د هرات په ګذرګاه کې د خواجه عبدالله انصاري تاریخي جومات د ۱۰۷ مېلیونه افغانیو په لګښت بیا ورغول شو. د طالبانو مرستیال ویاند حمدالله فطرت ویلي، جومات په دوو پوړونو کې جوړ شوی چې ۳زره متر مربع مساحت لري او د شاوخوا ۱۰زره لمونځ کوونکو د ځایولو ظرفیت لري.
د طالبانو د کورنیو چارو وزارت خبر ورکړی، د کندهار د احمدشاه بابا په نړۍوال هوايي ډګر کې د یادې ډلې سرحدي شرطې هغه کس نیولی چې غوښتل یې ۸زره او ۲۶۰ ګرامه سره زر په ناقانونه توګه له افغانستان نه بهر ولېږدوي.
ملګري ملتونه وايي، چې په افغانستان کې د ماشومانو د لوږې کړکېچ د لا خرابېدو په حال کې دی او ۳.۷ مېلیونه ماشومان له سختې خوارځواکۍ سره مخ دي. د دغه راپور له مخې، له ۳.۷ مېلیونه خوارځواکو ماشومانو څخه یو مېلیون یې د خوارځواکۍ له سختې او خطرناکې بڼې سره مخ دي.
ناپېژانده وسلهوالو د خېبر پښتونخوا په اورکزیو ولسوالۍ کې د جمیعت علماى اسلام ګوند یو جګپوړی غړی حاجي الرحمان په ډزو وژلی دی. ځايي چارواکي وایي، دغه پېښه په بر اورکزیو کې هغه مهال شوې چې دوو مخ پټو وسلهوالو پر حاجي الرحمان برید وکړ.
د ښځو پر کار تر بندیز وروسته په کندهار کې ښځینه خبریالانې او د رسنیو کارکوونکې له سختو اقتصادي او رواني ستونزو سره مخ دي او د محدودیتونو له امله ان خپل غږ هم نهشي پورته کولای. وړاندې په کندهار کې تر ۵۰ زیاتې ښځینه خبریالانې پر کار بوختې وې؛ خو اوس یې غږ خاموش شوی.
د طالبانو د کډوالو او بېرته راستنېدونکو چارو وزارت وايي، په روانه اونۍ کې ۳۸۹ افغان کډوال چې په پاکستان کې بندیان وو ازاد او خپل هېواد ته ستانه شوي دي. یاد وزارت ویلي، چې دغه کسان د ننګرهار او کندهار له لارو ستانه شوي او خپلو مېنو ته لېږدول شوي دي.
د ملګرو ملتونو د بشري چارو د همغږۍ دفتر (اوچا) وايي، په افغانستان کې د ۲۰۲۶کال د جولای په میاشت کې د بشري مرستو رسولو پر وړاندې ۳۰ پېښې ثبت شوې دي چې د جون د ۶۰ پېښو پرتله ۵۰ سلنه کموالی ښيي. د اوچا په وینا، په دې موده کې د دوی دوه کارکوونکي هم نیول شوي دي.
د اروپايي ټولنې د بشري مرستو همکاره دوروتیا وايي، په داسې حال کې چې په روانه اونۍ کې د نړۍ مېلیونونه ماشومان ښوونځیو ته ځي؛ په افغانستان کې مېلیونونه ماشومان له زدهکړو بېبرخې او د ښوونځي د عمر نیمايي ماشومان اوسمهال ښوونځي ته نه ځي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو روانه اوونۍ د افغانستان په بېلابېلو ولایتونو کې۲۳ کوډګر نیولي دي. د یاد وزارت په وینا؛ دغه کوډګر یې په غزني، سرپل، پروان، کابل، دایکنډی، بلخ او تخار ولایتونو کې نیولي دي.
په کندهار کې د طالبانو د کرنې ریاست ویاند محمدحنیف حقمل وایي، په دغه ولایت کې د لمرګلي ازمایښتي کرکېله زیاته شوې او دامهال پر ۲۰۰ جریبه ځمکه دغه کښت کرل شوی دی. نوموړي زیاته کړې، چې له دغه بوټي څخه به ډېر ژر د غوړو د تولید یوه کارخونه هم جوړه شي.
