آرشیف

د ایران د پوهنې وزارت د معلوماتو له مخې، له ۴۳ زرو او ۶۰۰ ډېرو افغان زده کوونکو د روغتیايي ارزونې بهیر بشپړ کړی او په لومړیو ټولګیو کې د نوملیکنې په حال کې دي.

د طالبانو د ننګرهار ولایت رسنیز دفتر وايي، چې نن دوشنبه، د تلې پر ۶مه د کابل - جلال اباد پر لویه لار د یوې ترافیکي پېښې له امله ۲۳ کسان ټپیان شوي دي. ټپیان ټول د ننګرهار حوزوي روغتون ته لېږدول شوي دي. ډاکترانو د دوو ټپیانو روغتیايي وضعیت نازک ښودلی دی.

د طالبانو د مالیې وزارت د تعرفې کمېټې د یو شمېر وارداتي توکو د ګمرکي تعرفو د ډېرولو او د ځینو نورو د کمولو خبر ورکړی. یادې کمیټې ویلي د بېټریو، ودانیز رنګ او ګچو تعرفې لوړې شوې او د پلاستیکي بوټانو تعرفه کمه شوې ده.

د پاکستان د ولسمشر ویاند مرتضی سولنګي ویلي، نه مجاهدینو او نه هم طالبانو افغانانو ته غوره بدیل وړاندې کړ. نوموړي زیاته کړې، طالبانو د خپلې دویمې واکمنۍ پرمهال افغانستان د ښځو، قومي او مذهبي لږکیو لپاره پر یوه زندان بدل کړی.

له ازادۍ جبهې څخه یوې سرچینې افغانستان انټرنشنل ته ویلي، چې د بدخشان ولایت د فیض‌اباد ښار «جلغر» سیمې نننی برید یادې جبهې ترسره کړی دی. سرچینې وايي، په دغه برید کې یو هایلکس موټر په نښه شوی؛ خو تر اوسه د چاودنې د احتمالي مرګ‌ژوبلې په اړه کره معلومات نه‌دي خپاره شوي.

معلوماتو ته د لاسرسي نړۍوالې ورځې په مناسبت د افغانستان په سویلي زون کې خبریالان وايي، سره له دې چې له طالب چارواکو سره د لیدنو، ورکشاپونو او پوهاوي ګڼې غونډې جوړې شوې؛ خو په عملي ډګر کې د معلوماتو دروازې لاهم د افغان خبریالانو پر مخ تړلې دي.

د طالبانو د ترانسپورټ او هوايي چلند وزارت وايي، د روان کال په تېرو شپږو میاشتو کې له کابل نړۍوال هوايي ډګر نه نږدې ۱۱۰۰ کارګو الوتنې ترسره شوې دي چې تر ۱۷زره ټنو ډېر توکي یې بېلابېلو هېوادونو ته لېږدولي دي.

د اوکراین پر بېلابېلو سیمو د روسیې په پراخو هوايي او توغندیزو بریدونو کې لږ تر لږه اته کسان وژل شوي او لسګونه نور ټپیان دي. اوکرایني چارواکي وايي، په دغه بریدونو کې د خارکیف ښار پر یوه استوګنیز کور د لارښود توغندي برید هم شامل دی.

د خيبر پښتونخوا په ټانک ولسوالۍ کې د ناپېژاندو وسله‌والو په ډزو کې درې پوليس وژل شوي او دوه لارویان ټپیان دي. د پاکستان د کورنیو چارو وزير محسن نقوي په يوه بيان کې دغه پېښه غندلې ده.

په لغمان کې د طالبانو امنیه قوماندانۍ خبر ورکړی، چې د دغه ولایت په قرغیو ولسوالۍ کې د کابل – جلال‌اباد پر لویه لار د ترافیکي پېښې له امله یوه ښځه مړه او د ښځو او ماشومانو په ګډون ۲۷ کسان ټپیان شوي دي.

ځايي سرچینو افغانستان انټرنشنل ته ویلي، چې د دوشنبې په سهار (د تلې ۶مه) د بدخشان ولایت په مرکز فیض‌اباد ښار کې چاودنه شوې ده. تر اوسه د یادې پېښې د احتمالي مرګ‌ژوبلې او مالي زیانونو په اړه کره معلومات نه‌دي خپاره شوي او طالبانو هم په دې اړه څه نه‌دي ویلي.

