د افغانستان لپاره د اسلامي همکاریو سازمان، تماس ډلې په خپله وروستۍ غونډه کې د افغان نجونو د زده کړو پر ملاتړ او د بشري وضعیت د ښه والي په اړه خبرې کړې دي. دا غونډه، د دغه سازمان د سرمنشي اسماعیل ولد شیخ احمد په مشرۍ، د ملګرو ملتونو د عمومي اسامبلې په څنډه کې شوې ده.
د طالبانو د کانونو او پټرولیم وزارت تخنیکي پلاوي په تاشکند کې د ازبکستان د کانونو او صنایعو له وزیر سره د طوطي میدان ګازي بلاک د قرارداد د عملي کېدو پر وړاندې د شته تخنیکي او مالي ستونزو د حل او د پروژې د پرمختګ په اړه خبرې کړې دي.
د هند د بهرنیو چارو وزارت ویاند رندیر جیسوال وايي، هېواد یې د افغانستان پر کونړ او پکتيکا ولايتونو د پاکستان بريدونه، چې په پایله کې یې یو شمېر ملکي وګړي وژل شوي، په کلکه غندي.
د طالبانو د بلخ والي رسنیز دفتر وايي، له کابل څخه د دفاع او کورنیو چارو وزارتونو ورغلي پلاوي ددې ډلې د بلخ، سمنګان، سرپل، بغلان او بامیان ولایتونو له مسوولانو سره کتلي دي. د طالبانو د بلخ والي په دې ناسته کې په لرې پرتو او غرنیو ولسوالیو کې د تشکیلاتو ډېرولو غوښتنه کړې ده.
د روغتیا نړیوال سازمان تایید کړې چې د ۲۰۲۶ کال له پیله تر اوسه په افغانستان کې د ماشومانو د پولیو (ګوزڼ) ۳۲ مثبتې پېښې ثبت شوې دي.
د پروان د سالنګ ولسوالۍ په ده یک کلي کې د سې شنبې په ورځ د طالبانو د سرتېرو په منځ کې چاودنه شوې ده. محلي سرچینې وايي، څلور طالبان او یو ملکي وګړی په چاودنه کې وژل شوي، خو طالبانو یوازې د یوه تن د وژل کېدو پخلی کړی دی.
ترکیې د پانګونې له لارې د تابعیت اخیستو په بهیر کې د درغلیو تر څېړلو وروسته د پانګوالو او د هغوی د کورنیو د غړو په ګډون د څه باندې شپږ زره کسانو تابعیت لغوه کړی دی. د ترکیې یوه خبریال د ځینو کسانو نوملړ خپور کړی چې د افغانانو ترمنځ ځینې دود نومونه هم پکې لیدل کېږي.
د ننګرهار ولایت د دره نور ولسوالۍ په تلکيډاګ کلي کې لسګونه کورنۍ وروسته له هغه، چې اوسېدونکي یې له خپلو کورونو «جبري اېستل» بولي، په خیمو او پرانېستې فضا کې ژوند کوي او د بدیلې سرپناه او د بېړنیو بشري مرستو غوښتنه کوي.
فریبا هاشمي، چې په افغانستان کې یې د بایسکل ځغلونې پرمهال له ویرې د هلکانو جامې اغوستې، په اسیايي لوبو کې د افغانستان بیرغ ورپاوه او د ښځینهوو د سړک بایسکل ځغلونې په سیالۍ کې یې د سپینو زرو مډال وګاټه.
د طالبانو د کورنیو چارو وزارت د ۱۴۰۵ لمریز کال د لومړیو شپږو میاشتو خپرې شوې شمېرې ښيي، چې د وري له لومړۍ نېټې څخه د وږي تر ۳۰مې پورې، په ټول افغانستان کې ۸۲۹۰ جنایي پېښې ثبت شوې دي.
یوه لوړپوړي ایراني چارواکي ویلي، که امریکا پر ایران پوځي فشار کم او د دغه هېواد پر بندرونو لګېدلی بندیز لرې کړي، تهران چمتو دی چې د هرمز تنګی په اوو ورځو کې بېرته پرانیزي.
