د طالبانو د اوبو او انرژۍ وزارت خبرداری ورکړی چې د وږي له ۱۱مې تر ۱۳مې پورې د سختو ورښتونو او د واورو د وېلې کېدو له امله په ننگرهار، لغمان، کونړ، نورستان، خوست، پکتیا او لوګر ولایتونو کې د سیندونو د اوبو د کچې د لوړېدو او سېلابونو بهېدو احتمال دی.
د طالبانو په اداره کې د غصب شویو ځمکو د مخنیوي کمېسیون د عدلیې وزیر عبدالحکیم شرعي په مشرۍ په کابل، خوست، نورستان او ارزګان ولایتونو کې د زرګونو جریبو ځمکو د ارزولو خبر ور کړی دی.
په کندهار کې د طالبانو له امنیه قوماندانۍ څخه سرچینو افغانستان انټرنشنل ته ویلي، چې له تېرو دوو میاشتو راهیسې د یادې ډلې پولیسو ته معاشونه نه دي ورکړل شوي. په ورته مهال په کندهار ښار کې هټیوال شکایت کوي چې طالبان توکي په پور ترې اخلي.
سیمه ییزې سرچینو افغانستان انټرنشنل ته وویل، چې د تخار ولایت په ورسج ولسوالۍ کې د یو ماین له موندل کېدو وروسته طالبانو د دې ولسوالۍ پنځه تنه اوسېدونکي په دوو پړاوونو کې نیولي او د تالقان ښار ته یې لېږدولي. دا ماین د سیمې د خلکو له خوا کشف شوی او په اړه یې نور جزییات نشته.
د طالبانو ویاند ذبیح الله مجاهد د شانګهای همکارۍ سازمان په ناسته کې طالبانو ته د بلنې نه ورکولو له امله غبرګون ښودلی او وايي، په دې ناسته کې د سیمې په اړه هره کېدونکې پرېکړه به نیمګړې وي.
له افغان شخصیتونو سره د طالبانو د اړیکو کمېسیون ویلي، چې په افغانستان کې د هېڅ افغان ژوند ته خطر متوجې نه دی او هېواد د ټولو ګډ کور دی. د طالبانو دغه غبرګون وروسته له هغې راځي چې د دوی په وینا، ځینو ګاونډیو هېوادونو افغانانو ته د پاتې کېدو استثنایي اجازه ورکړې ده.
د طالبانو د کورنیو چارو وزیر په یوه غونډه کې ویلي، چې بهرني ځواکونه یې د ځانمرګو په سرښندنو مات کړل. حقاني د طنز په ډول وویل، چې لومړنی ځانمرګی بریدګر، چې دده په مرکز کې یې نوم لیکلی و او ژوندی دی، اوس له ده نه «جنرالي» غواړي.
د طالبانو د خوست د اطلاعاتو او فرهنګ ریاست د یوه پخواني ځانمرګي بریدګر ذهینالله د «وصیت» په نوم جوړې شوې تابلووې د دغه ولایت ټولو دولتي ادارو او خپلواکو امریتونو ته وېشلې دي. هغه په ۲۰۱۱ کال کې په کابل کې د امریکا پر سفارت او د ناټو پر مرکز د ډزو پرمهال ځانمرګی برید کړی و.
د افغانستان د علومو اکاډمۍ له لوري د طبیعي سرچینو د دوامدار مدیریت په اړه علمي څېړنیز کنفرانس کې د طالبانو رییس الوزرا ملا حسن اخوند د اوبو، ځمکو، ځنګلونو، څړځایونو او کانونو پر ساتنې او له هغو پر عادلانه ګټې اخیستنې ټینګار کړی.
د پاکستاني طالبانو تحریک په یوه اعلامیه کې ویلي، چې د اګسټ په میاشت کې یې د پاکستان په بېلابېلو سیمو کې ۴۰۶ بریدونه کړي دي. یادې ډلې ادعا کړې، چې په دغه بریدونو کې ۶۴۶ پاکستاني سرتېرو ته مرګ ژوبله اوښتې ده.