په بلخ کې د طالبانو د سوداګرۍ او پانګونې خونه وایي، چې د ازبکستان د خوارزم ولایت مرستیال والي په مشرۍ ۳۰ سوداګرو او صنعت کارانو دغه ولایت ته د سفر پرمهال د ګډو سوداګریزو فعالیتونو د پراختیا په موخه له افغان سوداګرو سره ناسته کړې ده.

د طالبانو د امربالمعروف، نهې عن المنکر او شکایتونو اورېدو وزارت راپور ورکړی، چې په تېرو درېیو میاشتو کې یې په یوشمېر ولایتونو کې ۱۵۷ کوډګر نیولي دي. یاد وزارت زیاته کړې، چې نیول شوي کوډګر عدلي او قضایي ارګانونو ته ور پېژندل شوي دي.

د طالبانو تر واک لاندې د احصایې او معلوماتو ادارې خبر ورکړی، چې د روان کال په لومړیو شپږو میاشتو کې یې له هوایي او ځمکنیو لارو افغانستان ته د ۱۵زره او ۴۴۹ بهرنیانو تګ‌راتګ ثبت کړی دی.

په جوزجان کې د طالبانو امنیه قوماندانۍ خبر ورکړی، چې د دغه ولایت په اقچې ولسوالۍ کې یې د یو لړ عملیاتو پر مهال درې کسان د یو ۳۱ کلن سړي د وژنې په تور نیولي دي. طالبانو ویلي، دوې ورځې مخکې دغه کس د چړې په ګوزارونو وژل شوی و.

ټاکل شوې ده، د شانګهای همکاریو سازمان د ملي همغږي کوونکو شورا لومړنۍ غونډه نن دوشنبه (د تلې ۶مه) په اسلام‌اباد کې پیل شي. په دغه غونډه کې په یاد سازمان کې د پاکستان د ریاست پرمهال د پروګرامونو او راتلونکو غونډو لپاره د چمتووالي په اړه خبرې کېږي.

د ۲۰۲۶کال اسیايي لوبو پردوام د افغان ابدالیانو او هند کرېکټ لوبډلو ترمنځ لوبه د سخت ورښت او د لوبغالي د لوندوالي له کبله لغوه شوه. افغان ابدالیانو د دغه سیالیو دویم پړاو ته لار موندلې وه او له هند سره د لوبې تر لغوه کېدو وروسته په دغه سیالیو کې د افغان لوبډلې سفر هم پای ته ورسېد.

اېن‌بي‌سي نیوز د درېیو امریکایي چارواکو په حواله راپور ورکړی، چې په هرمز تنګي کې د دوی پر کښتۍ د ایران په توغندیز برید کې د امریکا د سمندري ځواک اته سرتیري ټپیان شوي دي. د راپور له مخې، دغه برید چې وړاندې یې راپور نه و ورکړل شوی، د وږي په ۲۳مه د کروز توغندي پر مټ ترسره شوی و.

د روغتیا نړۍوال سازمان وايي، په ۲۰۲۴کال کې افغانستان د هغه نهو هېوادونو په ډله کې شامل شوی چې د ختیځې مدیترانې په سیمه کې یې د نس ناستي او کولرا نږدې ۸۰ سلنه نړۍوالې پېښې ثبت کړې دي.

په جلاوطنۍ کې د بشري حقونو د مدافعینو نړۍوال فدراسیون (IFHRDE) په افغانستان کې د ښځو او نجونو د نیولو لړۍ دوام په اړه اندېښنه څرګنده کړې ده. دغه فدراسیون په یوه خبرپاڼه کې ویلي، چې طالبان دې د افغان مېرمنو پر وړاندې له ځپونکو سیاستونو لاس واخلي.

د امریکا ولسمشر ډونالډ ټرمپ د یکشنبې په ورځ (د تلې ۵مه) پر «ټروت» خواله رسنۍ د هرمز تنګي نقشه خپره کړه، چې په‌کې د اوبو لاره د «ټرمپ تنګي» په نوم ښودل شوې ده. ټرمپ له دغه انځور سره کومه څرګندونه نه‌ده کړې؛ خو تر دې وړاندې یې هم په خپله پاڼه ورته انځورونه خپاره کړي وو.