په عراق کې مېشتو یو شمېر افغان ځوانانو افغانستان انټرنشنل ته خپل پیغامونه استولي او وايي، په دې وروستیو کې ګڼ شمېر افغانان د کار موندنې په موخه دغه هېواد ته تللي، خو ډېری یې د قانوني اسنادو د نشتوالي له امله په زندانونو کې په بد وضعیت کې شپې سبا کوي.
د طالبانو د اطلاعاتو او کلتور وزارت چارواکي وايي، چې د بغلان ولایت په «جلوگیر» سیمه کې یې یوه لرغونې کلا موندلې ده چې ددوی په وینا، شاوخوا دوه زره کاله تاریخي لرغونتوب لري.
د طالبانو د بهرنیو چارو وزیر مولوي امیر خان متقي د روسیې د ولسمشر له ځانګړي استازي ضمیر کابلوف سره کتلي. د طالبانو د بهرنیو چارو وزارت په وینا، کابلوف په دې لیدنه کې ویلي چې مسکو له کابل سره د اقتصادي همکاریو عملي بڼې ته چمتو دی.
د پکتیکا د یحیا خېلو ولسوالۍ قومي مشرانو او طالبانو په ګډه په دې ولسوالۍ کې د ولور اندازه ۳۰۰ زره افغانۍ ټاکلې ده. دوی خبرداری ور کړی، چې که څوک له دې پرېکړې سرغړونه وکړي نو ۵۰۰ زره افغانۍ به جریمه شي. د ا پرېکړه د ملاهبت الله د فرمان پر بنسټ شوې ده.
د بحرین د ترهګریزو جرمونو د څارنوالۍ رییس ویلي چې د دغه هېواد لوړې جزايي محکمې د جاسوسۍ په دوو بېلابېلو قضیو کې پنځو کسانو ته د عمر بند سزا اورولې، چې دوه تنه پکې افغانان دي. پر دغو کسانو تور دی، چې د ایران سپاه پاسداران ته یې جاسوسي کوله.
د طالبانو د لوړو زده کړو وزیر ندا محمد ندیم د کونړ په اسعداباد ښار کې د سید جمال الدین افغاني پوهنتون د وروستۍ پېښې د ټپي شویو محصلانو د پوښتنې پر مهال ویلي، چې دوی کمزوري نه دي، خو غچ به «د وخت په تناسب» اخلي.
د طالبانو د بهرنیو چارو وزارت اعلان وکړ، چې په کابل کې یې د پاکستان د سفارت شارژدافیر عبیدالرحمان نظاماني احضار کړی او پر کونړ پوهنتون او نورو ملکي او عامه تاسیساتو د پاکستان د بریدونو په تړاو یې خپل احتجاجلیک ورسپارلی دی.
د افغانستان د بشري حقونو د وضعیت لپاره د ملګرو ملتونو ځانګړی راپور ورکوونکی ریچارډ بېنېټ وايي، چې د افغانستان د وروستۍ پېښې عاملان باید د خپلو کړنو مسوول وګرځول شي. بېنېټ زیاته کړې، چې د وروستیو او پخوانیو پېښو بېړنیو، خپلواکو او هر اړخیزو څېړنو اړتیا ده.
د پاکستان دفاع وزیر خواجه اصف د قرغزستان په بېشکک ښار کې د شانګهای همکارۍ سازمان د دفاع وزیرانو غونډې په څنډه کې د ایران، چین، قزاقستان او تاجکستان له لوړپوړو دفاعي چارواکو سره لیدلي دي. په یاده غونډه کې د غړو هېوادونو د دفاع وزیران د سیمې امنیت او دفاعي موضوعاتو په اړه خبرې کوي.
په افغانستان کې د ملګرو ملتونو مرستندویه ماموریت ویلي چې د کونړ د اسعد اباد په بېلابېلو سیمو کې د بریدونو له امله لسګونه ملکي وګړو ته مرګ ژوبله اوښتې ده. یوناما وایي، د نړیوالو بشري قوانینو له مخې ملکي وګړي او ملکي تاسیسات، په ځانګړي ډول د زده کړو بنسټونه، باید خوندي وساتل شي.