رویټرز د يوه لوړ پوړي ایراني چارواکي له قوله ويلي،چې که امریکا پر ایران پوځي فشار کم کړي او د دغه هېواد پر بندرونو خپله محاصره پای ته ورسوي، ایران کولای شي هرمز تنګی په اوو ورځو کې بېرته پرانیزي.
د طالبانو او ترکمنستان پلاويو په هرات کې له دوه ورځنیو خبرو وروسته دځمکني ترانسپورټ ګډ کمېسیون پر جوړولو هوکړه کړې ده. دواړه لوري د موټرچلوونکو او سوداګرو د ویزو د اسانه کولو، د لاجورد دهلېز د فعالولو او د ترانزیټي موټرو د تګ راتګ زیاتولو په اړه هم هوکړې ته رسېدلي دي.
د طالبانو د زندانونو چارو د تنظیم اداره وايي، چې د راتلونکو پنځو کلونو لپاره د ستراتیژیک پلان د جوړولو په موخه یې ناسته کړې ده. په دې ناسته کې د زندانونو د مدیریت، د بندیانو د اصلاح، هغوی ته د کاري فرصتونو برابرولو او د محبسونو د امنیت پر ټینګښت خبرې شوې دي.
د بدخشان ولایت ځایي سرچینې وایي، د دغه ولایت په خواهان ولسوالۍ کې د زکریا او عتیق الله په نومونو دوه ځوانان تېر ماښام په امو سیند کې د ډوبیدو له امله مړه شوي. سرچینې د پېښې د څرنګوالي په اړه نور جزئیات نه دي ورکړي.
کرملین اعلان وکړ چې له مسکو سره د جرمني د ښي اړخي ګوند «اې اف ډي» د خبرو اترو د دریځ هرکلی کوي. د روسیې د حکومت ویاند دیمیتري پیسکوف وویل، چې د دغه ګوند تګلاره د جرمني د لومړي وزیر فریدریښ ميرڅ له تقابلي دریځ سره توپیر لري او مسکو ته د منلو وړ ده.
د طالبانو د امارتي شرکتونو د ادارې مشر وایي چې په تېر یو کال کې د افغانستان د برېښنا رسونې په برخه کې شاوخوا ۷۴ میلیارده افغانۍ پانګونه شوې ده. د احمدجان بلال په وینا، دا پانګونه د برېښنا د تولید، د شبکې د پراختیا او د سبسټیشنونو د جوړولو لپاره شوې ده.
د کراچۍ په لویه پښتون مېشته سیمه بنارس کې د «کلثوم بايي وليکا» روغتون چارواکي وايي، له ۲۰۲۵ کال راهیسې په دغه روغتون کې ۷۸ کسان په اېچ ای وي ويروس اخته شوي، چې ډېری یې ماشومان دي. د سيمې خلک وايي، د يادو پېښو له رامنځته کېدو وروسته اوس د پټان کالونۍ په اړه ناسم تصور خپور شوی.
د تېر جمهوري نظام د ولسمشر لومړي مرستیال امرالله صالح ویلي، چې پاکستان له تېر یوه کال راهیسې پر افغانستان هوايي بریدونه کوي او هر برید ته «دقیق برید» وایي خو تر اوسه یې د یوه وژل شوي پاکستاني وسله وال مشر هویت نه دی په ډاګه کړی. صالح دغه بریدونه «له مخکې سانسور شوي» بللي دي.
د بلوچستان په نوشکي ولسوالۍ کې ناپېژاندو وسلهوالو د پولیو واکسین ټیم پر امنیتي ساتونکو ډزې کړې، چې له امله یې دوه پولیس وژل شوي دي. د پولیسو په وینا، پېښه د جمالاباد کلي په سیمه کې شوې ده.
له لوګر نه سرچینو افغانستان انټرنشنل- پښتو ته ویلي، چې د دغه ولایت د خوښۍ ولسوالۍ پخواني طالب ولسوال ولي الله خپله ځوانه لور له کوژدن سره د ټېلیفوني خبرو له کبله په ډزو وژلې ده. سرچینو ویلي، چې دغه کس د خپلې لور په جنازه کې هم ګډون نه و کړی.