د ازبکستان د سوداګرۍ او صنایعو خونې مشر دوران واحدوف ویلي، چې د ۲۰۲۶ کال د لومړیو څلورو میاشتو په ترڅ کې افغانستان ته د ازبکستان صادرات ۵۵۰ میلیونه امریکایي ډالرو ته رسېدلي. په اپریل میاشت کې ددې صاداراتو کچه ۱۶۰ میلیون ډالرو ته لوړه شوې ده.
د سویلي ولایتونو یو شمېر حاجیانو افغانستان انټرنشنل ته ویلي، چې طالبانو د حج فریضې اداکولو لپاره منظم ټرانسپورټ نه دی چمتو کړی او له حرم څخه ډیر لرې استوګنځایونه ورته نیول شوي دي.
په جرمني کې د افغان کډوالو د کار په اړه تازه شمېرې ښيي چې زرګونه افغانان اوس په بېلابېلو برخو کې کار کوي، خو لا هم د بېکارۍ او ټولنیزو مرستو اړتیا لوړه ده. د جرمني د کار ادارې په وینا، ۵۳ سلنه افغانان په ساده او مرستندویه چارو بوخت دي او ۴۲ سلنه یې مسلکي دندې کوي.
د خېبر پښتونخوا سر وزیر سهیل اپریدي ویلي، چې له زندانه د پاکستان د تحریک انصاف ګوند بنسټګر او پخواني لومړي وزیر عمران خان د خلاصون لپاره له سیاسي مشرانو سره خبرې روانې دي؛ ترڅو اسلاماباد ته د ګډ احتجاجي لاریون تګلاره جوړه شي.
د ملګرو ملتونو د خوړو نړۍوال پروګرام وايي، افغانستان په نړۍ کې د اقلیمي بدلون پر وړاندې شپږم ترټولو زیان منونکی هېواد دی چې پرلهپسې وچکالیو، سېلابونو، سختې ګرمۍ او د خوړو د خوندیتوب له زیاتېدونکو ګواښونو سره مخ دی.
د بښنې نړۍوال سازمان د پنجشنبې په ورځ (د غویي ۱۷مه) د یوې خبرپاڼې په خپرولو سره ویلي، پاکستان دې په پوځي محکمو کې د ملکي کسانو محاکمه ودروي او هغه سزاوې دې ختمې کړي چې د دغه محکمو لهخوا ورکړل شوې دي.
د طالبانو د معیار او کیفیت ادارې د پنجشنبې په ورځ (د غویي ۱۷مه) خبر ورکړی، چې د شیخ ابونصر فراهي بندر له لارې یې ۱۰۳ ټنه بېکیفیته ودانیز توکي چې له کورنیو معیارونو سره یې سمون نه لورد؛ بېرته صادرونکي هېواد ته ګرځولي دي.
د خيبر پښتونخوا ایالتي حکومت د چهارشنبې په ورځ له بېړنيو چارو پرته په ټول ایالت کې د دولتي چارو د درولو لپاره بشپړ اداري اعتصاب وکړ. دغه يو ورځنی اعتصاب د خيبر پښتونخوا د سر وزير سهيل اپریدي په امر د پاکستان د مرکزي حکومت د تګلارو پرضد شوی دی.
د روسیې د بهرنیو چارو وزارت ویاندې ویلي، مسکو ټولو ډیپلوماتیکو استازولیو او نړۍوالو سازمانونو ته پر کیف د احتمالي پراخ غچاخیستونکي برید خبرداری ورکړی او ترې غوښتنه یې کړې چې ژر تر ژره دې د اوکراین پلازمېنه پرېږدي. ماریا زاخارووا ویلي، چې د مسکو خبرداری باید جدي ونیول شي.
د پاکستان تحريک انصاف ګوند ويلي، د پخواني لومړي وزير عمران خان مېرمن بشرا بيبي تېره شپه په پټه له اډياله زندانه روغتون ته لېږدول شوې او څو ساعته وروسته بېرته زندان ته ستنه کړای شوې ده. یاد ګوند دغه چاره له بشري حقونو ښکاره سرغړونه بللې ده.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۱۳ کوډګر نیولي دي. د یاد وزارت په وینا؛ دغه کوډګر یې په سرپل، نورستان، بلخ، پکتیکا، تخار، کابل او فاریاب ولایتونو کې نیولي دي.
