده وکړي څو د مسوولو کسانو او غلو ترمنځ تفکیک اسانه شي.
دا په داسې حال کې ده چې څو ورځې وړاندې د طالبانو د کورنیو چارو وزیر د یادې ډلې د پولیسو د قانون پر عملي کېدو په ځانګړي توګه د یونیفورم پر کارولو ټینګار وکړ او خبرداری یې ورکړ چې سرغړوونکو ته به سزا ورکړل شي.
