د طالبانو د ۲۰۷ الفاروق قول اردو قوماندان عبدالقیوم روحاني له ایران سره پر پوله د سرحدي امنیتي پوستو او سړکونو پر ژر جوړېدو ټینګار کړی. نوموړي د یادې ډلې له سرحدي قطعاتو څخه غوښتنه کړې، چې خپلمنځي همغږي پراخه کړي.
د بښنې نړۍوال سازمان د پښتون ژغورنې غورځنګ د دوو مخکښو غړو حنیف پښتین او نورالله ترین جبري بېدرکه کېدو په اړه اندېښنه څرګنده کړې او د خیبر بښتونخوا له سر وزیر سهیل اپریدي یې غوښتي، چې حنیف پښتین او نورالله ترین سملاسي خوشې کړي.
د طالبانو د کور او ښار جوړولو وزارت خبر ورکړی، چې د دغه وزارت لپاره د یادې ډلې وزیر مولوي نجیبالله حیات حقاني ننګرهار ولایت ته د سفر پر مهال پر ۳۳۵ راستنو شویو کډوالو کورنیو د استوګنې نمرې وېشلې دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې د چهارشنبې په ورځ له ایران او پاکستان نه ۹۰۲ کډوالې کورنۍ چې ټولیز شمېر یې ۴زره او ۷۸۲ کېږي؛ په جبري توګه افغانستان ته ستنې شوې دي.
د افغانستان پخواني ولسمشر حامد کرزي د ملګرو ملتونو د ماشومانو ملاتړ صندوق (یونېسف) پر وروستي راپور د اندېښنې په څرګندولو ویلي، چې پر زدهکړو د بندیز دوام او د ښوونځیو او پوهنځیو تړل پاتې کېدل به ملي وړتیاوې کمزورې کړي او بهرنیو هېوادونو ته به د افغانستان د جدي اړتیا لامل شي.
د خیبر پښتونخوا سر وزیر سهیل اپریدي په پېښور کې یوې غونډې ته د وینا پرمهال ویلي، چې د افغانستان اوږدې جګړې له زدهکړو د یوه نسل بېبرخې کېدو په ګډون پښتونخوا ته درانه هر اړخیز زیانونه اړولي دي.
په بدخشان کې د طالبانو تر کنټرول لاندې له پېښو سره د مبارزې او چمتووالي رییس محمداکرم اکبري ویلي، چې د دغه ولایت د شهربزګ ولسوالۍ اویر کلي پستاو سیمه کې د غر ښويېدنې له کبله پنځه کسان مړه شوي دي. د هغه په وینا؛ دغه پېښه نن سهار پنځه بجې رامنځته شوې ده.
د طالبانو د امنیتي او تصفیوي چارو مرکزي کمېسیون ناسته د طالبانو د دفاع وزیر او د دغه کمېسیون د رییس ملا یعقوب په مشرۍ ترسره شوه. د طالبانو اړوندو رسنیو د راپور له مخې؛ په یاده غونډه کې د «دفاعي او امنیتي وضعیت» ارزونه وشوه.
اوکرایني چارواکو د پنجشنبې په ورځ (د غویي ۱۰مه) خبر ورکړی، چې د اوکراین پر سویلي ښار اوډیسا د روسیې په ډرون بریدونو کې لږترلږه ۱۸ کسان ټپیان شوي او ګڼې استوګنیرې ودانۍ زیانمنې شوې دي.
د طالبانو د ټولګټو چارو وزارت خبر ورکړی، په تېرې وري میاشت کې د اوسپنې پټلۍ له لارې ۸۷۳زره او ۹۸۱ مټریک ټنه انتقالات شوي دي. د دغه وزارت په وینا؛ یاد انتقالات د حیرتان، اقينې، تورغونډۍ او خواف-هرات بندرنونو له لارې شوي دي.
د بېپولې خبریالانو سازمان د ۲۰۲۶کال لپاره د مطبوعاتو د ازادۍ نړۍوال شاخص خپور کړی. د طالبانو تر واک لاندې افغانستان د ۱۸۰ هېوادونو له ډلې ۱۷۵م ځای خپل کړی، افغانستان تېرکال هم ۱۷۵م ځای خپل کړی و. افغانستان په تېرو پنځو کلونو کې د مطبوعاتو د ازادۍ په شاخص کې ۵۳ درجې شاتګ کړی دی.
