د پاکستان لومړي وزیر شهباز شریف د سېشنبې په ورځ د قرغزستان په پلازمېنه بشکېک کې د شانګهای د همکارۍ سازمان په غونډه کې وویل، تر هغو چې ترهګرې ډلې د افغانستان له خاورې څخه پر پاکستان او نورو ګاونډیو هېوادونو د بریدونو لپاره کار اخلي، په سیمه کې د تلپاتې سولې ټینګښت ناشونی دی.
د افغانستان د خبریالانو مرکز وایي، شکیب نظري چې د جاپان د «اېنټيوي» ټلوېزیون ځایي خبریال و، د طالبانو د بګرام په زندان او د استخباراتو په توقیفځایه کې تر شاوخوا یو کال او یوې میاشتې بند تېرولو وروسته خوشې شوی دی.
د افغانستان لپاره د پاکستان ځانګړي استازي محمد صادق خان د چین له ځانګړي استازي یو شیاویونګ او د هغه له مل پلاوي سره اسلام اباد کې لیدلي او دواړو لوریو د سیمې د امنیتي وضعیت د بدلون او د ترهګرو ډلو د مخ په زیاتېدونکي ګواښ په اړه خبرې کړې دي.
د ارجنټاین لوبډلمشر لیونل مسي چې ارجنټاین یې په ۲۰۲۲ کال کې د فوټبال نړیوال جام اتلولۍ او په ۲۰۲۶ کال کې پایلوبې ته ورساوه، د دوشنبې په ورځ اعلان وکړ چې نور به د خپل هېواد ملي لوبډلې لپاره نه لوبېږي.
افغان ورزشکار نادر صوفيزاده د قرغیزستان په کوربهتوب د ۲۰۲۶ کال په نړیوالو سیالیو کې د ازاد کورش په برخه کې د برونزو مډال ترلاسه کړ. صوفيزاده دغه مډال د ایټالیا، جورجیا او ارمینیا لوبغاړو ته تر ماتې ورکولو وروسته وګاټه.
د طالبانو د لوړو زده کړو وزیر ندا محمد ندیم ددغه وزارت د شورا په غونډه کې د مولوي هبت الله د فرمانونو پر تطبیق ټینګار کړی دی. نوموړي له طالب چارواکو وغوښتل چې د «جهاد اهداف» هېر نه کړي او معنوياتو ته پر مادیاتو لومړیتوب ورکړي.
د بدخشان لپاره د طالبانو نوي والي رحمتالله «نجیب» د رسمي مراسمو په ترڅ کې خپله دنده پیل کړه. نوموړی د مخکیني والي محمداسماعیل «غزنوي» پر ځای ټاکل شوی او د معرفي کیدو په مراسمو کې یې د طالبانو یو شمېر لوړپوړو چارواکو ګډون کړی و.
د ایران ولسمشر مسعود پزشکیان د شانګهای همکارۍ سازمان په څنډه کې د روسیې له ولسمشر ولادیمیر پوتین سره په لیدنه کې ویلي، چې که امریکا د اسلام اباد پرېکړه لیک ته ژمنه پاتې شي، نو ایران به دغه هوکړه لیک رعایت کړي.
د شانګهای همکاریو سازمان غړو هېوادونو په خپله ګډه اعلامیه کې ویلي، چې په افغانستان کې د تلپاتې سولې د ټینګښت لپاره داسې ټولشموله حکومت اړین دی چې د ټولو قومي او سیاسي ډلو پراخ استازیتوب پکې وشي.
د طالبانو د برېښنا شرکت وايي، چې له ترکمنستان څخه افغانستان ته وارداتي برېښنا چې د یوې تخنیکي ستونزې له امله پرې شوې وه، د ستونزې له اساسي حل وروسته بيا ځلې وصل شوې ده. د شرکت په وینا، اوس په اغېزمنو شويو سيمو کې د برېښنا بهیر عادي حالت ته راګرځي.
