د طالبانو تر واک لاندې د المپیک او بدني روزنې ریاست ویلي، چې افغان ورزشکار سمېعالله حمیدي په ازبکستان کې د رزمي ورزشونو په اسیایي سیالیو کې خپل چینایي او منګولیایي سیالانو ته ماتې ورکړې ده. د دغه ریاست په وینا، نوموړي په دې بریاوو سره د یادو سیالیو پایلوبې ته لاره موندلې ده.
د طالبانو د اقتصاد وزیر دین محمد حنیف په افغانستان کې د یونېسف او یوناما له سرپرست سره په لیدنه کې د افغان کډوالو سره د مرستو په اړه غږیدلی دی. طالبانو ویلي، چې یوناما د راستنېدونکو افغان کډوالو سره د مرستې لپاره د ۵۲۰ میلیونه ډالرو مرستې غوښتنه کړې.
د بنګلهدېش روغتیايي چارواکو خبر ورکړی، چې د روان کال د مارچ میاشتې راهیسې په دغه هېواد کې د شري ناروغۍ له امله له ۵۰۰ څخه ډېر ماشومان مړه شوي دي.
په هلمند کې ځايي سرچینو افغانستان انټرنشنل ته وویل، چې طالبانو د مولوي هبتالله اخوندزاده په امر په لښکرګاه کې د کرېکټ د یوه معیاري لوبغالي د ویجاړولو عملي چارې پیل کړي. هبتالله هلمند ته په خپل وروستي سفر کې د کرېکټ په لوبغالي کې د عیدګاه جومات د بنسټ ډبره کېښوده.
د طالبانو د هوا پوهنې ادارې خبر ورکړی، چې سبا یکشنه، د غبرګولي ۳مه په ۱۳ ولایتونو کې د تېز باران، تالندې او برېښنا او سېلابونو راوتو اټکل شوی. وړاندې طالبانو خبر ورکړی و، چې په تېرو دوو ورځو کې په بېلابېلو ولایتونو کې د سېلابونو له امله ۲۴ کسان مړه شوي دي.
د روغتیا نړۍوال سازمان په افغانستان کې د راتلونکي لوی اختر په درشل کې د «کریمیا-کانګو» وینې تویېدونکې تبې د احتمالي خپرېدو په اړه جدي خبرداری ورکړی او له ښاریانو، بزګرانو او د څارویو له مالکانو یې غوښتي، چې ځانګړي روغتیايي اصول مراعات کړي.
د امریکا د بهرنیو چارو وزیر هند د سفر پرمهال په نوي ډیلي کې د هند له لومړي وزیر سره وکتلي دي. د دغه سفر او لیدنې اصلي موخه د واشنګټن او نوي ډیلي ترمنځ د سوداګرۍ او انرژۍ پر مسایلو خبرې کول او د هغو دوه اړخیزو اړیکو بیا رغول دي، چې تېر کال د سوداګریزو تعرفو له امله زیانمنې شوې وې.
په زابل کې د طالبانو امنیه قوماندانۍ ویلي چې په یاد ولایت کې یې د تېرو درېیو میاشتو په لړ کې نیول شوي، درې نیم ټنه نشهيي توکي سوځلي دي.
د طالبانو ریاستالوزرا اقتصادي مرستیال ملا عبدالغني برادر په مشرۍ د تدارکاتو کمېسیون په نوبتي غونډه کې د ۴،۲ میلیارده افغانیو په ارزښت ۱۵ پروژې منظور شوې دي. طالبان وايي، چې منظور شوې پروژې له داخلي بودېجې تمویلېږي.
د پاکستان د پوځ مشر عاصم منیر تهران ته د سفر پر مهال د ایران د ولسمشر مسعود بزشکیان، د دغه هېواد د پارلمان له رییس قالیباف او د بهرنیو چارو وزیر عباس عراقچي سره جلا جلا لیدنې کړي دي. د العربیه نیوز شبکې د راپور لهمخې، منیر په دغه سفر کې ایران ته د امریکا پېغام لېږدوي.