د هند لومړي وزیر نرېندرا مودي د شانګهای همکاریو سازمان د سرمشریزې په غونډه کې ویلي، چې په اوراسیا کې سوله او ثبات او د یادې سیمې لپاره ګډه هیله له افغانستان سره تړلې ده. مودي همداراز وویل، چې هېواد به یې د افغانستان له خلکو سره د پراختیايي مرستو له دوام څخه ډډه ونه کړي.
په پاکستان کې د طالبانو سفیر سردار احمد شکېب په اسلاماباد کې د دغه هېواد په ملي دفاع پوهنتون کې د وینا پرمهال ویلي، د تېرو څو لسیزو جګړو او امنیتي تحولاتو داسې وضعیت رامنځته کړی چې د افغانستان او پاکستان امنیتي محاسبې یې له یو بل سره په ژوره توګه تړلې دي.
په افغانستان کې د ملګرو ملتونو مرستندویه پلاوي (یوناما) د افغانستان د وسلهوالو شخړو د قربانیانو په اړه خپل څېړنیز راپور خپور کړ.
د طالبانو د معیار او کیفیت اداره وايي، چې د معیارونو د عملي کولو او د ودانیزو توکو د کیفیت د کنټرول په لړ کې یې په حیرتان بندر کې د ۴۸۰ ټنه نامعیاري سمنټو د واردېدو مخه نیولې او دغه جوپه یې بېرته د اصلي هېواد پر لور مسترد کړې ده.
په کاپیسا کې د طالبانو د کرنې، اوبولګولو او مالداري اداره وايي، سږکال په دغه ولایت کې د انګورو حاصلات د تېرکال پرتله زیات شوي دي. دغه ادارې ویلي، چې سږکال د ۷زره او ۲۳۰ مټریک ټنه انګورو راټولېدو اټکل شوی دی.
د افغانستان په سویلي ولایتونو کې د ښځینه ډاکټرانو په ځانګړي ډول د متخصصو ښځینه ډاکټرانو کمښت د ښځینه ناروغانو د روغتیايي خدمتونو پر وړاندې یوه جدي ستونزه ګرځېدلې ده. اوسمهال په کندهار، روزګان او نورو سویلي ولایتونو کې یوازې درې ښځینه متخصصې ډاکټرانې پاتې دي.
بيبيسي په خپل یو تازه راپور کې افغانستان ته په نږدې درېیو کلونو کې له ایران او پاکستان نه د ۶مېلیونه کډوالو د بېرته ستنېدو، د هغوی د ناوړه بشري وضعیت، د ښځو او نجونو د راتلونکي او پخوانیو پوځیانو د امنیتي ستونزو په اړه معلومات وړاندې کړي دي.
د ایران ولسمشر مسعود پزشکیان د سېشنبې په ورځ (د وږي ۱۰مه) په قرغزستان کې د شانګهای همکاریو سازمان په سرمشریزه کې ویلي، که امریکا د اسلاماباد تفاهملیک ته راوګرځي؛ نو ایران به هم سملاسي متقابل اقدام وکړي.
په تخار کې د طالبانو د امنیې قوماندانۍ رسنیز مسوول نقیبالله مسرور وايي، چې د دوشنبې په ورځ (د وږي ۹مه) د یاد ولایت د بهارک ولسوالۍ اړوند د دوراهي سیمې په یوې ژورې څاه کې د زهري ګازو خپرېدو له کبله دوه کسان مړه شوي دي.
په افغانستان کې د ملګرو ملتونو د ماشومانو ملاتړ صندوق (یونېسف) استازي تاجالدین اویوال په افغانستان کې د اروپايي ټولنې د همکارۍ برخې مشر ارېک بوم د ماموریت پای ته رسېدو په درشل کې د هغه او اروپايي ټولنې له ملاتړه مننه کړې ده.
د طالبانو تر واک لاندې د افغاني سرې میاشتې ټولنې مشر شهابالدین دلاور وايي، د دوحې تړون پرمهال یې د امریکا له ګډې کمېټې سره د افغانستان، طالبانو، امریکا او د تړون چارې څارلې. د هغه په خبره، امریکا تر وتلو وروسته تر ۳زره زیاتې سرغړونې کړې؛ خو دوی له یوه تکي هم نهدي په شا شوي.