د ایران ولسمشر مسعود پزشکیان د سېشنبې په ورځ (د وږي ۱۰مه) په قرغزستان کې د شانګهای همکاریو سازمان په سرمشریزه کې ویلي، که امریکا د اسلاماباد تفاهملیک ته راوګرځي؛ نو ایران به هم سملاسي متقابل اقدام وکړي.
په تخار کې د طالبانو د امنیې قوماندانۍ رسنیز مسوول نقیبالله مسرور وايي، چې د دوشنبې په ورځ (د وږي ۹مه) د یاد ولایت د بهارک ولسوالۍ اړوند د دوراهي سیمې په یوې ژورې څاه کې د زهري ګازو خپرېدو له کبله دوه کسان مړه شوي دي.
په افغانستان کې د ملګرو ملتونو د ماشومانو ملاتړ صندوق (یونېسف) استازي تاجالدین اویوال په افغانستان کې د اروپايي ټولنې د همکارۍ برخې مشر ارېک بوم د ماموریت پای ته رسېدو په درشل کې د هغه او اروپايي ټولنې له ملاتړه مننه کړې ده.
د طالبانو تر واک لاندې د افغاني سرې میاشتې ټولنې مشر شهابالدین دلاور وايي، د دوحې تړون پرمهال یې د امریکا له ګډې کمېټې سره د افغانستان، طالبانو، امریکا او د تړون چارې څارلې. د هغه په خبره، امریکا تر وتلو وروسته تر ۳زره زیاتې سرغړونې کړې؛ خو دوی له یوه تکي هم نهدي په شا شوي.
د پاکستان تحریک انصاف ګوند اعلان کړی، چې د روانې سپټمبر میاشتې له ۳مې تر ۷مې نېټې پورې به د دغه ګوند مشران سند ته سفر وکړي او په دغه موده کې به د «احتجاجي تحریک» په لړ کې په بېلابېلو سیمو کې ولسي غونډې ترسره کړي.
د طالبانو تر واک لاندې د افغاني سرې میاشتې ټولنې مشر شهابالدین دلاور وايي، تر «امرثاني» د ښځو د زدهکړو بهیر ځنډولو امر هبت الله اخوندزاده کړی او هیڅوک یې په مقابل کې څه نهشي ویلی. دلاور زیاتوي، دوی تر زدهکړو مهم ښځو ته د خاوند د انتخاب او میراث حقونه ورکړي دي.
د طالبانو تر واک لاندې د دولتي شرکتونو عمومي ریاست وايي، د ترکمنستان د وارداتي برېښنا تر پرې کېدو وروسته یې له بدیلو لارو د افغانستان ۷ اغېزمنو ولایتونو ته په لنډمهالي ډول برېښنا بېرته تامین کړې ده.
د هند په اترپردېش ایالت کې د اورلوبو وسایلو جوړولو کارخونه کې د چاودنې له امله د ۸ ماشومانو په ګډون لږترلږه ۱۱ کسان وژل شوي دي. پولیس وايي، دغه زوروره چاودنه په کاوشامبي ولسوالۍ کې شوې چې له امله یې څو نږدې کورونه هم نړېدلي دي.
د تېر جمهوري نظام د دفاع وزارت سرپرست وزیر شاه محمود میاخېل وايي، افغانان باید د وسلهوالې جګړې پر ځای فکري مبارزې ته لومړیتوب ورکړي؛ ځګه وسلهوالې جګړې یوازې د جګړهمارو لوری او ځای بدلوي او د هېواد بنسټیزې ستونزې نهشي حل کولی.
په ننګرهار کې د طالبانو رسنیز دفتر خبر ورکړی، په دغه ولایت کې د یادې ډلې امنیه قوماندانۍ د جلالاباد ښار له بېلابېلو سیمو او ولسوالیو ۹۵ سوالګر راټول او بایومتریک کړي چې د وضعیت د ارزونې او د اړینو مرستو برابرولو لپاره اړوندو ادارو ته ور وپېژندل شوي دي.