د هند لومړی وزیر نریندرا مودي وايي، د افغانستان سوله او ثبات د یوې سولهییزې او خوندي یورواسیا لپاره د ګډې هیلې له تحقق سره نږدې تړاو لري او هند به له افغانانو سره خپلو پراختیايي او بشري مرستو ته دوام ورکړي.
د طالبانو د ریاست الوزرا داداري مرستیال عبدالسلام حنفي په مشرۍ په افغانستان کې د لویې لاې (موټروې) د جوړولو د طرحې په اړه ناسته کړې ده. طالبانو ویلي، چې په دې ناسته کې د موټروې د جوړولو په اړه لازم تصمیمونه نیول شوي دي.
پاکستان د لومړي ځل لپاره د شانګهای همکاریو سازمان دورهیي مشري ترلاسه کړه او ټاکل شوې چې د ۲۰۲۷ کال د دغه سازمان د غړو هېوادونو سرمشریزه په اسلاماباد کې جوړه شي.
د جرمني د کورنیو چارو فدرالي وزارت د سې شنبې په ورځ ویلي چې ۲۲ نور افغانان یې، چې په جرمني کې په جنايي جرمونو کې ښکېل بلل شوي، کابل ته استولي دي.
د ازبکستان ولسمشر شوکت میرضیایف وايي، په افغانستان کې د سولې او ثبات ساتل د مرکزي اسیا او ټولې سیمې د امنیت او پرمختګ لپاره بنسټیز اهمیت لري او باید افغانستان په سیمهییزو رغنده بهیرونو کې مدغم شي.
د طالبانو د اقتصادي کمېسیون نوبتي غونډې چې د دې ډلې د ریاست الوزرا د اقتصادي مرستیال عبدالغني برادر په مشرۍ شوې، د مالیې وزارت پر ملکیت د ۱۶۲ میلیونه افغانیو په لګښت د اته پوړیز سوداګریز مارکېټ د جوړېدو طرحه تایید کړې ده. د طرحې له مخې، دغه مارکېټ به ۵۶۰ دوکانونه ولري.
په کابل کې د روسیې سفارت خبر ور کړی، چې د روسي وګړو لپاره یې د روسیې د فدرالي اسمبلۍ دولتي دوما د نهمې دورې د استازو د ټاکنو په موخه د رایې ورکولو مرکز جوړ کړی. دا مرکز به د ۲۰۲۶ کال د سپټمبر پر ۲۰مه د روسیې د سفارت په ودانۍ کې د سهار له ۸ د ماښام تر ۸ بجو پورې پرانیستی وي.
د چین ولسمشر شي جینپینګ وايي، هېواد یې چمتو دی چې د افغانستان په ګډون د سیمهییزو او نړیوالو کړکېچونو د سیاسي حل لپاره له ټولو اړخونو سره اړیکې او همغږي پیاوړې کړي.
د طالبانو د اوبو او انرژۍ وزارت خبرداری ورکړی چې د وږي له ۱۱مې تر ۱۳مې پورې د سختو ورښتونو او د واورو د وېلې کېدو له امله په ننگرهار، لغمان، کونړ، نورستان، خوست، پکتیا او لوګر ولایتونو کې د سیندونو د اوبو د کچې د لوړېدو او سېلابونو بهېدو احتمال دی.
د طالبانو په اداره کې د غصب شویو ځمکو د مخنیوي کمېسیون د عدلیې وزیر عبدالحکیم شرعي په مشرۍ په کابل، خوست، نورستان او ارزګان ولایتونو کې د زرګونو جریبو ځمکو د ارزولو خبر ور کړی دی.
په کندهار کې د طالبانو له امنیه قوماندانۍ څخه سرچینو افغانستان انټرنشنل ته ویلي، چې له تېرو دوو میاشتو راهیسې د یادې ډلې پولیسو ته معاشونه نه دي ورکړل شوي. په ورته مهال په کندهار ښار کې هټیوال شکایت کوي چې طالبان توکي په پور ترې اخلي.