د طالبانو تر چتر لاندې د دایمي مېشتېدنې او ځمکو د وېش کمېټې ویلي، چې د تېرې اوونۍ په څلورو ورځو کې یې په ۹ ولایتونو کې ۳۲۱۳۰ راستنو شویو کسانو ته د استوګنې نمرې وېشلي دي.
په ننګرهار کې د طالبانو رسنیز دفتر ویلي، چې په تورخم کې یې له یوې باروړونکې لارۍ څخه ۷۰ کیلوګرامه پاکستاني ام چې په غېرقانوني توګه افغانستان ته قاچاق کېدل، نیولي دي.
د طالبانو د اطلاعاتو او کلتور وزارت ویلي، چې د پکتیکا ولایت د مټاخان ولسوالۍ په رشکي غونډۍ سیمه کی یې د کیندونو پرمهال ۸۴ قلمه لرغوني او تاریخي اثار موندلي دي. طالبانو ویلي، چې کشف شوي اثار د کوشاني او ساساني دورو پورې تړاو لري.
د پاکستان لومړی وزیر شهباز شریف د یوه څلور ورځنې ورځني رسمي سفر په موخه د چین د هانګژو ښار ته په سفر لاړ. د پاکستان د بهرنیو چارو وزارت وايي، چې د دغه سفر اصلي موخه د چین ـ پاکستان اقتصادي دهلېز د دویم پړاو عملي کول دي.
په نمیروز کې د طالبانو د کډوالو ریاست ویلي، چې د روان کال په لومړیو دوو میاشتو کې د نیمروز د ورېښمو پله له لارې څه باندې ۸۳ زره افغان کډوال هېواد ته راستانه شوي دي.
د خیبر پښتونخوا په مرکز پېښور کې د فدرالي پلټنو ادارې (ایف ای اې) د چاپې پر مهال ۱۴ افغان وګړي نیولي، چې د جعلي پاکستاني پېژندپاڼو په جوړولو او کارولو تورن شوي دي. چارواکي وايي، نیول شویو کسانو غوښتل د دغو جعلي اسنادو له لارې سعودي عربستان ته سفر وکړي.
د طالبانو د اوبو او انرژۍ وزارت خبر ورکړی چې د لغمان ولایت د ملګرو ملتونو د خوړو او کرنې نړیوال سازمان په مالي ملاتړ د پاچا جوی کانال د سربند رغنیزې چارې ۸۵ سلنه بشپړې شوې دي.
خوست کې طالب چارواکو ویلي چې د صبریو ـ یعقوبیو ولسوالۍ د امنیه قوماندانۍ امنیتي ځواکونو د علیشېرو او تریزیو ولسوالۍ له امنیتي ځواکونو سره په همغږۍ پر وژنو تورنه یوه ډله نیولې ده.
د چین د شانشي ولایت په چینیوان ولسوالۍ کې د ډبرو سکرو په يوه کان کې د چاودنې له امله لږ ترلږه ۹۰ کان کېندونکي وژل شوي دي. چارواکو دا پېښه له ۲۰۰۹ کال راهیسې په دغه هېواد کې د کانونو تر ټولو خونړۍ او مرګونې پېښه بللې ده.
د بلوچستان ایالت د تربت ولسوالۍ په ګن سیمه کې ایران ته پر لاره د افغانانو یو موټر له ترافیکي پېښې سره مخ شوی، چې له امله یې ۹ افغان وګړي ټپیان شوي دي. د چارواکو په وینا، په ټپیانو کې پنځه ښځې هم شاملې دي.
په افغانستان کې د روغتیا نړیوالې ادارې د اختر له رانږدې کېدو سره له خلکو غوښتي چې د حیواناتو د حلالولو او غوښې د پروسس پر مهال روغتیايي سپارښتنې په پام کې ونیسي، څو د کانګو وینې بهېدونکې تبې او نورو ساري ناروغیو د خپرېدو مخه ونیول شي.