د بلوچستان په نوشکي ولسوالۍ کې ناپېژاندو وسلهوالو د پولیو واکسین ټیم پر امنیتي ساتونکو ډزې کړې، چې له امله یې دوه پولیس وژل شوي دي. د پولیسو په وینا، پېښه د جمالاباد کلي په سیمه کې شوې ده.
له لوګر نه سرچینو افغانستان انټرنشنل- پښتو ته ویلي، چې د دغه ولایت د خوښۍ ولسوالۍ پخواني طالب ولسوال ولي الله خپله ځوانه لور له کوژدن سره د ټېلیفوني خبرو له کبله په ډزو وژلې ده. سرچینو ویلي، چې دغه کس د خپلې لور په جنازه کې هم ګډون نه و کړی.
په ننګرهار کې د طالبانو د امنیه قومندانۍ ویاند سید طیب حماد وايي، یو ځوان له خپل پلار سره د نصیحت پرمهال لفظي شخړه کړې او وروسته یې پلار په ډزو وژلی دی. نوموړی زیاتوي، ورته مهال یو بل ځوان وروسته له هغې ځان زندۍ کړی چې پلار یې هغه له بېځایه ګرځېدو منع کړی و.
د فراه ښار د درېیمې حوزې په سیمه کې یو کس لومړی زهرجن توکي خوړلي او وروسته یې ځان زندۍ کړی دی. که څه هم لاتراوسه د یادې پېښې انګېزه نهده روښانه شوې؛ خو طالبانو ویلي چې دغه کس پر نشهیي توکو روږدی و او په دې اړه یې پلټنې پیل کړې دي.
د فرانسې خبري اژانس د سېشنبې په ورځ د خپلو سرچینو په حواله راپور ورکړی، چې په تېرو دوو ورځو کې د یمني وسلهوالو او د سعودي عربستان د ځواکونو ترمنځ په جګړه کې ۱۵۴ کسان وژل شوي دي.
د بېلابېلو ولایتونو اوسېدونکو افغانستان انټرنشنل پښتو ته ویلي، چې له تېرو څو میاشتو راهیسې په تدریجي ډول د تېلو بیو لوړېدو سخت اندېښمن کړي دي. دوی وایي، طالبان نهدي توانېدلي چې په دغه موده کې د تېلو بیې مهار کړي.
په هرات کې د طالبانو د اطلاعاتو او فرهنګ ریاست د ګرځندوی رییس حافظ محمد قاسم اخندزاده وایي، د ۱۴۰۵کال په لومړیو شپږو میاشتو کې شاوخوا ۱۱زره کورنیو او بهرنیو سېلانیانو له اختیارالدین تاریخي کلا لیدنه کړې ده.
د ترکیې لوېدیځ مانیسا ولایت چارواکو ویلي، چې د دغه ولایت تورګوتلو ولسوالۍ کې د سهار شاوخوا اته بجې د یوې لېسې مخې ته د ډزو له امله لږترلږه اته کسان ټپیان شوي دي. د ټپیانو له ډلې د دوو کسانو روغتیايي وضعیت نازک ښودل شوی دی.
د طالبانو د اطلاعاتو او فرهنګ وزارت د خپرونو چارو معین حیات الله مهاجر فراهي پر افغانستان د پاکستان وروستي بریدونه غندلي او زیاته کړې یې ده، چې دغه بریدونه به بېځوابه پاتې نهشي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې د دوشنبې په ورځ له بېلابېلو لارو ۱۰۳۰ کډوال افغانستان ته ستانه شوي دي. د یاد کمېسیون د راپور له مخې، په همدې ورځ ۴۷ کورنۍ چې د غړو شمېر یې ټولټال ۳۰۲ کسان کېږي خپلو سیمو ته لېږدولي دي.
د ملګرو ملتونو د بشرې مرستو د همغږۍ دفتر (اوچا) وایي، په افغانستان کې ۲۱.۹ مېلیونه کسان بشري مرستو ته اړتیا لري؛ خو د روان کال د سپټمبر میاشتې نیمایي پورې د دغه مرستو لپاره یوازې ۳۱ سلنه اړینه بودجه تمویل شوې ده.