سکای نیوز د چهارشنبې په ورځ (د وږي ۲مه) په خپور کړي راپور کې ویلي، چې د طالبانو له بیا واکمنېدو وروسته یوشمېر پخواني افغان سرتېري او پولیس د بېکارۍ او بېوزلۍ له امله د ژوند د دوام لپاره په خطرناکو کانونو کې پر کار بوخت دي.
د خیبر پښتونخوا په مرکز پېښور کې د پراخو امنیتي اندېښنو له امله د ټولو خصوصي لیلیو د څار بهیر پیل شوی دی. پولیسو د لیلیو له مسوولانو غوښتي، چې په دغه لیلیو کې د مېشتو افغانانو او محصلانو په ګډون د ټولو اوسېدونکو بشپړ معلومات له دوی سره شریک کړي.
د افغانستان د سوداګرۍ او پانګونې خونې په کوربهتوب د افغان او روسي سوداګرو ترمنځ دوه اړخیزه سوداګریزه ناسته ترسره شوې، چې په پایله کې یې د دواړو هېوادونو د سوداګرو ترمنځ د ۱۴.۵ مېلیون ډالرو په ارزښت هوکړهلیکونه لاسلیک شوي دي.
د پاکستان د کورنیو چارو وزیر محسن نقوي په لندن کې د برېتانیا د بهرنیو چارو له وزیر سټیفن ډوټي سره لیدلي دي. په دغه لیدنه کې دواړه خواوو د افغانستان په ګډون د سیمې پر امنیت او ثبات خبرې کړې دي.
د ملګرو ملتونو په جینوا دفتر کې د افغانستان استازی نصیر احمد اندېشه وايي، طالبانو «د ملي دي او ملي نهدي» په نوم د هویتي او دیني ګډودۍ لوبه روانه کړې ده. وړاندې یوشمېر طالب چارواکو ویلي و، چې پرته له «دري او پښتو» په ننني افغانستان کې د «ملي» په نوم څه نهشته.
د سره صلیب نړۍوالې کمېټې عملیاتي مشرې یاسمین پراز ویلي، د خوست د ځاځي میدان ولسوالۍ چې له ډیورنډ کرښې د پنځو کیلومترو په کم واټن کې موقعیت لري؛ د طالبانو او پاکستان ترمنځ وروستیو نښتو د یادې سیمې پر ملکي وګړو سخت اغېز کړی دی.
د طالبانو له بیا واکمنېدو وروسته افغانستان له ګڼو ننګونو سره مخ دی، چې له مهمو هغو څخه یې نړۍواله انزوا او د نړۍوالو مرستو کمښت بلل کېږي. سکای نیوز په خپل تازه راپور کې ویلي، د نجونو پر زدهکړو بندیز او پر ښځو پراخ محدودیتونه د افغانستان د نړۍوالې انزوا له مهمو لاملونو څخه دي.
د ملګرو ملتونو د ماشومانو ملاتړ صندوق (یونېسف) اټکل کړی، چې په یوه کال کې په ۲۱ هېوادونو کې شاوخوا ۲۰ مېلیونه انټرنېټ کاروونکي ماشومان په انلاین ډول له جنسي ځورونې سره مخ شوي دي. د راپور شویو پېښو نږدې ۶۰ سلنه په خواله رسنیو کې رامنځته شوې دي.
هغه الوتکه چې د امریکا د کورني امنیت وزیر مارک وین مولن یې لېږداوه، د واشنګټن په رونالډ رېګن ملي هوايي ډګر کې د تخنیکي ستونزې او د یوه انجن د خرابېدو له امله بېړنۍ ناستې کړې ده. دغه الوتکه له جورجیا نه د واشنګټن په لور روانه وه.
د بلوچستان د نوشکي ولسوالۍ د احمدوال په خاران کراس سیمه کې پر یوه موټر د ډزو له امله یو افغان وژل شوی او درې کسان ټپیان دي. د سرچینو په وینا، مړی او ټپیان د نوشکي ولسوالۍ تدریسي روغتون ته لېږدول شوي دي.
د افغانستان د کیوکوشین کراټې ملي لوبډلې پخوانی غړی عبدالله عزیزي په هرات ولایت کې په یوې ترافیکي پېښه کې مړ شوی. د افغانستان د کراټې فدراسیون د دغه ۲۵ کلن لوبغاړي مړینه تایید کړې او د خواخوږۍ پیغام یې هم خپور کړی دی.