د طالبانو د المپیک، ورزش او بدني روزنې عمومي ریاست خبر ورکړی، چې د افغانستان له ۲۰ کلونو کم عمره د فوټبال ملي لوبډلې د ۲۰۲۷کال اسیا جام ته د لارموندنې سیالیو په لومړۍ لوبه کې د اردن پر وړاندې د ۱ – صفر ګول په توپیر ماتې وخوړه.
د پاکستان لومړي وزیر شهباز شریف د ازبکستان له ولسمشر شوکت میرضیایف سره په لیدنه کې د ازبکستان-افغانستان-پاکستان رېلپټلۍ چې د «ټرانسافغان» په نوم هم یادېږي، د چټکتیا غوښتنه وکړه. دغه لیدنه د شانګهای همکاریو سازمان د غونډې په څنډه کې شوې ده.
د ملګرو ملتونو د ښځو څانګه وايي، له هرو درېیو افغان ښځو یوې ویلي چې روغتیايي خدمتونو ته یې لاسرسی اغېزمن شوی. د یادې ادارې په وینا، له دغه وضعیت سره، سره طالبانو د ښځو پر زدهکړو او کار د بندیزونو له لارې د ښځینه ډاکټرانو، روغتیاپالو او قابلو د زدهکړو او کار زمینه محدوده کړې ده.
د غزې د حکومت د رسنیو دفتر خبر ورکړی، چې د اکټوبر له لسمې نېټې د اوربند له پیل راهیسې تر اوسه اسراییل پر غزې لږترلږه ۴زره او ۳۷۹ ځله بریدونه کړي دي. په دغه بریدونو کې ټولټال ۱۳۲۰ کسان وژل شوي او ۴زره او ۳۸۵ نور بیا ټپیان شوي دي.
د امریکا د ملي امنیت پخواني سلاکار جان بولټن ویلي، پر ایران د تېلو محاصره د امریکا لپاره «ستر بریالیتوب» دی او واشنګټن باید دغه فشارونه وساتي.
والسټریټ ژورنال راپور ورکړی چې د امریکا د پوځ وزیر ډان ډریسکول، له څو میاشتو راهیسې د امریکا د جګړې له وزیر پیټ هېګست سره د پوځ د تګلارې او د یو شمېر لوړپوړو پوځي افسرانو د ګوښه کولو پر سر د روانو اختلافونو وروسته، خپله استعفا د امریکا ولسمشر ډونالډ ټرمپ ته سپارلې ده.
د طالبانو مخالفې ډلې، متحدې جبهې ادعا کړې، د اګست په میاشت کې یې د افغانستان په ۱۵ ولايتونو کې د طالبانو پر ضد ۴۳ عمليات ترسره کړي چې په کې یې ۷۴ طالبان وژلي او ۳۵ نور ټپيان کړې دي.
په اسټرالیا کې د «پیس کپ» په غونډه کې له دغه هېواد او نړیوالې ټولنې غوښتل شوي چې د افغان ښځو او نجونو د زدهکړو او بشري حقونو ملاتړ وکړي او له ګواښ سره مخ افغانانو ته د بشري ویزو زمینه پراخه کړي.
ځايي سرچینو د دوشنبې په ورځ افغانستان انټرنشنل ته ویلي چې د بدخشان ولایت د مستوفیت ادارې شاوخوا ۳۰ کارکوونکو د طالبانو د دغه ولایت د مستوفي، مولوي ګلاحمد، د «ناوړه چلند، سپکاوي او پرلهپسې ګواښونو» په اعتراض کې په ډلهییزه توګه له خپلو دندو استعفا کړې ده.
په نورستان کې د طالبانو د امنیه قومندانۍ ویاند محمد حسن ثاقب ویلي، په وانټ ولسوالۍ کې د بارانونو له امله سېلابونه راغلي، کورونه یې له منځه وړي او تر اوسه پورې په دغو پېښو کې لږ تر لږه درې کسان چې دوه ښځې او يو ماشوم دی مړه شوي.
په هلمند کې د سینما لوبغاړی عصمتالله افغان وايي، د خپل ناروغ زوی د درملنې د لګښتونو له برابرولو عاجز شوی او د ماشوم د ژوندي پاتې کېدو لپاره چمتو دی چې هغه بلې کورنۍ ته وسپاري.