آرشیف

د ایران د استخباراتو وزیر اسماعیل خطیب وايي، «سپاه پاسداران په نړۍ کې د ترهګرۍ ضد تر ټولو ستره او ځواکمنه مبارزه کوونکې اداره ده».

امریکا د داسې نړۍوال سوداګریز بلاک د جوړولو طرحه وړاندې کړې، چې موخه یې پر چین د اتکاء کمول او د نړۍ د اکمالاتي ځنځیرونو پیاوړتیا ده. د امریکا د ولسمشر مرستیال جي‌ډي ونس ویلي، چې غواړي له خپلو متحدانو سره په ګډه د مهمو منرالونو لپاره «د ترجیحي سوداګرۍ سیمه» جوړه کړي.

د بشري حقونو د څار سازمان په خپل کلني راپور کې په ایران کې د پراخو اعتراضونو پرمهال ډله‌ییزو وژنو ته په اشارې ویلي، چې ایراني چارواکو د ملي امنیت په پلمه ډله‌ييزې او خپل‌سرې نیونې زیاتي کړې دي.

د ایران د بشري حقونو سازمان په سراسري اعتراضونو کې د ۴۰ زره کسانو نیول کېدو ته په اشارې سره لیکلي، چې ډېری نیول شوي کسان له بهر سره د هر ډول اړیکو د پرې کېدو په حالت او مطلق بې‌خبرۍ کې دي.

د افغانستان لپاره د پاکستان پخوانی ځانګړی استازی اصف دُرانی وايي، طالبان د غېرمسوولانه پرېکړو او تګلارو له لارې افغانستان د تباهۍ او ناورين کندې ته برابروي.

د اوکراین ولسمشر ولادیمیر زېلېنکسي د فرانسې ۲ ټلوېزیون سره په تازه مرکه کې ویلي، چې له روسیې سره په روانه جګړه کې ۵۵ زره اوکرایني سرتېري وژل شوي دي.

د افغانستان د کرېکټ ملي لوبډلې د ۲۰۲۶ کال د شل اوریزو سیالیو نړۍوال جام له پیل وړاندې په خپله دویمه تمریناتي لوبه کې د وېسټ‌انډیز لوبډلې ته د ۲۳ منډو په توپیر ماتې ورکړه. دغه لوبه نن چهارشنبه (د سلواغې ۱۵مه) د هند په بنګلور ښار کې ترسره شوه.

د پاکستان لومړي وزیر شهباز شریف ویلي، چې په سیمه کې د روان کړکېچ د هوارولو او د ایران او امریکا ترمنځ د احتمالي جګړې د مخنیوي لپاره یې له ایران سره په بشپړه توګه د ورورګلوۍ رول ادا کړی دی.

د نړۍوالو مرستو پراخې بندېدو افغانستان د تېرو ۲۵ کلونو له تر ټولو ژور بشري ناورین سره مخ کړی دی. نیویارک ټایمز په خپل یوه راپور کې لیکلي، چې د مرستو ناڅاپي او «بې‌رحمانه» بندېدو میلیونونه افغان ماشومان له سختې لوږې او د مرګ له جدي ګواښ سره مخ کړي دي.

په ملګرو ملتونو کې د پاکستان استازي عاصم افتخار احمد د امنیت شورا په غونده کې ویلي، چې پر افغانستان د طالبانو له واکمنېدو وروسته د ټي‌ټي‌پي او بلوڅ ازادۍ پوځ په څېر ترهګرې ډلې بېرته فعالې شوې دي.

په ملګرو ملتونو کې د امریکا سفیر مایک والټز د چهارشنبې په ورځ د امنیت شورا په ناسته کې وویل، چې په افغانستان کې د داعش ګواښ په دوامداره توګه شتون لري او د مبارزې لپاره یې ګډې او همغږې نړۍوالې مبارزې ته اړتیا ده.

د ملګرو ملتونو لوړپوړي چارواکي الکساندر زویف د چهارشنبې په ورځ د امنیت شورا په غونډه کې خبرداری ورکړ، چې په افغانستان کې داعش خراسان څانګه لا هم د سیمې لپاره جدي ګواښ ګڼل کېږي. دا اندېښنه د طالبانو د ادارې له هغه دریځ سره په ټکر کې ده، چې وايي د داعش د ګواښ مخه یې نیولې ده.

د بشري حقونو د څار نړۍوال سازمان په یو تازه راپور کې خبرداری ورکړی، چې ډونالډ ټرمپ د امریکا د ډیموکراسۍ مهم بنسټ زیانمن کړی دی. په دغه راپور کې د کډوالو پروړاندې عملیات، د رايي ورکولو حقونو ته ګواښونه او ځینې نورې توند‌لارې پالیسۍ د دغه وضعیت اصلي لاملونه بلل شوي دي.

اکسیوس د لوړپوړو امریکایي چارواکو په حواله راپور ورکړی، چې د عربي او مسلمانو مشرانو له پرله‌پسې فشارونو وروسته په عمان کې د ایران او امریکا ناسته بیا تنظیم شوه.

د ایران د بهرنیو چارو وزیر وایي، د راتلونکې جمعې په ورځ به له امریکا سره د اټومي پروګرام په تړاو خبرې اترې وکړي. هغه ویلي، له عماني دولت څخه مننه کوي، چې د دې مذاکراتو لپاره یې زمینه برابره کړې. تر دې وړاندې اکسیوس راپور ورکړ، چې د امریکا او ایران ترمنځ کېدونکي مذاکرات لغوه شوي.

طالبان وايي، په کندهار کې یې پر ۱۲۰۰ راستنو شویو کډوالو کورنیو باندې غنم او نغدې پیسې او پر ۱۶۰۰ کورنیو یې بیا ژمني توکي وېشلي دي.

امریکایي څارنوالان وایي، دوی د رحمان‌الله لکڼوال پر وړاندې د اعدام سزا وغواړي. لکڼوال چې یو افغان وګړی دی، د امریکا د ملي ګارډ پر سرتېرو د ډزو او وژنې په تور تورن شوی دی. نوموړي د چهارشنبې په ورځ په فدرالي محکمه کې د لومړنۍ حاضرۍ پر مهال ځان بې‌ګناه وباله.

د طالبانو سترې محکمې ویلي، چې په کاپیسا ولایت کې یې یوه ښځه او یو نارینه د «زنا» په تور په عام محضر کې په دُرو وهلي دي.

اکسیوس راپور ورکړی، چې د امریکا او ایران ترمنځ د جمعې په ورځ کېدونکې مذاکرات لغوه شوې دي. ایران له امریکا څخه د مذاکراتو د ځای او د خبرو د بڼې د بدلون غوښتنه کړې وه، خو امریکا یې غوښتنه رد کړې ده.

د طالبانو د معیار او کیفیت ادارې مشر ملا فیض‌الله تمیم په کابل کې ښار کې د درملو له ۳ تولیدو فابریکو څخه لیدنه کړې او د هغوی د تولید بهیر یې له نږدې ارزولی دی. دا اداره ټینګار کوي، چې په افغانستان کې شته کارخونې باید معیاري درمل تولید کړي.

د قطر د بهرنیو چارو وزارت د یوې خبرپاڼې په خپرولو سره ویلي، چې د قطر او ایران د بهرنیو چارو وزیرانو په سیمه کې د کړکېچ د کمولو لپاره د روانو هڅو په تړاو ټلیفوني خبرې کړې دي.