د بشري حقونو نړۍوال بنسټ (IHRF) په افغانستان کې د پاکستان هوايي بریدونو له امله د ملکي وګړو د مرګژوبلې په اړه ژوره اندېښنه څرګنده کړې. یاد بنسټ د دواړه خواوو ترمنځ د تاوتریخوالي د ژر کمښت غوښتنه کړې ده.
مقاومت جبهې خبر ورکړی، چې د یادې جبهې مشر احمد مسعود، صالح محمد ریګستاني د مقاومت جبهې د پوځي عملیاتو عمومي قوماندان ټاکلی دی. د مقاومت جبهې سېشنبه (د وږي ۳۱مه) پر اېکس پاڼه لیکلي، چې د احمد مسعود په حکم ریګستاني یادې دندې ته ټاکل شوی دی.
د پاکستان په راولپنډۍ ښار کې پولیسو د تحریک انصاف ګوند ۴۱ غړي او فعالان نیولي دي. د تحریک انصاف ګوند د راولپنډۍ څانګې مشر چوهدري امیر افضل ویلي، چې یاد کسان په تېرو دوو ورځو کې نیول شوي دي.
د امریکا ولسمشر ډونالډ ټرمپ د دوشنبې په ورځ (د وږي ۳۰مه) په نیویارک ښار کې له ښاروال زهران ممداني سره د هغه په رسمي استوګنځي کې وکتل. دا د ټرمپ او ممداني ترمنځ درېیمه او په نیویارک کې د دوی لومړۍ مخامخ لیدنه وه.
د طالبانو اړوندو رسنیو خبر ورکړی، چې د کاپیسا ولایت په تګاپ ولسوالۍ کې د یادې ډلې امنیتي مسوولینو د یوې کورنۍ د څلورو غړو د وژنې په تور یو کس نیولی. د طالبانو د ځایي ادارو په وینا، دغه کس یې تر پېښې څو ساعته وروسته د تګاپ او اله سای ولسوالیو ترمنځ په «درم درم» سیمه کې نیولی دی.
د ښځو ازادۍ شبکې د سولې نړۍوالې ورځې په مناسبت ویلي، چې تلپاتې سوله یوازې د جګړې او تاوتریخوالي په پای ته رسېدو نهشي رامنځته کېدای؛ بلکې ازادۍ، عدالت، برابرۍ او د بشري کرامت درناوي ته هم اړتیا لري او په افغانستان کې د ښځو له حضور پرته سوله نهشي ټینګېدای.
په ملګرو ملتونو کې د افغانستان دایمي استازی نصیر احمد فایق وایي، طالبان د افغانستان له سیاسي اړخونو څخه یوازې یو اړخ دی او نهشي کولای چې په یوازې ځان د دغه هېواد استازیتوب وکړي. هغه ویلي، افغان ښځې باید د افغانستان د راتلونکي سیاسي بهیر برخه اوسي.
د افغانستان د تکواندو، غېږنیونې، جودو او کورش لوبغاړي د ۲۰۲۶کال د ناګویا ۲۰م پړاو اسیایي لوبو کې د ګډون په موخه جاپان ته تللي دي. د دغه څلورو برخو ملي لوبغاړو، روزونکو او د تخنیکي کادر غړو تر سفر وړاندې د سیالیو لپاره د بشپړ چمتووالي خبر ورکړی و.
افغانستان انټرنشنل ته په لېږلو پیغامونو کې یوشمېر ښاریانو د غیرپلاني سیمو لپاره د ودانیزو جوازونو د ورکړې بهیر له درېدلو شکایت کړی او ویلي یې دي، د یادې پرېکړې له امله یې هغه دوسیې چې د اداري او تخنیکي پړاوونو ډېره برخه بشپړه کړې وه؛ له ناڅرګند برخلیک سره مخ شوې دي.
د کابل پوهنتون محصلانو افغانستان انټرنشنل ته په لېږلي پیغام کې ویلي، چې د لیلیې مودې کمېدو له ستونزو سره مخ کړي دي. د دوی په خبره، وړاندې محصلان په لیلیه کې د دوو کلونو لپاره اوسېدل؛ خو سږ کال دغه موده یو کال ته را کمه شوې ده.