جرمني د افغان کډوالو د اخراج په لړ کې تېره شپه یوځل بیا ۲۵ کسان کابل ته لېږلي دي او دا عملیات د شپې په پټه شوي دي. د افغان پناه غوښتونکو الوتکه د لایپزیګ له هوايي ډګره پورته شوې او له یوې لنډې دمې وروسته کابل ته تللې ده.
د طالبانو دفاع وزارت وایي چې ددغه وزارت مرستیال مالي خان صدیق د کونړ ولایت اړوند ډیورنډ کرښې له پوستو لیدنه کړې ده. نوموړي دغه راز د کونړ په ولایتي روغتون کې د پاکستان د تېرې ورځې په بریدونو کې له ټپي شویو کسانو سره هم لیدلي او نغدي مرسته یې ورسره کړې ده.
د ازبکستان ولسمشر شوکت میرضیایف په تاشکند کې یوې لویې غونډه کې د دغه هېواد له چارواکو، سوداګرو او خلکو غوښتي، چې له افغانستان سره اړیکې پراخه کړي. نوموړي افغانان زیارکښ او د بډایه کلتور لرونکي بللي دي.
په کونړ کې ځايي اوسېدونکو افغانستان انټرنشنل ته وویل، چې پاکستاني ځواکونو پر خاص کونړ ولسوالۍ د درندو وسلو بریدونه پیل کړي دي. د سېمې د اوسېدونکي په وینا، د خاص کونړ ولسوالۍ د هجرت اباد کمپ او شالۍ ډاک اوسېدونکو خپل کورونه پرېیښي او خوندي ځایونو ته روان دي.
د سویلي کوریا استیناف محکمې د دغه هېواد پخوانۍ لومړۍ مېرمن کېم کیون هي ته د بډې اخیستو په تور د څلور کلن بند سزا واوروله. نوموړې چې د ګوښه شوي پخواني ولسمشر یون سوک یول مېرمن ده، د سېشنبې په ورځ (د غویي ۸مه) محکمې ته حاضره شوه.
کندهار کې د طالبانو د امر بالمعروف او نهې عنالمنکر ریاست له لوري د ودونو د مراسمو په اړه نوې پرېکړه شوې، چې له مخې یې باید د واده ټول مراسم په هوټلونو کې د شپې تر ۱۲ بجو مخکې پای ته ورسېږي. د سرچینو په وینا؛ دغه پرېکړه به له راتلونکې اوونۍ په رسمي ډول عملي شي.
د طالبانو د ریاستالوزرا اقتصادي معاونیت د سېشنبې په ورځ (د غویي ۸مه) خبر ورکړی، چې ملاعبدالغني برادر په فاریاب ولایت کې د برېښنا د لېږد او وېش درې پروژې پرانیستې دي.
د طالبانو د کابل ښاروالۍ ویاند نعمتالله بارکزی وایي، د ودانیو د جوړولو د نوي حکم له مخې هېڅوک حق نهلري چې له درېیو پوړونو لوړه ودانۍ جوړه کړي. د هغه په وینا؛ دغه درې پوړونه به له زیرزمینۍ پرته وي.
د ملګرو ملتونو د بشري حقونو ځانګړي راپور ورکوونکي ریچارډ بېنېټ د طالبانو د جزایي اصولنامې د اصلاح په موخه په یوه لیک کې له هغوی غوښتي، چې دغه قانون اصلاح کړي او په افغانستان کې د هغو قوانینو د تطبیق مخه ونیسي چې له نړۍوالې ټولنې سره د افغانستان له کړو ژمنو سرغړونه کوي.
د طالبانو د اطلاعاتو او کلتور وزارت د خپرونو معین مهاجر فراهي غزني ولایت ته د سفر په لړ کې ویلي، چې په دغه ولایت کې د ۱۰ تاریخي ابداتو د ترمیم او رغونې لومړني کارونه پیل شوي دي. د هغه په وینا؛ په لومړي پړاو کې هغه ابدې چې زیانمنې شوې، ترمیم او رغول کېږي.
د ملګرو ملتونو سرمنشي انتونیو ګوترېش اعلان کړی، چې فرانسوی ډیپلوماټ برونو جورج لیمارکېس په افغانستان کې د یوناما د نوي مرستیال، د ملګرو ملتونو د همغږۍ استازي او د بشري چارو د همغږۍ مسوول په توګه ټاکل شوی دی. نوموړي په کانګو کې ورته دنده ترسره کړې ده.