د خیبر پښتونخوا ایالت د نوشهره ولسوالۍ ځايي چارواکو لهخوا د افغان کډوالو درې پنډغالي په بشپړ ډول تړل شوي دي. د ځايي چارواکو د معلوماتو له مخې؛ په دغه پنډغالو کې ۴۲زره افغان کډوال مېشت وو، چې له دې ډلې ۴۰زره یې افغانستان ته ستانه شوي او پاتې ۲زره کډوال د ستنېدو په حال کې دي.
ځایي سیمهييزو سرچینو افغانستان انټرنشنل - پښتو ته خبر ورکړی، چې پاکستاني پوځیانو د ننګرهار پر ګوشتې ولسوالۍ توغندیز بریدونه پيل کړي. سرچینو ویلي، دغه بریدونه نن سهار پيل شوي چې له امله یې خلک د خپلو مېنو پرېښودو ته اړ شوي دي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۱۱ کوډګر نیولي دي. د یاد وزارت په خبرپاڼه کې راغلي، چې نیول شوي کوډګر عدلي او قضایي ارګانونو ته ور پېژندل شوي دي.
د خیبر پښتونخوا د خیبر ولسوالۍ د لنډي کوتل مرستیال کمېشنر انعامالله وزیر افغان کډوالو ته ویلي، چې په یوه اونۍ کې خپل کاروبارونه راټول کړي او له یادې سیمې ووځي. نوموړي خبرداری ورکړی، که څوک له ټاکلې مودې وروسته هم په یادې سیمه کې پاتې شي؛ نو پر وړاندې به یې سخت قانوني چلند وشي.
د طالبانو اړوندو رسنیو راپور ورکړی، چې له تېر مازېګر راهيسې پاکستاني ځواکونو د کونړ ولايت پر دانګام ولسوالۍ بريدونه پيل کړي چې ګڼې مرمۍ د ملکي خلکو پر کورونو لګېدلې دي. د راپور له مخې؛ په دغه بریدونو کې یو ملکي وګړی وژل شوی او ۳ نور ټپیان دي.
په سمنګان کې د طالبانو د امنیې قوماندانۍ ویاند حشمتالله رحماني خبر ورکړی، چې د دغه ولایت په ښار او ولسوالیو کې یې د «غلا» په تور لس کسان نیولي دي. نوموړي زیاته کړې، چې نیول شوي کسان به د قضیو تر بشپړېدو وروسته قضایي ادارو ته وسپارل شي.
د طالبانو د کډوالو او بېرته راستنېدونکو چارو وزارت د پنجشنبې په ورځ (د غویي ۱۰مه) خبر ورکړی، چې په روانه اونۍ کې ۵۲۷ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته د تورخم او سپین بولدک له لارې بېرته افغانستان ته ستانه شوي دي.
په پاکستان کې د بیان ازادۍ او د خبریالانو خوندیتوب بنسټ «فریډم نېټ ورک» په خپل کلني راپور کې ويلي، چې په پاکستان کې د ۲۰۲۵کال له اپرېل څخه د ۲۰۲۶کال تر مارچ میاشتې پورې د بیان ازادۍ فضا د بېلابېلو قانوني، تنظیمي او اقتصادي فشارونو له امله خورا محدوده شوې ده.
په لوګر کې د طالبانو رسنیز دفتر خبر ورکړی، چې د دغه ولایت په حصارک سیمه کې د یوې کورنۍ د ۴ غړو د وژنې په تور دوه کسان نیول شوي دي. تېره دوشنبه په یاده سیمه کې د یوې ښځې او دوو ماشومانو په ګډون د یوې کورنۍ ۴ غړي وژل شوي وو.
د وال سټریټ ژورنال د راپور له مخې؛ امریکا هڅه کوي چې د سمندري تګراتګ له خنډونو وروسته د هرمز تنګي له لارې د کښتیو د تېرېدو ډاډ ترلاسه کولو لپاره یوه نوې نړۍواله ټلواله جوړه کړي. دغه نوښت په سیمه کې د زیاتېدونکي تاوتریخوالي او د نړۍوالې انرژۍ امنیت په اړه د اندېښنو په لړ کې راځي.