د جمهوري نظام پرمهال د ولسمشر ویاند او سلاکار وحید عمر له پخواني ولسمشر محمداشرف غني سره خپل اخیستل شوی ګډ انځور خپور کړی او ورسره یې لیکلي، ډاکټر غني يو عالم انسان و چې افغانستان ته یې روښانه او عملي پلان لاره. د هغه په وینا؛ «اوس دی هم بندي مهاجر دی او زه هم قیدي مهاجر یم».
د طالبانو د کډوالو او بېرته راستنېدونکو چارو وزارت د پنجشنبې په ورځ (د غویي ۱۷مه) خبر ورکړی، په روانه اونۍ کې ۴۹۱ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته د تورخم او سپین بولدک له لارې بېرته افغانستان ته ستانه شوي دي.
د کابل یو ښوونکی وایي، له نږدې دوو میاشتو راهیسې هیڅ ښوونکي ته تنخوا نهده ورکړل شوې او له همدې کبله دوی له جدي اقتصادي ستونزو سره مخ دي. دغه ښوونکي افغانستان انټرنشنل ته د یوه پیغام په لېږلو سره ویلي، چې د تنخوا ځنډېدو له امله د ژوند ورځني لګښتونه ورته ستونزمن شوي.
د طالبانو د روغتیا وزیر نور جلال جلالي په افغانستان کې د ماشومانو ملاتړ صندوق (یونېسف) له مشر ډاکټر تاج الدین اوېلا سره په لیدنه کې ویلي، هڅه کوي د هېواد ټولو برخو ته عادلانه او اغېزمن روغتیايي خدمتونه ورسوي.
د طالبانو د کورنیو چارو وزارت خبر ورکړی، چې په تېرو ۲۴ ساعتونو کې یې په ۷ ولایتونو کې د «غلا، وژنې او له کوره د تېښتې» په تور ۲۶ کسان نیولي دي. یاد وزارت زیاته کړې، چې دغه کسان یې په هلمند، بدخشان، ننګرهار، غور، سمنګان، نیمروز او خوست ولایتونو کې نیولي دي.
په بغلان کې د طالبانو د صنعت او سوداګرۍ رییس محمد نعیم همکار وایي، دامهال د دغه ولایت په کچه ۷۷ لویې او کوچنۍ تولیدي کارخونې فعالیت لري چې پهکې شاوخوا ۷زره کسانو ته د کار زمینه برابره شوې ده.
د ایران د پارلمان د ملي امنیت او بهرني سیاست د کمېسیون ویاند ابراهیم رضایي هغه راپورونه رد کړل، چې ګواکې د امریکا او ایران ترمنځ کومه هوکړه شوې ده. نوموړي ویلي، چې دغه راپورونه حقیقت نهلري.
په کندهار کې د طالبانو د بهرنیو چارو رییس فض الحق شاکر په یوې غونډه کې ویلي، د هغه ټولنې به څه حال وي چې ښځې یې «یاغیانې او ځوانان یې فاسقان وي چې ږېرې خروي». نوموړي زیاته کړې، په دغه هېواد کې په تېرو شلو کلونو کې داسې ظلمونه وشول چې هیڅ د بښلو نه وو.
د پاکستان حکومت لهخوا د افغان کډوالو د اېستلو تر پرېکړې وروسته د پېښور سترې محکمه کې د افغان کډوالو لهخوا د عریضو په شمېر کې د پام وړ زیاتوالی راغلی دی. د پېښور سترې محکمې د سرچینو په وینا؛ له تېر ۲۰۲۵کال راهیسې د بېلابېلو لاملونو له امله تر ۶زرو زیاتې عریضې ثبت شوې دي.
په پاکستان کې د نرښځیانو ټولنه له تاوتریخوالي، توپیري چلند او د ایډز ناروغۍ زیاتېدونکي ګواښ له امله شکایت کوي. راپورونه ښيي، چې له ۲۰۱۵کال راهیسې په خیبر پښتونخوا کې ۱۵۷ نرښځیان وژل شوي، چې یوازې په تېر ۲۰۲۵کال کې اته د وژنې پېښې ثبت شوې دي.